កំពង់ឆ្នាំងៈ ប្រជាពុទ្ធបរិស័ទជាង ២០០ នាក់នៅក្នុងភូមិសិរី ឃុំខុនរ៉ង ស្រុកបរិបូណ៌ បានប្រមូលគ្នាតវ៉ានៅវត្តអង្គសិរី ដើម្បីទាមទារសុំឱ្យអាជ្ញាធរជួយអន្តរាគមន៍បណ្ដេញព្រះចៅអធិការវត្តស្ដីទី ព្រះនាម ប៊ូ ច័ន្ទមុន្នី ចេញពីវត្តដោយចោទប្រកាន់ព្រះអង្គថា បានប្រព្រឹត្តកំហុសឆ្គងជាច្រើន ដែលធ្វើឱ្យអាប់ឱនដល់វិស័យព្រះពុទ្ធសាសនា។ ប៉ុន្តែខាងមន្ត្រីសង្ឃថា ជាការចោទប្រកាន់ខុស។
លោក គឹម សុផាត នាយនគរបាល-ប៉ុស្តិ៍ឃុំខុនរ៉ង បានប្រាប់ ភ្នំពេញ ប៉ុស្តិ៍ នៅថ្ងៃទី ៨ ខែសីហា ថា ក្នុងរយៈពេលជាង ១ ឆ្នាំមកនេះ ប្រជាពុទ្ធបរិស័ទ ហាក់ដូចជាមិនពេញចិត្ត ចំពោះព្រះចៅអធិការស្តីទីវត្តអង្គសិរី ព្រះនាម ប៊ូ ច័ន្ទមុន្នី នោះទេ។ ពួកគេបានបង្កើតអធិករជាច្រើនជាមួយព្រះអង្គ ដោយចោទប្រកាន់ព្រះអង្គថា កិបកេងបច្ច័យបុណ្យភ្ជុំបិណ្ឌ បុណ្យចូលឆ្នាំ បុណ្យកឋិនបុណ្យផ្កា ដែលពុទ្ធបរិស័ទ បានចូលបុណ្យសម្រាប់ការកសាងនៅក្នុងវត្តទៅទុកចាយវាយផ្ទាល់ខ្លួន។ ប៉ុន្តែព្រះអង្គបានបដិសេធដោយអះអាងថា ព្រះអង្គទទួលតែបច្ច័យ ដែលពុទ្ធបរិស័ទ ប្រគេនព្រះអង្គសម្រាប់ពិធីបង្សុកូលប៉ុណ្ណោះ។
លោក សុផាត បន្តថា៖ «ក្រុមអ្នកភូមិក៏បានចោទប្រកាន់ព្រះអង្គថា បានរើសអើង ដោយមិននិមន្តទៅចូលរួមពិធីសូត្រមន្ត នៅផ្ទះគ្រួសារក្រីក្រទេ ដោយរកលេសជាប់រវល់កម្មវិធីនេះ កម្មវិធីនោះ។ ជាពិសេសបានទទួលស្រោចទឹក អ្នកដែលមានជំនឿលើមន្តអាគមអូមអាម បង្កការប្រមូលផ្ដុំល្មើសនឹងបម្រាមរបស់ក្រសួងសុខាភិបាល»។
បើតាមលោក សុផាត ក្រុមអ្នកភូមិបានអះអាងថា ពួកគេនឹងមិនចូលរួមធ្វើបុណ្យនៅក្នុងវត្តអង្គសិរីទៀតឡើយ ប្រសិនបើ អាជ្ញាធរពាក់ព័ន្ធមិនអាចរកដំណោះស្រាយ បណ្ដេញព្រះចៅអធិការស្តីទីវត្តអង្គសិរី ព្រះនាម ប៊ូ ច័ន្ទមុន្នី ចេញពីវត្តនេះទេនោះ។
ជុំវិញករណីនេះ លោក ថោង មាឃ ប្រធានការិយាល័យសង្គមកិច្ច និង សុខុមាលភាពសង្គម ស្រុកបរិបូណ៌បានប្រាប់ ភ្នំពេញ ប៉ុស្តិ៍ថា ករណីអធិកររវាងប្រជាពុទ្ធបរិស័ទ និងព្រះចៅអធិការវត្តអង្គសិរីស្ដីទីខាងលើនេះ បានកើតឡើងជាង ១ ឆ្នាំមកហើយ។ ប៉ុន្តែនៅពេលអាជ្ញាធរកោះហៅមកសាកសួរ ដើម្បីរកដំណោះស្រាយ បែរជាក្រុមអ្នកភូមិមិនចូលរួម ហើយដាក់បន្ទុកមកលើ អាជ្ញាធរជំនាញ និងគណៈសង្ឃទៅវិញ។
លោក មាឃ បញ្ជាក់ថា៖ «កាលពីថ្ងៃទី ៧ ខែ សីហា ឆ្នាំ ២០២១ ស្រាប់តែក្រុមអ្នកភូមិបានអធិករមកលើព្រះតេជគុណ ប៊ូ ច័ន្ទមុន្នី ជាថ្មីម្ដងទៀត ដោយព្រមានថា ពួកគេនឹងមិនចូលរួមដាក់បាត្រ ឬនាំចង្ហាន់មកប្រគេនដល់ព្រះសង្ឃនៅក្នុងវត្តនេះទេ ប្រសិនបើនៅមានវត្តមានព្រះតេជគុណ ប៊ូ ច័ន្ទមុន្នី នៅក្នុងវត្តអង្គសិរីទៀត»។
ការតវ៉ាលើកនេះ ក្រុមអ្នកភូមិបានចាប់យកព្រះសង្ឃជាច្រើនទៀត មកធ្វើជាចំណាប់ខ្មាំង ដើម្បីដាក់សម្ពាធទៅលើ ព្រះតេជគុណ ប៊ូ ច័ន្ទមុន្នី ដើម្បីឱ្យព្រះអង្គសម្រេចព្រះទ័យ និមន្តចាកចេញពីវត្ត ដោយអង្គឯង។ ប៉ុន្តែ អ្វីដែលអ្នកភូមិបានធ្វើ «កំពុងតែជឿលង់ ទៅលើផ្លូវខុស រកផ្លូវទៅនរកដោយមិនដឹងខ្លួន»។ នេះបើតាមព្រះសង្ឃដីការបស់ព្រះតេជគុណ អៀង រឿន ព្រះអនុគណស្រុកបរិបូណ៌។
ព្រះអង្គមានព្រះថេរដីកាថា កាលពី ៥ ឆ្នាំមុនទាំងអាជ្ញាធរមូលដ្ឋាន និង គណៈកម្មការអាចារ្យវត្តអង្គសិរីបាននាំគ្នាដង្ហែ ព្រះតេជគុណ ប៊ូ ច័ន្ទមុន្នី ពីវត្តត្រពាំងចាន់ឱ្យមកគង្គនៅវត្តអង្គសិរី ដោយមិនបានស្នើសុំការអុញ្ញាតពីអាត្មា ដែលជាអនុគណស្រុកផង ព្រោះពេលនោះ គេយល់ថា គេនឹងបានប្រយោជន៍ពីព្រះតេជគុណ ប៊ូ ច័ន្ទមុន្នី ព្រោះព្រះអង្គចេះស្រោចទឹក ធ្វើយ័ន្ត និងធ្វើខ្សែគាថា។ នៅឆ្នាំដំបូងលោកបានកសាងកុដិ និងជួសជុលសាលាឆាន់ និងដឹកនាំធ្វើការសម្អាតបរិស្ថានក្នុងទីធ្លាវត្តបានល្អ រហូតមានការតែងតាំងជាព្រះចៅអធិការស្ដីទីក៏ស្រាប់តែមានអធិករកើតឡើងតែម្ដង។
ព្រះអង្គមានសង្ឃដីកាបញ្ជាក់ថា៖ «នៅព្រឹកថ្ងៃទី ៨ សីហា អាត្មាត្រូវបានព្រះមេគណចាត់តាំងឱ្យកោះមកដោះស្រាយបញ្ចប់វិវាទនេះ ប៉ុន្តែអ្នកភូមិមិនអញ្ជើញមកទេ គឺមានតែព្រះតេជគុណ ប៊ូ ច័ន្ទមុន្នី បានចូលមកដោះស្រាយ ហើយព្រះអង្គថានឹងមិននិមន្តទៅណានោះទេ ព្រោះព្រះអង្គគ្មានកំហុសឡើយ និងសុំឱ្យអាត្មា និងអាជ្ញាធរពាក់ព័ន្ធជួយផ្ដល់យុត្តិធម៌សម្រាប់ព្រះអង្គ។ យ៉ាងណាក៏ដោយករណីនេះអាត្មាបានធ្វើកំណត់ហេតុបញ្ជូនទៅព្រះមេគណខេត្តហើយ»៕
វីដេអូ៖