កំពង់ស្ពឺៈ តុលាការខេត្តកំពង់ស្ពឺ ឃុំខ្លួនបុរស ២ នាក់ ក្នុងពន្ធនាគារខេត្ត កាលពីថ្ងៃទី ៧ សីហា ពាក់ព័ន្ធការឆបោកលុយជាង ២ ម៉ឺនដុល្លារ ក្នុងការអូសទាញជនរងគ្រោះឱ្យទិញអាហារបំប៉ន ដើម្បីយកការប្រាក់ ដែលប្រព្រឹត្តនៅខេត្តកំពង់ស្ពឺ កាលពីចុងសប្តាហ៍។
លោក ញ៉ែម សៅ ស្នងការរងទទួលផែននគរបាលសន្តិសុខ នៃស្នងការដ្ឋាននគរបាលខេត្តកំពង់ស្ពឺប្រាប់ ភ្នំពេញ ប៉ុស្តិ៍ នៅថ្ងៃទី ៨ សីហាថា ជនត្រូវចោទទាំង ២ នាក់ ឈ្មោះ វ៉ិត សុខរឺន ភេទប្រុស អាយុ ២៧ ឆ្នាំ ដែលអះអាងថាជា បុគ្គលិកក្រុម ហ៊ុន យូនី ស៊ីធី និងមានលំនៅឋាននៅភូមិអូរគគី ឃុំតាំងក្រូច ស្រុកសំរោងទង ខេត្ដកំពង់ស្ពឺ។ ឈ្មោះ ជា ប៊ីន ភេទប្រុស អាយុ ៤១ ឆ្នាំ ជាបុគ្គលិកក្នុងក្រុមហ៊ុនខាងលើជាមួយគ្នា និងមានទីលំនៅ ភូមិក្រាំងពង្រ ឃុំខ្ទុំក្រាំង ស្រុកសំរោងទង ខេត្ដកំពង់ស្ពឺ។
លោកប្រាប់ថា៖ «ជនទាំង ២ នាក់ ត្រូវសមត្ថកិច្ចចាប់ខ្លួនតាមបណ្តឹងរបស់ជនរងគ្រោះ។ រឿងនេះយើងមានចំណាត់ការតាមបញ្ជារបស់លោកឧត្តមសេនីយ៍ទោស្នងការខេត្ត សម សាមួន»។
ពាក់ព័ន្ធអង្គហេតុក្នុងរឿងនេះមិនត្រូវបានលោកស្នងការរង ញ៉ែម សៅ ប្រាប់ឱ្យដឹងលម្អិតទេ។ ប៉ុន្តែបើយោងតាមមន្ត្រីនគរបាល ១ រូប ស្នើសុំមិនឱ្យបញ្ចេញឈ្មោះប្រាប់នៅថ្ងៃទី ៨ សីហា ថា មុនមានការឃាត់ខ្លួនបុរសទាំង២នាក់ខាងលើ គឺសមត្ថកិច្ចបានទទួលពាក្យបណ្តឹងពីជនរងគ្រោះប្រុសស្រី ២ នាក់ កាលពីថ្ងៃទី ៥ សីហា។
មន្ត្រីនគរបាលរូបនេះបន្តតាមពាក្យបណ្តឹងថាមានបុរស ២ នាក់ បាននិយាយបញ្ចុះបញ្ចូលពួកគាត់ឱ្យទិញឱសថបំប៉នសុខភាពពីក្រុមហ៊ុនរបស់ពួកគេ។ ព្រោះមិនត្រឹមតែអតិថិជនចំណាយលុយទិញឱសថយកមកប្រើហើយបានជាស្បើយពីជំងឺទេ តែថែមទាំងចំណេញលុយទៀត។
មន្ត្រីដដែលបន្តថាជនត្រូវចោទទាំង២នាក់បាននិយាយបញ្ចុះ បញ្ចូលជនរងគ្រោះថា អាហារបំប៉នសុខភាពនេះត្រូវបានវេជ្ជបណ្ឌិតល្បីៗ ដែលបានបញ្ចប់ថ្នាក់បណ្ឌិត ជាអ្នកឯកទេសផ្នែកសុខភាពរាង កាយមនុស្ស និងព្យាបាលជំងឺប្រើឱសថអាហារ បំប៉នសុខភាពនេះ។ ពេលទទួល ទានចូលទៅខាងក្នុង ឱសថនោះមានសមត្ថភាពព្យាបាល និងជួសជុលសរីរាង្គ ផ្នែកខាងក្នុងខ្លួនបាន១០០ភាគរយតែម្តង ដោយមិនចាំបាច់ព្យាបាលជំងឺ ដោយលេបថ្នាំ ឬ ព្យួរសេរ៉ូមទេ។
មន្ត្រីនគរបាលបន្តទៀតថា ជនត្រូវចោទទាំង ២ នាក់ បានលួងលោមជនរងគ្រោះទាំង២នាក់ហើយបានណែនាំឱ្យទិញអាហារបំប៉នដែលជាកញ្ចប់ តម្លៃ ២៥ ០០០ ដុល្លារអាមេរិក។ ទន្ទឹមនឹងនេះជនឆបោកទាំង ២ នាក់ បានសន្យាផ្ដល់ភាគលាភក្នុង ១ខែចំនួន៣ពាន់ដុល្លារអាមេរិកឱ្យមកជនរងគ្រោះវិញ (ក្នុងមនុស្សម្នាក់)។
មិនតែប៉ុណ្ណោះអតិថិជននឹងទទួលបានកាតមាសពីក្រុមហ៊ុនសម្រាប់ការ បំពេញការងារក្នុងក្រុមហ៊ុន១ទៅថៃ្ងអនាគតហើយបើពេលចូលនិវត្ដន៍ នឹងទទួលបានប្រាក់ឧបត្ថម្ភ ប្រចាំខែពី ១ ៥០០ ដុល្លារអាមេរិក ទៅ ៣ ៥០០ ដុល្លារអាមេរិកផង។ ពិសេសបានទៅលេងនៅបរទេសទៀត៕