បន្ទាយមានជ័យៈ អាជ្ញាធរក្រុងប៉ោយប៉ែតសម្រេចផ្អាកការដ្ឋានសាងសង់អគារ ១ កន្លែង និងបន្តស្រាវជ្រាវពីលក្ខណៈបច្ចេកទេស បន្ទាប់ពីអគារដែលគ្រោងសាងសង់កម្ពស់ ៦ ជាន់ស្ថិតនៅចំណុចស្រះសួគ៌ ភូមិអូរជ្រៅ សង្កាត់ប៉ោយប៉ែត ខេត្តបន្ទាយមានជ័យ បានបាក់ប្លង់សេ នៅពេលកំពុងសាងសង់បានជាន់ទី ១ បណ្តាលឱ្យកម្មករមួយចំនួនរងរបួសក្នុងនោះមានម្នាក់របួសធ្ងន់។
ហេតុការណ៍បាក់រលំប្លង់សេអគារផ្ទះសំណាក់កម្ពស់ ៦ ជាន់ស្មើនឹង ៤ ល្វែងនេះ បានកើតឡើងនៅថ្ងៃទី ៧ ខែសីហា ឆ្នាំ ២០២១ ក្នុងពេលកម្មករប្រមាណ ២០ នាក់កំពុងដំណើរការចាក់ប្លង់សេជាន់ទី ១ ហើយបណ្តាលឱ្យរលំបាក់សង្កត់កម្មការិនីម្នាក់ ដែលស្ថិតនៅក្រោម និងកម្មករ ១ ចំនួនទៀតរបួសស្រាល។នេះបើតាមលោក ព្រំ ពិសិដ្ឋ អធិការរងក្រុងប៉ោយប៉ែតបានប្រាប់ភ្នំពេញប៉ុស្តិ៍កាលពីម្សិលមិញ។
លោក ព្រំ ពិសិដ្ឋ បានលើកឡើងទៀតថា មូលហេតុនៃបាក់រលំប្លង់សេនេះ អាចមកពីការសង់ខុសបច្ចេកទេស ដោយសារជន្ទល់ទម្រប្លង់សេវែងៗពេក ហើយយោលញ័រនៅពេលទ្រទម្ងន់ស៊ីម៉ងត៍ធ្ងន់ និងបុកពីរថយន្តក្រឡុកផងទើបបណ្តាលឱ្យបាក់រលំបែបនេះ។
លោកបន្តថា ដោយសារតែការដ្ឋានសំណង់នេះ មានគ្រោះថ្នាក់ដល់មនុស្ស ដូច្នេះអាជ្ញាធរក្រុងប៉ោយប៉ែតសម្រេចផ្អាកការដ្ឋាននេះបណ្តោះអាសន្ន ដើម្បីរង់ចាំនីតិវិធីស្រាវជ្រាវបន្ត និងអនុវត្តទៅតាមច្បាប់។
លោកបានបញ្ជាក់ថា៖ «កម្មករម្នាក់ដែលរងរបួស គឺជាស្ត្រីដែលគាត់នៅខាងក្រោមអគារ ហើយពេលបាក់រលំមក ក៏ត្រូវគាត់ ហើយចំណែកកម្មករ ២ ទៅ ៣ នាក់ផ្សេងទៀត គឺគ្រាន់តែរលាត់ដៃរលាត់ជើងបន្តិចបន្តួច។ ចំពោះកម្មករស្រី ដែលធ្ងន់ យើងបានបញ្ជូនបន្តទៅមន្ទីរពេទ្យខេត្តមិត្តភាពកម្ពុជា-ជប៉ុន មង្គលបុរី ដើម្បីបន្តពិនិត្យនិងថត ឆ្លុះ និងឃើញថា ជើងនាងមិនបាក់ទេ គ្រាន់តែរបួសគ្រាំខ្លាំងប៉ុណ្ណោះ»។
ជាមួយគ្នានេះ លោក ព្រំ ពិសិដ្ឋ បានឱ្យដឹងទៀតថា ចំពោះម្ចាស់សំណង់ដែលមានឈ្មោះថា យឹម គឹមអៀង ភេទប្រុស អាយុ ៤០ ឆ្នាំ ជនជាតិខ្មែរ មានលំនៅភូមិគីឡូម៉ែត្រលេខ ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ និងមេក្រុមម៉ៅការសំណង់ម្នាក់ត្រូវបានកោះហៅមកសាកសួរដើម្បីបន្តនីតិវិធីតែមិនបានឃាត់ខ្លួននោះទេ។ ចំពោះជនរងគ្រោះវិញ លោកបានឱ្យដឹងថា គឺមានឈ្មោះ នី ស្រីនិច អាយុ ១៩ ឆ្នាំ ជនជាតិខ្មែរ ស្នាក់នៅភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោក ឡុង វុធ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តបន្ទាយមានជ័យ បានប្រាប់ភ្នំពេញប៉ុស្តិ៍ កាលពីម្សិលមិញដែរថា តាមសំណើនៃគម្រោងដែលបានអនុញ្ញាតសាងសង់អគារនេះគឺសង់កម្ពស់តែ ២ ជាន់ប៉ុណ្ណោះ។ ក៏ប៉ុន្តែបន្ទាប់ពីក្រុមការងារចុះទៅដល់កើតហេតុនៅពេលនេះក្រុមបច្ចេកទេសកំពុងបន្តស្រាវជ្រាវរកមូលហេតុនៃការបាក់រលំប្លង់សេនេះ។
លោកបានបញ្ជាក់ថា៖ «ខ្ញុំមិនទាន់ឆ្លើយអ្វីបាននោះទេ តាមលក្ខណៈបច្ចេកទេស គេកំពុងសិក្សា ដែលមិនទាន់ដឹងពីមូលហេតុអ្វីច្បាស់។ យោងឯកសារសំណង់នោះមានច្បាប់អនុញ្ញាតសាងសង់ដែលស្នើត្រឹមការិយាល័យច្រកចេញ-ចូលតែមួយនៃសាលាក្រុងប៉ោយប៉ែត។ ករណីនេះបើរកឃើញកំហុសនឹងអនុវត្តទៅតាមច្បាប់»។
ហេតុការណ៍ស្រដៀងគ្នានេះដែរ កាលពីថ្ងៃទី ៨ សីហា ម្សិលមិញ ក៏មានករណីបាក់រលំប្លង់សេ ក្នុងអំឡុងពេលកំពុងចាក់បេតុង នៅចំណុចការដ្ឋានមួយដែលស្ថិតនៅក្នុងសង្កាត់ស្វាយដង្គំ ខេត្ត-ក្រុងសៀមរាប ខេត្តសៀមរាមផងដែរ។
លោក ដា ចំរើន អធិការរងនគរបាលក្រុងសៀមរាបបានប្រាប់ ភ្នំពេញ ប៉ុស្តិ៍ កាលពីរសៀលម្សិលមិញថា មន្ត្រីបានចុះទៅកន្លែងកើតហេតុ ហើយជំហានដំបូង គឺរកឃើញថា ហេតុការណ៍នេះមិនមានធ្វើឱ្យកម្មករណាម្នាក់រងរបួសនោះទេ។
លោកបានរៀបរាប់ថា៖ «ក្រុមការងារយើងបានសួរនាំបណ្តោះអាសន្នហើយ។ ជំហានដំបូង គឺមិនមានអ្នកណាម្នាក់របួសនោះទេ។ ការបាក់ការចាក់ប្លង់សេនេះ គឺមានលក្ខណៈទ្រេត ព្រោះតែចាប់ផ្តើមចាក់បេតុងទៅវាទ្រេត ដោយមិនមានបាក់ដល់ក្រោមនោះទេ»៕
វីដេអូ៖