.jpg)
គ្រូពេទ្យចាក់វ៉ាក់សាំងបង្ការជំងឺកូវីដ ១៩ ដូសទី៣ ដល់មន្ត្រីជួរមុខ នៅខេត្តបន្ទាយមានជ័យកាលពីថ្ងៃម្សិលមិញ។ រូបថត រដ្ឋបាលខេត្តបន្ទាយមានជ័យ
ភ្នំពេញៈ ខេត្ដជាប់ព្រំដែនកម្ពុជា-ថៃចំនួន ៧ កំពុងបើកយុទ្ធនាការចាក់វ៉ាក់សាំងបង្ការវីរុសកូវីដ ១៩ ដូសទី៣ ដល់ក្រុមគ្រូពេទ្យ និងមន្ដ្រីជួរមុខ បន្ទាប់ពីវ៉ាក់សាំងត្រូវបានដឹកដោយឧទ្ធម្ភាគចក្រចំនួន ២ គ្រឿង ទៅដល់ជាបន្តបន្ទាប់កាលពីល្ងាចថ្ងៃទី ៧ ខែសីហា។
បើតាមគណៈកម្មការចំពោះកិច្ច គិតត្រឹមថ្ងៃទី ៧ ខែសីហា ពលរដ្ឋកម្ពុជាជាង ៨ លាននាក់ស្មើនឹងជាង ៥០ ភាគរយនៃពលរដ្ឋសរុប ១៦ លាននាក់បានចាក់វ៉ាក់សាំងបង្ការវីរុសកូវីដ ១៩។
លោកនាយករដ្ឋមន្ត្រី ហ៊ុន សែន បានថ្លែងតាមរយៈសារជាសំឡេងពិសេសកាលពីថ្ងៃទី ៦ ខែសីហា ដោយបានដាក់បទបញ្ជាឱ្យលោកស្រី ឱ វណ្ឌឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ នាំយកវ៉ាក់សាំងបង្ការជំងឺកូវីដ ១៩ AstraZeneca សម្រាប់ចាក់ដូសទី៣ ឬដូសជំរុញ (Boosting Dose) ដល់គ្រូពេទ្យមន្ត្រីរាជការ និងកងទ័ពនៅតាមខេត្ដជាប់ព្រំដែនកម្ពុជា-ថៃជាបន្ទាន់។
បើតាមលោកនាយករដ្ឋមន្ដ្រី ការបញ្ជានេះដោយសារមានបារម្ភដល់មន្ដ្រីជួរមុខ អាចប្រឈមហានិភ័យឆ្លងមេរោគកូវីដ ១៩ ពិសេសមេរោគបំប្លែងថ្មីប្រភេទ Delta ខណៈពលករចំណាកស្រុកកម្ពុជារាប់ពាន់នាក់ កំពុងបន្តវិលត្រឡប់មកពីប្រទេសថៃវិញ ហើយក្នុងនោះក៏មានករណីរកឃើញវិជ្ជមានកូវីដ ១៩ ប្រភេទបំប្លែងថ្មីផងដែរ។
លោកបញ្ជាក់ថា៖ «អាចថាខានស្អែក ឬខានស្អែកមួយ។ ចាប់ផ្តើមអនុវត្តការចាក់ដូសទី៣ ឱ្យផ្នែកជួរមុខនៅតាមព្រំដែនកម្ពុជា-ថៃទាំងអស់ដែលនៅផ្តុំទទួលសេវាព្រោះបងប្អូនទាំងនេះនឹងទទួលហានិភ័យ បន្ទាប់ពីបងប្អូនរាប់ពាន់នាក់ពីប្រទេសថៃ...ចូលមក [កម្ពុជា]»។
លោកស្រី ឱ វណ្ណឌីន បានឱ្យដឹងថា លោកនាយករដ្ឋមន្ត្រីបានអនុញ្ញាតឱ្យប្រើប្រាស់ឧទ្ធម្ភាគចក្រចំនួន ២ គ្រឿង ដើម្បីដឹកវ៉ាក់សាំង AstraZeneca ទៅកាន់បណ្តាខេត្តចំនួន ៦ ជាប់ព្រំដែនកម្ពុជា-ថៃ និងខេត្ដចំនួន ១ ត្រូវដឹកដោយរថយន្តដើម្បីយកវ៉ាក់សាំងទៅចាក់ដូសទី ៣ ដល់មន្ត្រីជួរមុខនៅថ្ងៃទី ៨ ខែ សីហា ឆ្នាំ ២០២១ តែម្ដង។ ខេត្តទាំងនោះរួមមានខេត្តកោះកុង ប៉ៃលិន បាត់ដំបង ឧត្តរមានជ័យ បន្ទាយមានជ័យ ព្រះវិហារ និងខេត្ដពោធិ៍សាត់ដែលជាខេត្ដទទួលបានវ៉ាក់សាំងតាមរយៈរថយន្ត។
លោកស្រីថ្លែងប្រាប់អ្នកសារព័ត៌មាន ពេលនាំយកអំណោយរបស់លោកនាយករដ្ឋមន្ដ្រីទៅប្រគល់ជូនលោកតាលោកយាយអាយុ ១០០ ឆ្នាំឡើង ដែលបានចាក់វ៉ាក់សាំងការពារជំងឺកូវីដ ១៩ នៅខេត្តកំពង់ធំ ស្ទឹងត្រែង និងរតនគិរីកាលពីថ្ងៃទី ៧ ខែសីហាថា ការចាក់វ៉ាក់សាំងដូសទី៣ នេះ គឺលោកនាយករដ្ឋមន្ត្រីបានយកចិត្ដទុកដាក់បន្ថែមទៀតដល់ក្រុមគ្រូពេទ្យ និងមន្ដ្រីជួរមុខ ដែលកំពុងបំពេញភារកិច្ចជួរមុខ នៅតាមខេត្ដជាប់ព្រំដែនកម្ពុជា-ថៃ។
លោកស្រីថ្លែងថា៖ «ការចាក់នេះ គឺនឹងចាប់ផ្ដើមជាយុទ្ធនាការនៅថ្ងៃស្អែកនេះ [ថ្ងៃទី ៨ ខែសីហា] គឺគ្រប់ខេត្ដទាំងអស់គាត់បានចាប់ផ្ដើមចាក់វ៉ាក់សាំងនៅថ្ងៃស្អែកនេះហើយ»។
បើតាមលោកស្រី ឱ វណ្ណឌីន ការចាក់វ៉ាក់សាំង AstraZeneca ដូសទី ៣ ដល់អ្នកដែលបានចាក់វ៉ាក់សាំងស៊ីណូហ្វាម និងស៊ីណូវ៉ាក់គ្រប់ដូសរួចហើយនេះ គឺវាបានផ្ដល់នូវលទ្ធផលឆ្លើយតបបន្ថែមទៀត ដើម្បីរុញច្រានឱ្យអង់ទីគ័ររបស់អ្នកដែលទទួលវ៉ាក់សាំងឡើងខ្ពស់។
លោកស្រីបន្តថា ការចាក់ដូសទី៣ នេះមិនមែនមានន័យថា វ៉ាក់សាំងប្រភេទស៊ីណូហ្វាម ឬស៊ីណូវ៉ាក់ មិនមានអង់ទីគ័រនោះទេ។ ប៉ុន្ដែដោយសារបរិបទនៃការរីករាលដាលនៃវីរុសកូវីដ-១៩ប្រភេទ Delta ពិសេសចំពោះក្រុមគ្រូពេទ្យ និងមន្ដ្រីជួរមុខ ធ្វើការងារផ្ទាល់ជាមួយអ្នកជំងឺកូវីដ ១៩ ដែលមានហានិភ័យខ្ពស់។ ដូច្នេះទើបលោកនាយករដ្ឋមន្ដ្រីមានការគិតគូរខ្ពស់ដោយភាពវៃឆ្លាតផ្ដល់វ៉ាក់សាំងដូសទី ៣ ទៅដល់ក្រុមនេះ។
គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស កាលពីថ្ងៃទី ៧ ខែសីហា បានណែនាំអំពីការចាក់វ៉ាក់សាំងកូវីដ ១៩ AstraZeneca ដូសទី ៣ ចំពោះរដ្ឋបាលរាជធានី-ខេត្តទាំងអស់ពិសេសខេត្តដែលនឹងត្រូវចាក់វ៉ាក់សាំង AstraZeneca សម្រាប់ដូសទី៣ ដែលនឹងចាប់ផ្តើមនាសប្ដាហ៍ទី ២ នៃខែសីហា ២០២១ ថា ត្រូវចាក់វ៉ាក់សាំងកូវីដ ១៩ ឈ្មោះអាស្ត្រាហ្សេនីកា ជាដូសជំរុញ ឬដូសទី ៣ អាចចាក់បានចំពោះបុគ្គលដែលបានចាក់វ៉ាក់សាំងលើកមុន ជាវ៉ាក់សាំងកូវីដ ១៩ ឈ្មោះស៊ីណូហ្វាម ឬស៊ីណូវ៉ាក់តែប៉ុណ្ណោះ។ ចំណែកបុគ្គលដែលមកទទួលវ៉ាក់សាំងកូវីដ ១៩ ដូសទី៣ ត្រូវយកមកជាមួយនូវបណ្ណចាក់វ៉ាក់សាំងលើកមុន។
សេចក្ដីណែនាំបានបញ្ជាក់ថា ត្រូវបញ្ចូលព័ត៌មានក្នុងប្រព័ន្ធកត់ត្រាទិន្នន័យ ចាក់វ៉ាក់សាំងឱ្យបានពេញលេញ និងត្រឹមត្រូវ និងសរសេរលើបណ្ណចាក់វ៉ាក់សាំងរបស់បុគ្គលដែលមានស្រាប់ដោយសរសេរថា៖ «លើកទី៣» ឈ្មោះវ៉ាក់សាំង «AZ» និងដោយបញ្ជាក់ពីទីកន្លែង និងកាលបរិច្ឆេទនៃការចាក់វ៉ាក់សាំង។
គិតត្រឹមថ្ងៃម្សិលមិញ រដ្ឋបាលខេត្ដជាប់ព្រំដែនទាំង ៧ កំពុងអនុវត្ដយុទ្ធនាការចាក់វ៉ាក់សាំងដូសទី៣ ដល់ក្រុមគ្រូពេទ្យ និងមន្ដ្រីជួរមុខ នៅក្នុងភូមិសាស្ដ្រខេត្ដរបស់ខ្លួន។
តាមរយៈយុទ្ធនាការចាក់វ៉ាក់សាំងដូសទី៣ នេះ រដ្ឋបាលខេត្ដបន្ទាយមានជ័យ បានបើកយុទ្ធនាការចាក់វ៉ាក់សាំងនេះ ជូនដល់មន្ដ្រីរាជការ ប្រធានមន្ទីរ-អង្គភាពនានា ជុំវិញខេត្តអភិបាលក្រុង-ស្រុក និងមេឃុំ/ចៅសង្កាត់ចាប់ពីថ្ងៃទី ៨ ខែសីហា ឆ្នាំ ២០២១ តទៅ។
រដ្ឋបាលខេត្ដបន្ទាយមានជ័យបានរៀបចំទីតាំងសម្រាប់ចាក់វ៉ាក់សាំងចំនួន ២ ទីតាំង គឺ ទី១ សាលប្រជុំ (ធំ) សាលាខេត្តបន្ទាយមានជ័យ ទី២ សាលប្រជុំ (ធំ) គណបក្សប្រជាជនកម្ពុជា ខេត្តបន្ទាយមានជ័យ។
ចំណែករដ្ឋបាលខេត្ដកោះកុង ក៏កំពុងអនុវត្ដយុទ្ធនាការចាក់វ៉ាក់សាំងដូសទី៣ នេះផងដែរ កាលពីថ្ងៃម្សិលមិញ។ រដ្ឋបាលខេត្ដនេះបានឱ្យដឹងថា យុទ្ធនាការចាក់វ៉ាក់សាំង បង្ការវីរុសកូវីដ ១៩ នេះនឹងប្រព្រឹត្តទៅចាប់ពីថ្ងៃទី ៨ រហូតដល់ថ្ងៃទី ១២ ខែ សីហា ឆ្នាំ ២០២១ ចាប់ពីវេលាម៉ោង ៨:០០ នាទីព្រឹក រហូតដល់ម៉ោង ៤:០០ នាទីរសៀល នៅរៀងរាល់ថ្ងៃនៅតាមទីតាំងចំនួន ៣ គឺសាខាកាកបាទក្រហមខេត្ដកោះកុង សាលាបឋមសិក្សាបឹងព្រាវ និងមណ្ឌលសុខភាពភ្ញីមាស។
បើយោងតាមរបាយការណ៍របស់គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្របខ័ណ្ឌទូទាំងប្រទេស កំណើនការចាក់វ៉ាក់សាំងដល់ប្រជាពលរដ្ឋនៅទូទាំងប្រទេសចាប់ពីថ្ងៃទី ១០ ខែកុម្ភៈ ឆ្នាំ ២០២១ ដល់ថ្ងៃទី ៧ ខែសីហា ឆ្នាំ ២០២១ លទ្ធផលចាក់វ៉ាក់សាំងចំពោះអ្នកដែលមានអាយុចាប់ពី ១៨ ឆ្នាំឡើងទៅ មានចំនួនជាង ៧,៧ លាននាក់ស្នើនឹង ៧៧,៩២% បើធៀបជាមួយចំនួនប្រជាជនគោលដៅ ១០ លាននាក់។
ជាមួយគ្នានេះ លទ្ធផលនៃការចាក់វ៉ាក់សាំងដល់កុមារ-យុវវ័យអាយុចាប់ពី ១២ ឆ្នាំ ទៅដល់ក្រោម ១៨ ឆ្នាំមានចាក់បានចំនួនជាង ២៥ ម៉ឺននាក់ ស្មើនឹង ១២,៨២ ភាគរយបើធៀបជាមួយនឹងប្រជាជនគោលដៅប្រមាណ ២ លាននាក់។
គណៈកម្មការចំពោះកិច្ចចាក់វ៉ាក់សាំងកូវីដ ១៩ បញ្ជាក់ថា សរុបអ្នកដែលបានចាក់វ៉ាក់សាំងទូទាំងប្រទេសបានចំនួនជាង ៨ លាននាក់ ស្មើនឹង ៥០,២៨ ភាគរយបើធៀបទៅនឹងចំនួនប្រជាជនសរុប ១៦ លាននាក់៕
វីដេអូ៖
