កណ្ដាលៈ ប្រជាពលរដ្ឋរស់នៅក្នុងស្រុកពញាឮ ខេត្តកណ្តាលជិត ៨០ នាក់ បានឆ្លងជំងឺគ្រុនឈីក និងគ្រុនឈាមជាបន្តបន្ទាប់ ក៏ប៉ុន្តែមានអ្នកជំងឺជាច្រើនបានជាសះស្បើយ ខណៈដែលមន្ត្រីសុខាភិបាលបានអះអាងថា ការធ្លាក់ខ្លួនឈឺជាបន្តបន្ទាប់នេះ ដោយសារពលរដ្ឋរស់នៅដោយខ្វះការយកចិត្តទុកដាក់លើផ្នែកអនាម័យ។
លោក ថន សុវណ្ណា អភិបាលស្រុកពញាឮ បានប្រាប់ ភ្នំពេញ ប៉ុស្តិ៍ កាលពីម្សិលមិញថា ប្រជាពលរដ្ឋចំនួន ៧៨ នាក់ នៅក្នុងស្រុករបស់លោកបានឆ្លងជំងឺគ្រុនឈីក និងគ្រុនឈាមនេះជាបន្តបន្ទាប់ ចាប់តាំងពីខែកក្កដាមក។ ក៏ប៉ុន្តែដោយសារតែមានការយកចិត្តទុកដាក់ពីក្រុមគ្រូពេទ្យ អ្នកជំងឺទាំងនោះបានជាសះស្បើយត្រឡប់មកវិញជាបន្តបន្ទាប់ ដោយក្នុងនោះនៅសល់តែ ៦ នាក់ទៀតប៉ុណ្ណោះ ដែលពួកគាត់កំពុងបន្តសម្រាកព្យាបាលនៅមន្ទីរពេទ្យរដ្ឋ។
លោកបានរៀបរាប់ថា៖ «ពលរដ្ឋបានឆ្លងជំងឺនេះពីកន្លែងនោះម្នាក់ ២ នាក់ កន្លែងនេះម្នាក់ ២ នាក់ មិនមែនផ្ទុះក្នុងទ្រង់ទ្រាយធំនោះទេ ហើយក៏បានទៅព្យាបាលនៅមន្ទីរពេទ្យរដ្ឋ។ ក្រុមគ្រូពេទ្យយើងបានយកចិត្តទុកដាក់លើពួកគាត់ ហើយអាការជំងឺរបស់គាត់ ឃើញថាមិនអីទេមិនមានប៉ះពាល់ដល់អាយុជីវិតនោះទេ ហើយជាជិតអស់ដែរ»។
លោក គួយ ប៊ុនធឿន ប្រធានមន្ទីរសុខាភិបាលខេត្តកណ្តាលបានប្រាប់ ភ្នំពេញ ប៉ុស្តិ៍ ដែរថា តាមការសង្កេត ការឆ្លងរបស់ប្រជាពលរដ្ឋនៅក្នុងស្រុកពញាឮ គឺមិនមែនជាការផ្ទុះជំងឺគ្រុនឈីក និងគ្រុនឈាម ក្នុងលក្ខណៈទ្រង់ទ្រាយធំនោះទេ។ ក៏ប៉ុន្តែនេះគ្រាន់តែជាការឆ្លងជំងឺពីមនុស្សម្នាក់ទៅម្នាក់ទៀត ដោយសារតែការខ្វះអនាម័យ ស្របពេលក្នុងរដូវនេះគឺជារដូវភ្លៀងផង ដែលធ្វើឱ្យមូសដែលជាភ្នាក់ងារចម្លងជំងឺបានកកើតឡើងច្រើន។
លោកបានបន្តថា បន្ទាប់ពីទទួលបានព័ត៌មាននៃការឆ្លងជំងឺនេះដល់អ្នកស្រុករួចមក មន្ត្រីសុខាភិបាលបានចុះទៅបាញ់ថ្នាំសម្លាប់សត្វមូស និងដាក់ថ្នាំអាលបែតនៅតាមផ្ទះរបស់ប្រជាពលរដ្ឋដែលជាកន្លែងកើតមានជំងឺទាំងនោះរួចហើយ។ លោក អះអាងថា ក្នុងនោះមន្ត្រីក៏បានអប់រំណែនាំប្រជាពលរដ្ឋឱ្យរក្សាអនាម័យ និងត្រូវគេងក្នុងមុងជានិច្ច និងមិនត្រូវបណ្តែតបណ្តាយឱ្យភ្នាក់ងារចម្លង ដែលជាមូសនេះខាំនោះទេ។
លោកបានបញ្ជាក់ថា៖ «ដោយសារតែវាជារដូវភ្លៀង យើងបានឱ្យមន្ត្រីយើង ចុះអប់រំផ្សព្វផ្សាយ និងដាក់ថ្នាំអាលបែតហើយ។ យើងអំពាវនាវដល់ពលរដ្ឋឱ្យចូលរួមបំបាត់ជម្រកមូស ហើយកុំឱ្យជុំវិញផ្ទះគាត់ មានដក់ទឹកអីណា ព្រោះវាជាប្រភពនៃការបង្កើតភ្នាក់ងារចម្លង»។
កាលពីចុងសប្តាហ៍ លោក គង់ សោភ័ណ្ឌ អភិបាលខេត្តកណ្តាលបានដឹកនាំក្រុមការងារចុះជួបសំណេះសំណាលជាមួយពលរដ្ឋដែលជាសះស្បើយពីជំងឺគ្រុនឈីកជាង ៧០ នាក់ នៅក្នុងវិទ្យាល័យ ហ៊ុន សែន ទេពប្រណម ស្ថិតនៅឃុំវិហារហ្លួង ស្រុកពញាឮ។
ក្នុងពេលចុះជួបសំណេះសំណាលនោះ លោកអភិបាលខេត្តក៏បានផ្ដាំផ្ញើដល់ពលរដ្ឋទាំងអស់ត្រូវមានការប្រុងប្រយ័ត្នជុំវិញជំងឺគ្រុនឈាម គ្រុនឈីក ពិសេសគឺកូវីដ ១៩ ដែលបញ្ហាទាំងអស់នេះតោងឱ្យពលរដ្ឋយើងចាំបាច់ត្រូវមានការរស់នៅស្អាត អនុវត្តវិធានការ «៣ ការពារ និង ៣ កុំ» ឱ្យមានប្រសិទ្ធភាព។
ជាមួយនោះលោកអភិបាលខេត្តក៏បានចេញបញ្ជាឱ្យមន្ត្រីសុខាភិបាលខេត្តកណ្ដាលបាញ់ថ្នាំសម្លាប់មេរោគ សម្លាប់ដង្កូវទឹកដែលជាភ្នាក់ងារចម្លងជំងឺគ្រុនឈីក និងគ្រុនឈាមនៅឃុំវិហារហ្លួងឱ្យបានគ្រប់ច្រកល្ហកផងដែរ ដោយធ្វើយ៉ាងណាកម្ចាត់ប្រភពចម្លងជំងឺនេះឱ្យអស់៕