.jpg)
គ្រូពេទ្យកំពុងបូមវ៉ាក់សាំងបង្ការជំងឺកូវីដ ១៩ ដើម្បីចាក់ជូនពលរដ្ឋនៅថ្ងៃទី ៩ ខែសីហា។ ហេង ជីវ័ន
ភ្នំពេញៈ ក្រុមហ៊ុនឯកជនប្រមាណ ១០ ក្រុមហ៊ុន បានស្នើសុំសិទិ្ធនាំចូលវ៉ាក់សាំងបង្ការមេរោគកូវីដ ១៩ ដើម្បីចាក់ជូនដល់ប្រជាពលរដ្ឋ ខណៈគិតត្រឹមថ្ងៃទី ៨ ខែសីហា កម្ពុជាបានចាក់វ៉ាក់សាំងដល់ប្រជាពលរដ្ឋបានជាង ៨ លាននាក់ ឬស្មើនឹង ៥០,៩៥ ភាគរយ បើធៀបនឹងចំនួនប្រជាពលរដ្ឋ ១៦ លាននាក់។
លោក លឹម ហេង អនុប្រធានសភាពាណិជ្ជកម្មកម្ពុជាថ្លែងប្រាប់ ភ្នំពេញ ប៉ុស្ដិ៍ ពីម្សិលមិញថា តាមរយៈកិច្ចប្រជុំរវាងក្រសួងសុខាភិបាលជាមួយសភាពាណិជ្ជកម្មកម្ពុជា កាលពីថ្ងៃទី ២ ខែសីហា លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានឱ្យដឹងថា មានក្រុមហ៊ុនឯកជនប្រមាណ ១០ បានស្នើសុំនាំចូលទាំងឧបករណ៍ធ្វើតេស្តរហ័ស (Rapid Test) និងវ៉ាក់សាំង បង្ការមេរោគកូវីដ ១៩។
លោក លឹម ហេង បន្តថា៖ «យើងសង្ឃឹមថា ក្រសួងសុខាភិបាលនឹងអាចសម្រួលចុះបញ្ជីដល់ក្រុមហ៊ុនឯកជនកាន់តែឆាប់ដើម្បីនាំវ៉ាក់សាំងចូល។ ការនាំចូលវ៉ាក់សាំង និងឧបករណ៍តេស្ដរហ័សនេះបើវ៉ាក់សាំង និងឧបករណ៍តេស្ដរហ័សដែលជារបស់រដ្ឋប្រើ វិស័យឯកជននឹងនាំចូលផ្សេងមិនឱ្យដូចរបស់រដ្ឋនោះទេ»។
លោកបានឱ្យដឹងថា បើកាលណានាំចូលដូចរបស់រដ្ឋ ខ្លាចមានលក់ច្រឡំគ្នា ដោយសារខាងរដ្ឋ ខ្លាចលេចធ្លាយវ៉ាក់សាំងរបស់រដ្ឋ ទៅលក់នៅលើទីផ្សារ។ ខណៈរាជរដ្ឋាភិបាលនាំចូល និងបញ្ជាទិញវ៉ាក់សាំង គឺសម្រាប់ចាក់ដោយឥតគិតប្រាក់ដល់ពលរដ្ឋ ដូច្នេះមិនអាចយកទៅលក់លើទីផ្សារបានទេ។
បើតាមលោក លឹម ហេង សភាពាណិជ្ជកម្មបានស្នើសុំក្រសួងជួយអន្តរាគមន៍ដើម្បីកំណត់តម្លៃនៃការធ្វើតេស្ដ និងការចាក់វ៉ាក់សាំងបង្ការជំងឺកូវីដ ១៩ ឱ្យបានសមរម្យនៅលើទីផ្សារ។ ក្រសួងក៏ទទួលយកសំណើនេះ និងយល់ព្រមពិភាក្សារួមគ្នាលើការកំណត់តម្លៃឱ្យបានសមរម្យ។
លោកបញ្ជាក់ថា៖ «ពេលនេះយើងមិនទាន់អាចកំណត់តម្លៃនៃការធ្វើតេស្ដរហ័ស និងការចាក់វ៉ាក់សាំងបានទេ។ ប៉ុន្ដែគ្រាន់តែយើងដឹងថា ក្នុងពេលឆាប់ៗនេះនឹងមានក្រុមហ៊ុនឯកជនមួយចំនួននឹងអាចនាំវ៉ាក់សាំងបង្ការជំងឺកូវីដ ១៩ ចូលមកកម្ពុជា»។
លោកបន្តថា បើការនាំចូលវ៉ាក់សាំងមកបានច្រើនក្រុមហ៊ុនហើយនោះនឹងអាចសិក្សាកំណត់តម្លៃទាំងការធ្វើតេស្ដ និងការចាក់វ៉ាក់សាំងដើម្បីកំណត់តម្លៃសមរម្យមួយដែលអាចទទួលយកបានទាំងអស់គ្នា កុំឱ្យមានការដាក់តម្លៃលើសហួសហេតុពេកនាំឱ្យមានការលំបាកចំពោះប្រជាពលរដ្ឋ។
លោកបញ្ជាក់ថា៖ «ការស្នើសុំនាំចូលវ៉ាក់សាំងរបស់វិស័យឯកជននៃសភាពាណិជ្ជកម្មនេះ គឺដើម្បីចូលរួមជួយសម្រាលបន្ទុករបស់រដ្ឋ។ យើងមិនត្រឹមតែឧបត្ថម្ភថវិកាជាមួយរដ្ឋទេ ប៉ុន្ដែយើងធ្វើការនាំចូលវ៉ាក់សាំងទៀត ដើម្បីឱ្យអ្នកមានប្រាក់អាចមកទទួលសេវាឯកជន»។
លោក ម៉ម ប៊ុនហេង កាលពីថ្ងៃទី ២៧ ខែ កក្កដា ឆ្នាំ ២០២១ បានចេញលិខិតមួយអនុញ្ញាតឱ្យគ្រឹះស្ថានអាហរ័ណនីហរ័ណឱសថ ដែលទទួលបានការអនុញ្ញាតពីក្រសួងសុខាភិបាលអាចស្នើសុំនាំចូលវ៉ាក់សាំងកូវីដ ១៩ ដែលបានទទួលស្គាល់ ដោយអង្គការសុខភាពពិភពលោក (WHO) ដើម្បីចែកចាយបន្តទៅផ្នែកសេវាសុខាភិបាលឯកជនសម្រាប់ចាក់ជូនពលរដ្ឋ ក្នុងក្របខ័ណ្ឌទូទាំងប្រទេស។
យោងតាមរដ្ឋមន្ត្រីក្រសួងព័ត៌មានលោក ខៀវ កាញារីទ្ធ បានសរសេរលើហ្វេសប៊ុករបស់លោកកាលពីថ្ងៃទី ៤ ខែសីហា ថា មន្ទីរពេទ្យ Royal Phnom Penh បានទទួលសិទ្ធិអនុញ្ញាតឱ្យនាំចូល និងគ្រប់គ្រងវ៉ាក់សាំងប្រភេទ Pfizer Biontech ហើយនិង Moderna ពីសហរដ្ឋអាមេរិកដល់អ្នកដែលអាចមានលទ្ធភាពនឹងត្រូវការប្រភេទវ៉ាក់សាំងទាំងនេះ។ លោករដ្ឋមន្ដ្រីបានសរសេរបញ្ជាក់ថា អ្នកមានលទ្ធភាពហើយត្រូវការវ៉ាក់សាំងប្រភេទនេះគឺត្រូវបង់ប្រាក់សម្រាប់ការចាក់វ៉ាក់សាំងទាំងនេះ។
តាមរយៈបទបញ្ជារបស់លោកនាយករដ្ឋមន្ដ្រី ហ៊ុន សែន ទៅគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានសម្រេចឱ្យចាក់វ៉ាក់សាំងដូសទី៣ ឬដូសជំរុញដល់ក្រុមគ្រូពេទ្យ និងមន្ដ្រីជួរមុខ។ ខេត្ដជាប់ព្រំដែនកម្ពុជា-ថៃ ចំនួន ៧ កាលពីថ្ងៃទី ៨ ខែសីហា បានបើកយុទ្ធនាការចាក់វ៉ាក់សាំងបង្ការវីរុសកូវីដ ១៩ ប្រភេទ AstraZeneca ដូសទី៣ ដល់ក្រុមគ្រូពេទ្យ និងមន្ដ្រីជួរមុខ ដែលបានចាក់វ៉ាក់សាំងប្រភេទស៊ីណូហ្វាម និងស៊ីណូវ៉ាក់ចំនួន ២ ដូសរួចហើយ។
ចំណែកក្រសួងការពារជាតិនៅថ្ងៃទី ៩ ខែ សីហា ឆ្នាំ ២០២១ បានជូនដំណឹងស្តីពីការចាក់វ៉ាក់សាំងបង្ការជំងឺកូវីដ ១៩ ដូសទី៣ ជូនដល់កងទ័ព និងគ្រួសារកងទ័ពនៅក្នុងអង្គភាពរបស់ខ្លួន។
គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានឱ្យដឹងថា កំណើនអត្រាចាក់វ៉ាក់សាំងកូវីដ ១៩ នៅកម្ពុជា គិតត្រឹមថ្ងៃទី ៨ ខែ សីហា ឆ្នាំ ២០២១ មាន ៧៨,៧៣% ធៀបជាមួយចំនួនប្រជាជនគោលដៅ ១០ លាននាក់ និងលើកុមារ-យុវវ័យអាយុពី ១២ ឆ្នាំទៅក្រោម ១៨ ឆ្នាំមាន ១៤,១៩% ធៀបជាមួយនឹងប្រជាជនគោលដៅប្រមាណ ២ លាននាក់។
សរុបអ្នកដែលបានចាក់វ៉ាក់សាំងនៅកម្ពុជាបានជាង ៨ លាននាក់ ស្មើនឹង ៥០,៩០ ភាគរយ បើធៀបនឹងចំនួនប្រជាជនចំនួន ១៦ លាននាក់។ រាជរដ្ឋាភិបាលមានផែនការចាក់វ៉ាក់សាំងជូនប្រជាពលរដ្ឋទូទាំងប្រទេស ឱ្យបានជាង ៨០% នៃប្រជាពលរដ្ឋសរុបចំនួនប្រមាណជា ១៦ លាននាក់។
ក្រសួងសុខាភិបាលនៅថ្ងៃទី ៩ ខែសីហា ឆ្នាំនេះបានប្រកាសពីការរកឃើញអ្នកស្លាប់ដោយសារជំងឺកូវីដ ១៩ ចំនួន ២៣ នាក់បន្ថែមទៀត ខណៈរកឃើញអ្នកឆ្លងថ្មីចំនួន ៥០៨ នាក់ និងអ្នកជំងឺដែលបានព្យាបាលជាសះស្បើយថ្មីមានចំនួន ៦៦០ នាក់។ ក្រសួងសុខាភិបាលបានឱ្យដឹងថា ក្នុងចំណោមករណីឆ្លងថ្មី ៥០៨ នាក់នេះគឺមានករណីនាំចូលពីក្រៅប្រទេសចំនួន ១២១ នាក់ និងឆ្លងក្នុងសហគមន៍ចំនួន ៣៨៧ នាក់។
បើតាមក្រសួងសុខាភិបាលគិតត្រឹមព្រឹកថ្ងៃទី ៩ ខែ សីហា ឆ្នាំ ២០២១ កម្ពុជាបានរកឃើញអ្នកឆ្លងជំងឺកូវីដ ១៩ សរុបចំនួន ៨២ ៣៩៩ នាក់ ក្នុងនោះអ្នកជាសះស្បើយសរុបចំនួន ៧៦ ១៥៥ នាក់ និងអ្នកស្លាប់សរុបកើនឡើងដល់ចំនួន ១ ៥៨៥ នាក់៕
វីដេអូ៖
