មណ្ឌលគិរីៈ កម្លាំងសមត្ថកិច្ចនគរបាលក្រុងសែនមនោរម្យ ខេត្តមណ្ឌលគិរី កំពុងបន្តស្វែងរកចាប់ខ្លួន ជនប្រដាប់អាវុធម្នាក់ ដែលបានបាញ់ប្រហារ ទៅលើមន្ត្រីនគរបាលប៉ុស្តិ៍ស្ពានមានជ័យម្នាក់ឲ្យរងរបួស ដើម្បីកសាងសំណុំរឿងបញ្ជូនឡើងតុលាការ។
លោក កាន់ ពេញ អធិការក្រុងសែនមនោរម្យ បានប្រាប់ ភ្នំពេញ ប៉ុស្តិ៍ នៅថ្ងៃទី ៩ ខែសីហាថា កាលពីយប់ថ្ងៃទី ៤ ខែ សីហា ឆ្នាំ ២០២១ មានអំពើហឹង្សា ក្នុងគ្រួសារមួយ បានកើតឡើង នៅភូមិអូរស្ពាន សង្កាត់ស្ពានមានជ័យ។
ក្នុងអំឡុងពេលនោះ លោក អ៊ុន លាងអេង អាយុ ៣១ ឆ្នាំ នាយរងប៉ុស្តិ៍នគរបាលសង្កាត់ស្ពានមានជ័យ បានដឹកនាំកម្លាំងចុះទៅជួយអន្តរាគមន៍សម្របសម្រួល ដើម្បីបញ្ឈប់ករណីអំពើហឹង្សានោះ ប៉ុន្តែត្រូវបានជនបង្កម្នាក់ឈ្មោះរស់ ពុទ្ធាអាយុ ៤៦ ឆ្នាំ ដែលមានកាន់អាវុធខ្លីនៅក្នុងដៃ បាញ់ប្រហារចំលើគល់ដោះខាងឆ្វេង បណ្ដាលឲ្យរងរបួសធ្ងន់។
លោកបានថ្លែងថា៖ «ក្រោយបាញ់ប្រហារមកលើមន្ត្រីនគរបាលយើងឲ្យរងរបួស ជនបង្ក ក៏បានរត់គេចខ្លួនបាត់ទៅ។ ទោះយ៉ាងណា ករណីនេះ សមត្ថកិច្ចយើងមិននៅស្ងៀមនោះទេ គឺកំពុងស្រាវជ្រាវ និងតាមស្វែងរកចាប់ខ្លួនជនបង្ក ដើម្បីប្រគល់ឲ្យតុលាការផ្ដន្ទាទោសទៅតាមនីតិវិធីច្បាប់»។
បើតាមលោក កាន់ ពេញ មកទល់ពេលនេះ លោក លាងអេង កំពុងស្ថិតក្រោមការពិនិត្យព្យាបាលយ៉ាងយកចិត្តទុកដាក់ ពីក្រុមគ្រូពេទ្យជំនាញ នៃមន្ទីរពេទ្យកាល់ម៉ែត្រ ក្នុងរាជធានីភ្នំពេញនៅឡើយ ប៉ុន្តែបានផុតពីគ្រោះថ្នាក់ដល់អាយុជីវិតហើយ។
ជុំវិញករណីនេះ ភរិយាលោក លាងអេង គឺ អ្នកស្រី ឡៃ សុធា អាយុ ២៨ ឆ្នាំ បានប្រាប់ ភ្នំពេញ ប៉ុស្តិ៍ថា មកទល់ពេលនេះ ក្រុមគ្រូពេទ្យនៅមិនទាន់អនុញ្ញាតឲ្យគាត់ជាប្រពន្ធ និងក្រុមគ្រួសារសាច់ញាតិ បានចូលទៅសួរសុខទុក្ខ ឬក៏មើលថែប្ដីនោះទេ ព្រោះបារម្ភពីការឆ្លងរោគរាតត្បាតកូវីដ ១៩ បំលែងថ្មី Delta ដែលអាចបង្កជាបញ្ហាធ្ងន់ធ្ងរថែមទៀត ដល់ប្ដីរបស់គាត់ដែលទើបតែវះកាត់រួច និងកំពុងបន្តការព្យាបាល ដោយមានការចាក់បញ្ចូលឈាម និងការប្រើបំពង់ខ្យល់អុកស៊ីសែន ដើម្បីជំនួយដល់ផ្លូវដង្ហើមផងដែរ។
អ្នកស្រីបាននិយាយថា៖ «នៅពេលនេះ ប្ដីរបស់ខ្ញុំកំពុងស្ថិតនៅក្នុងបន្ទប់សង្គ្រោះបន្ទាន់នៅឡើយ ប៉ុន្តែក្រុមគ្រូពេទ្យបានប្រាប់ថា គាត់ត្រូវបានវះកាត់ និងឆ្លងផុតពីគ្រោះថ្នាក់ដល់អាយុជីវិតហើយ»។
ដោយបារម្ភពីសុវត្ថិភាពរបស់ប្ដីខ្លាំងពេក អ្នកស្រី សុធា បានប្រាប់ឲ្យដឹងទៀតថា មកទល់ពេលនេះ អ្នកស្រីមិនចាប់អារម្មណ៍ អំពីរឿងសមត្ថកិច្ចតាមចាប់ខ្លួនជនប្រដាប់អាវុធ ដែលបាញ់ប្ដីអ្នកស្រីបានឬមិនបាននោះទេ ហើយក៏មិនខ្វល់អំពីការប្ដឹងទាមទារសំណងអ្វីពីជនបង្កនោះដែរ អ្វីដែលអ្នកស្រីកំពុងចង់ដឹងបំផុតនោះ គឺអំពីស្ថានភាពនៃជំងឺរបស់ប្ដីអ្នកស្រីប៉ុណ្ណោះ។
អ្នកស្រីបានបញ្ជាក់ថា៖ «ខ្ញុំជឿលើសមត្ថកិច្ច នឹងមិនឲ្យជនដៃដល់នោះរួចខ្លួនទេ ដូច្នេះពេលនេះ ចាប់បានឬមិនទាន់ចាប់បានវាមិនសំខាន់ទេ ព្រោះសមត្ថកិច្ចគាត់មានវិធីធ្វើការរបស់គាត់ហើយ។ រឿងសំខាន់បំផុតសម្រាប់ខ្ញុំនៅពេលនេះ គឺ ប្ដីរបស់ខ្ញុំ បានផុតពីគ្រោះថ្នាក់ដល់ជីវិត និងរង់ចាំការអនុញ្ញាតពីគ្រូពេទ្យ ដើម្បីបាននៅកំដរមើថែទាំគាត់ដោយផ្ទាល់»៕