ភ្នំពេញៈ មន្ត្រីប្រចាំការនៅតាមស្ថានីយជញ្ជីងថ្លឹងជិត ៣០ គោលដៅនៅទូទាំងប្រទេស អនុវត្តយុទ្ធនាការផ្សព្វផ្សាយអប់រំណែនាំច្បាប់ស្តីពីផ្លូវថ្នល់នៃមាត្រា ២៦ មាត្រា ៦០ និងវិធានការតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ ដែលដឹកថ្ម ខ្សាច់ និងដីលើសទម្ងន់កម្រិតកំណត់។
ការអនុវត្តយុទ្ធនាការនេះ ធ្វើឡើងបន្ទាប់ពីក្រុមអ្នកបើកឡាន និងម្ចាស់ឡានធុនធ្ងន់ បានអះអាងថា ពួកគេមិនទាន់បានយល់ដឹងអំពីច្បាប់ និងការអនុវត្តវិធានការទាំងនេះឱ្យបានទូលំទូលាយ។
លោក តាំង ពៅ ប្រធានលេខាធិការដ្ឋាននៃក្រសួងសាធារណការ និងដឹកជញ្ជូនបានប្រាប់ ភ្នំពេញ ប៉ុស្តិ៍ នៅថ្ងៃទី ៩ សីហា ថា មុននឹងឈានទៅអនុវត្តច្បាប់ស្តីពីផ្លូវថ្នល់នៃមាត្រា ២៦ មាត្រា ៦០ និងវិធានការតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ ក្រសួងបានចុះអប់រំផ្សព្វផ្សាយយ៉ាងទូលំទូលាយទៅដល់សាធារណជនជាក្រុមអ្នកបើកបរ និងសាធារណជន។
ប៉ុន្តែលោកថា នៅពេលសមត្ថកិច្ច អនុវត្តវិធានការតឹងរ៉ឹង បែរជាពួកគេស្រែកថា មិនបានយល់ដឹងច្បាប់ទៅវិញ។ ដូច្នេះ លោកអះអាងថា ផ្អែកតាមគោលការណ៍ផ្សព្វផ្សាយ អប់រំណែនាំច្បាប់ ក្រសួងបានដាក់ចេញយុទ្ធនាការបន្ថែមទៀត អមជាមួយនឹងការអនុវត្តច្បាប់នៅកន្លែងថ្លឹងរថយន្តទាំងជិត ៣០ កន្លែង ទូទាំងប្រទេសគឺឱ្យមន្ត្រីបច្ចេកទេសតាមស្ថានីយបន្តអប់រំណែនាំដល់អ្នកបើកបរដោយផ្ទាល់។
លោកបានរៀបរាប់ថា៖ «យើង អប់រំពួកគាត់ ភ្ជាប់ជាមួយនឹងការអនុវត្តច្បាប់តែម្តង កុំឱ្យពួកគាត់ ចេះតែរិះគន់ ថា គាត់មិនសូវបានដឹង។ យុទ្ធនាការនេះគឺចុះផ្សព្វផ្សាយតាមរយៈអ្នកបើកបររថយន្តធុនធំហ្នឹងទាំងអស់ ហើយចាប់ផ្តើមសកម្មភាពចុះអប់រំ ផ្សព្វផ្សាយនេះចាប់ពីដើមខែសីហាតទៅ»។
បើតាមលោក តាំង ពៅ គិតចាប់ពីក្រសួងសាធារណការ និងដឹកជញ្ជូន អនុវត្តវិធានការតឹងរ៉ឹងក្នុងការបង្ក្រាបរថយន្តល្មើសនឹងការដឹកលើសទម្ងន់កម្រិតកំណត់ រយៈពេលជាង ១ ឆ្នាំនេះ គឺមានរថយន្តធុនធ្ងន់ចំនួន ១៧៧ គ្រឿង ត្រូវបានឃាត់ទុករយៈពេល ១ ឆ្នាំ និងផាកពិន័យជាអន្តរកាល។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិបានថ្លែងថា ការអប់រំផ្សព្វផ្សាយច្បាប់ឱ្យបានទូលំទូលាយច្បាស់ណាស់ គឺត្រូវធ្វើឡើងជាប្រចាំ ទាំងមុនពេល ក្នុងអំឡុងពេល និងក្រោយពេលអនុវត្តច្បាប់។ លោកបានបន្តថា ការអប់រំផ្សព្វផ្សាយនេះគឺត្រូវតែធ្វើឡើងរហូតទាល់តែក្រុមគោលដៅទាំងនោះ ទទួលបានសារ និងចូលរួមគោរពអនុវត្តច្បាប់ទាំងអស់គ្នា។
លោកបានសង្កត់ធ្ងន់ថា៖ «សង្ឃឹមថា ការយោគយល់របស់ក្រសួងក្នុងពេលនេះ គឺជាយោគយល់លើកចុងក្រោយ ព្រោះបើក្នុងន័យបច្ចេកទេស គឺក្នុងករណីមានការតវ៉ាបាន មានការយោគយល់ច្រើន គឺថាការអនុវត្តច្បាប់ហ្នឹង វាមានភាពកម្សោយ។ សង្ឃឹមថា ខាងអាជីវករ និងអ្នកបើកបរធុនធ្ងន់នោះ មិនថាដឹកដែក ដឹកខ្សាច់ អីហ្នឹងឱ្យតែលើសទម្ងន់ នឹងមានការសហការជាមួយក្រសួង និងការប្តេជ្ញាចូលរួមទាំងអស់»។
តាមទំព័រហ្វេសប៊ុករបស់ក្រសួងសាធារណការ និងដឹកជញ្ជូនបានឱ្យដឹងថា ក្នុងមាត្រា ៦០ នៃច្បាប់ស្តីពីផ្លូវថ្នល់បានចែងថា រាល់យានយន្តដែលដឹកលើសទម្ងន់ចាប់ពី ២០% នៃទម្ងន់អនុញ្ញាតត្រូវពិន័យអន្តរការណ៍ជាប្រាក់ រើទំនិញចេញ និងឃាត់យានយន្តទុករយៈពេល ១ ឆ្នាំ។
ដូចនេះលោក តាំង ពៅ បានលើកឡើងថា៖ «សូមម្ចាស់យានយន្តទាំងអស់ត្រូវដឹងអំពីទម្ងន់ផ្ទុកអនុញ្ញាតនៃប្រភេទយានយន្តរបស់ខ្លួនចៀសវាងផ្ទុកលើសទម្ងន់កម្រិតកំណត់ដែលនាំឱ្យខាតបង់ថវិកា និងពេលវេលារកស៊ីរបស់ខ្លួន។ សូមអំពាវនាវចំពោះក្រុមហ៊ុន និងឯកជនដែលប្រកបអាជីវកម្មផ្នែកដឹកជញ្ជូនតាមរថយន្តធុនធ្ងន់ទាំងអស់ចូលរួមគោរពច្បាប់ទាំងអស់គ្នា»៕