.jpg)
ស្រ្តីម្នាក់ទទួលបានការចាក់វ៉ាក់សាំង AstraZeneca លើកទី១ កាលពីថ្ងៃទី ១០ ខែមីនា។ ហ៊ាន រង្សី
ភ្នំពេញៈ លោក ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជានៅថ្ងៃនេះបានអំពាវនាវឱ្យបញ្ឈប់ការស្នើសុំជាបន្តទៀតពីសំណាក់ស្ថាប័ន ឬអ្នកដែលចង់ស្នើសុំវ៉ាក់សាំង AstraZeneca ដើម្បីចាក់ដូសទី៣ ដោយរង់ចាំរាជរដ្ឋាភិបាល និងគណៈកម្មការចំពោះកិច្ចចាក់វ៉ាក់សាំងរៀបចំលើកិច្ចការងារនេះ។
លោកនាយករដ្ឋមន្រ្ដីបានឱ្យដឹងថា ក្នុងរយៈថ្មីៗ តែប៉ុន្មានថ្ងៃនេះ មានសំណូមពរជាច្រើនពីសំណាក់អស់លោក លោកស្រី ដែលបានចាក់វ៉ាក់សាំង AstraZeneca ស្នើសុំចាក់ AstraZeneca ដូសទី៣។
លោកនាយករដ្ឋមន្រ្ដីថ្លែថា៖ «បញ្ហានេះ ខ្ញុំសូមបញ្ជាក់ជូន ដើម្បីចៀសវាងការលំបាក ប្រទេសវាលំបាកណាស់ទៅហើយ កុំឱ្យវាលំបាក តាំងពីរឿងប៉ុណ្ណឹង»។
លោកនាយករដ្ឋមន្រ្ដីបញ្ជាក់ថា៖ «មានបញ្ហាចំនួន ២ ដែលយើងមិនទាន់អាចផ្ដល់ជូនបាន ហើយសូមស្នើឱ្យបញ្ឈប់ ការស្នើសុំ ជាបន្តទៀតពីសំណាក់ស្ថាប័នឬអ្នកដែលចង់ស្នើ»។
លោកនាយករដ្ឋមន្រ្ដី បានបញ្ជាក់ថា បញ្ហាទី១ គឺនៅមិនទាន់បានសិក្សា អំពីគម្លាត រវាងដូសទី១ ទី២ និងដូសទី៣ សម្រាប់អ្នកចាក់ វ៉ាក់សាំង AstraZeneca នោះទេ។ លោកថា ក្រសួងសុខាភិបាលបានសិក្សាតែពីគម្លាតរបស់វ៉ាក់សាំង ស៊ីណូហ្វាម និងស៊ីណូវ៉ាក់តែប៉ុណ្ណោះ ដែលអាចនឹងផ្ដល់ AstraZeneca សម្រាប់ការចាក់ដូសទី៣ឬជាដូសជំរុញ។ ប៉ុន្ដែសម្រាប់អ្នកចាក់ AstraZeneca វិញ គឺមិនទាន់បានសិក្សាពីគម្លាតរវាងដូសទី១ ដូសទី២ ហើយរាជរដ្ឋាភិបាលក៏ដូចជាក្រសួងសុខាភិបាលមិនទាន់បានកំណត់អំពីការចាក់សម្រាប់ធ្វើជាដូសជំរុញនេះផងដែរ។
ចំណុចទី២ គឺពុំមានវ៉ាក់សាំង AstraZeneca គ្រប់គ្រាន់ដើម្បីដំណើការចាក់នោះទេ។ ដូច្នេះអាចចាក់ជូនបានត្រឹមតែមន្រ្ដីជួរមុខ ដែលបានចាក់វ៉ាក់សាំង ស៊ីណូវ៉ាក់ និងស៊ីណូហ្វាម តែប៉ុណ្ណោះ ហើយចំនួននេះក៏វាមិនទាន់គ្រប់គ្រាន់នោះដែរ។
លោកនាយករដ្ឋមន្រ្ដីបញ្ជាក់ថា៖ «ខ្ញុំកំពុងតែបញ្ជាឱ្យគណៈកម្មការចំពោះកិច្ចចាក់វ៉ាក់សាំងកូវីដ ១៩ សម្រាប់ការធ្វើលទ្ធកម្មដើម្បីស្វះស្វែងរកនូវការទិញ AstraZeneca យកមកចាក់ជូនបងប្អូនដែលបានចាក់ AstraZeneca ដែលបានចាក់រួចមកហើយនេះ»៕
