The Phnom Penh Post Search

Search form




Logo of Phnom Penh Post newspaper Phnom Penh Post - លោកនាយក​រដ្ឋមន្ត្រី​ផ្ញើ​សារលិខិត​ប្រារព្ធ​ខួប​លើក​ទី៥៤ អាស៊ាន​ និង​បញ្ជាក់​ជំហរ​កម្ពុជា​ជា​ប្រធាន​អាស៊ាន

លោកនាយក​រដ្ឋមន្ត្រី​ផ្ញើ​សារលិខិត​ប្រារព្ធ​ខួប​លើក​ទី៥៤ អាស៊ាន​ និង​បញ្ជាក់​ជំហរ​កម្ពុជា​ជា​ប្រធាន​អាស៊ាន

Content image - Phnom Penh Post
លោកនាយក​រដ្ឋមន្ត្រី ហ៊ុន សែន នាពេល​កន្លងមក។ រូបថត SPM

លោកនាយក​រដ្ឋមន្ត្រី​ផ្ញើ​សារលិខិត​ប្រារព្ធ​ខួប​លើក​ទី៥៤ អាស៊ាន​ និង​បញ្ជាក់​ជំហរ​កម្ពុជា​ជា​ប្រធាន​អាស៊ាន

ភ្នំពេញៈ លោក ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​បាន​ផ្ញើ​សារលិខិត​ប្រារព្ធ​ខួប​លើក​ទី៥៤ នៃ​ការបង្កើត​សមាគម​ប្រជាជាតិ​អាស៊ីអាគ្នេយ៍ ដែល​ហៅ​កាត់​ថា​អាស៊ាន ក្នុង​ទិវា​អាស៊ាន ថ្ងៃទី ៨ ខែ សីហា ឆ្នាំ ២០២១។

យោងតាម​សារលិខិត​របស់​លោកនាយករដ្ឋមន្ត្រី​បាន​ឱ្យដឹងថា កម្ពុជា​នឹង​ទទួល​តួនាទី​ជា​ប្រធាន​ប្ដូរ​វេន​របស់​អាស៊ាន​ជា​លើក​ទី៣ ក្នុង​អំឡុងពេល​មិន​ដល់ ៥ ខែ​ទៀត​ទេ បន្ទាប់ពី​ប្រទេស​ប្រ៊ុយណេ ដែល​កំពុង​ធ្វើជា​ប្រធាន​អាស៊ាន​នៅក្នុង​ឆ្នាំនេះ។ កម្ពុជា​បាន​ចូលរួម​ក្នុង​សមាគម​នេះ​ក្នុង​ឆ្នាំ ១៩៩៩។

លោក ហ៊ុន សែន បាន​ថ្លែងថា៖ «ក្នុងអំឡុងពេល​ធ្វើជា​ប្រធាន​អាស៊ាន​ឆ្នាំ ២០២២ កម្ពុជា​នឹង​បន្ត​ខិតខំ​ប្រឹងប្រែង​លើកកម្ពស់​យន្តការ ដែល​ផ្ដោត​សំខាន់​លើ​ការពង្រឹង​សកម្មភាព​រួមគ្នា​ជាក់ស្ដែង ដោយ​ឈរ​ជា​មូលដ្ឋាន​ភាព​បើកចំហ ស្មោះត្រង់ សុចរិត សុច្ឆន្ទៈ សាមគ្គីភាព និង​ភាពសុខដុមរមនា​នៅក្នុង​អាស៊ាន ដើម្បី​ដោះស្រាយ​ប្រកប​ដោយ​ប្រសិទ្ធភាព​នូវ​បញ្ហា​ប្រឈម​រួម ដែល​តំបន់​យើង​ទាំងមូល​កំពុង​ជួបប្រទះ»។

លោកនាយក​រដ្ឋមន្ដ្រី​បន្តថា៖ «កាន់តែ​សំខាន់​ជាងនេះទៅទៀត​ដោយមាន​ការគាំទ្រ និង​សាមគ្គីភាព​យ៉ាងរឹងមាំ​របស់​ប្រទេស​សមាជិក​អាស៊ាន និង​ដៃគូ​ខាងក្រៅ កម្ពុជា​នឹង​ខិតខំ​ធានា​ឱ្យបាន​នូវ​ការផ្តល់​ផលប្រយោជន៍​ជាក់ស្តែង​ជូន​ប្រជាជន នៅក្នុង​តំបន់​ទាំងមូល​ដោយ​មិន​ទុក​អ្នកណាម្នាក់​ចោល​ឡើយ»។

លោកនាយក​រដ្ឋមន្ដ្រី​បញ្ជាក់ថា អាទិភាព​ចំពោះមុខ​របស់​អាស៊ាន​នៅពេលនេះ គឺ​ការធានា​ឱ្យបាន​នូវ​លទ្ធផល​ជាទី​គាប់ចិត្ត​បន្ថែមទៀត​ពី​កិច្ចខិតខំ​ប្រឹងប្រែង​របស់​អាស៊ាន ដើម្បី​ងើប​ចេញ​ឱ្យ​ផុតពី​វិបត្តិ​វីរុស​កូវីដ ១៩ ជាមួយ​នឹង​ភាពធន់​កាន់តែ​រឹងមាំ​ខ្លាំងក្លា។

លោក​បាន​បញ្ជាក់ថា៖ «ការងារ​បន្ទាន់​របស់​យើង គឺ​បន្ត​ពង្រឹង​កិច្ចសហប្រតិបត្តិការ​ក្នុង​ការអនុវត្ត​នូវ​វិធានការ​នានា ដែល​ស្ថិតក្រោម​យុទ្ធសាស្ត្រ​ទូលំទូលាយ​ទាំង ៥ នៃ​ក្របខ័ណ្ឌ​ស្ដារឡើងវិញ​គ្រប់​ជ្រុងជ្រោយ​របស់​អាស៊ាន​ដែល រួមមាន ទី១ ការពង្រឹង​ប្រព័ន្ធ​សុខាភិបាល ទី២ ការពង្រឹង​សន្តិសុខ​មនុស្សជាតិទី៣ ការពង្រីក​សក្តានុពល​នៃ​ទីផ្សារ​ក្នុង​តំបន់​អាស៊ាន និង​សមាហរណកម្ម​សេដ្ឋកិច្ច​កាន់តែ​ទូលំទូលាយ ទី៤ ការពន្លឿន​ផ្នែក​ព័ត៌មាន​ឌីជីថល​ប្រកបដោយ​បរិយាប័ន្ន និង​ទី៥ ការបោះ​ជំហាន​ឆ្ពោះទៅរក​អនាគត​ប្រកបដោយ​ចីរភាព និង​ភាពធន់​រឹងមាំ»។

លោកនាយក​រដ្ឋមន្ដ្រី​ថ្លែងថា កម្ពុជា​មាន​គោលបំណង​ជំរុញ​ដំណើរការ​កសាង​សហគមន៍​អាស៊ាន​ដោយ​ផ្តោតលើ​ការសម្រេច​ឱ្យបាន​នូវ​គោលដៅ និង​គំនិត​ផ្តួចផ្តើម​សំខាន់ៗ​ដែល​បាន​ឯកភាព​រួចហើយ ក្រោម​ផែនការ​លម្អិត​នៃ​សហគមន៍​ទាំង ៣ របស់​អាស៊ាន​នៅ​ឆ្នាំ ២០២៥ ក្នុងនោះ​រួមមាន​ផែនការមេ ស្តីពី​ការតភ្ជាប់​អាស៊ាន​ឆ្នាំ ២០២៥ និង​ផែនការ​ការងារ​ដំណាក់កាល​ទី ៤ នៃ​គំនិត​ផ្តួចផ្តើម​សម្រាប់​សមាហរណកម្ម​អាស៊ាន។

លោកនាយក​រដ្ឋមន្ដ្រី​ថ្លែងថា៖ «ខ្ញុំ​សង្ឃឹមថា​ពេលដែល​យើង​បង្ហូតទង់​អាស៊ាន​នៅថ្ងៃនេះ (ទិវា​អាស៊ាន ថ្ងៃទី ៨ ខែសីហា ឆ្នាំ ២០២១) គ្រប់គ្នា​នឹង​ចងចាំ​នូវ​ដំណើរ​ដ៏វែងឆ្ងាយ​ដែល​បាន​ឆ្លងកាត់​អស់​ពេល​ជាង​ពាក់កណ្ដាល​សតវត្សរ៍​កន្លង​មកនេះ និង​មាន​មោទនភាព​ក្នុងនាម​ជា​ប្រជាជន​អាស៊ាន​ចាប់តាំងពី​ការកកើត​អង្គការ​នេះ​មក»។

លោក​បាន​ថ្លែងថា៖ «នៅពេលដែល​យើង​បន្តដំណើរ​រួម​គា្ន​ទៅមុខ ខ្ញុំ​មាន​ជំនឿ​ជឿជាក់ថា អាស៊ាន​ត្រៀមលក្ខណៈ​បាន​យ៉ាង​ល្អ​ក្នុង​ការជម្នះ​រាល់​បញ្ហា​ប្រឈម​ដែល​មិន​ធ្លាប់មាន​ពីមុនមក​ ដើម្បី​គូសបញ្ជាក់​សាជាថ្មី​ថា យើង​មាន​ការប្ដេជ្ញាចិត្ត និង​សមត្ថភាព​ក្នុង​ការពង្រឹង និង​លើកកម្ពស់​សន្តិភាព ស្ថិរភាព សន្តិសុខ និង​វិបុលភាព​ក្នុង​តំបន់​សម្រាប់​សុខុមាលភាព​ប្រជាជន​របស់​យើង»៕

អត្ថបទគួរចាប់អារម្មណ៍