កណ្ដាលៈ តុលាការខេត្តកណ្តាលកាលពីថ្ងៃទី ៨ សីហា បានសម្រេចឃុំខ្លួនប្តីប្រពន្ធក្នុងពន្ធនាគារខេត្ត បន្ទាប់ពីសមត្ថកិច្ចឃាត់ខ្លួនបាន ២ ថ្ងៃ នៅភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្ដាល ពាក់ព័ន្ធនឹងករណីបង្ខាំងមនុស្សខុសច្បាប់។
លោក ឡាក់ ម៉េងធី នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្តាលប្រាប់ ភ្នំពេញ ប៉ុស្ដិ៍ កាលពីម្សិលមិញថា ជនត្រូវចោទ ឈ្មោះ ស៊ឹម វិរៈ ភេទប្រុស អាយុ ៣៧ ឆ្នាំ មានរបរជាជាងដែក និងប្រពន្ធឈ្មោះ ថន សោរ អាយុ ៣៧ ឆ្នាំ ជាកសិកររស់នៅភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្ដាល ត្រូវបានចៅក្រមស៊ើបសួរចេញដីកាឃុំក្នុងពន្ធនាគារហើយ។
លោកថ្លែងថា៖ «តុលាការបានជូនដំណឹងមកការិយាល័យខ្ញុំ។ ពួកគេត្រូវបានឃុំខ្លួនពីល្ងាចម្សិលមិញ (ថ្ងៃទី ៨ សីហា) ពាក់ព័ន្ធបទបង្ខាំងមនុស្សខុសច្បាប់»។
ពាក់ព័ន្ធអង្គហេតុនៃការឃុំខ្លួន ២ នាក់ប្តីប្រពន្ធនេះ ភ្នំពេញ ប៉ុស្ដិ៍ មិនអាចទាក់ទង លោក ឯក លន់ អធិការនគរបាលស្រុកមុខកំពូល ដើម្បីសុំការបញ្ជាក់បានទេ កាលពីម្សិលមិញ។
ក៏ប៉ុន្តែបើតាមកំណត់ហេតុរបស់អធិការដ្ឋាននគរបាលស្រុកមុខកំពូល ដែល ភ្នំពេញ ប៉ុស្តិ៍ ទទួលបានកាលពីម្សិលមិញបានបង្ហាញថា ជនត្រូវចោទទាំង ២ នាក់ ត្រូវបានសមត្ថកិច្ចឃាត់ខ្លួននៅម៉ោងប្រមាណ ៩ យប់ថ្ងៃទី ៦ សីហា នៅផ្ទះរបស់ពួកគេក្នុងភូមិអន្លង់ស្លែង ឃុំសំបួរមាស ស្រុកមុខកំពូលខេត្តកណ្ដាល។
កំណត់ហេតុបានឱ្យដឹងថា ជនរងគ្រោះឈ្មោះ ផាត ប៊ុនធឿន ភេទប្រុស អាយុ ២៤ ឆ្នាំ មានលំនៅក្នុងភូមិស្វាយចេក ឃុំព្រៃឈរ ស្រុកកំពង់ត្របែក ខេត្តព្រៃវែង ។ ជនរងគ្រោះបានមកសុំប្តីប្រពន្ធខាងលើធ្វើជាកម្មករផ្សារដែក។
បើតាមកំណត់ហេតុដដែល ការរស់នៅធ្វើជាកម្មករជាមួយប្តីប្រពន្ធខាងលើអស់ពេលប្រមាណ ២ ខែមុនថ្ងៃកើតហេតុ គឺជនរងគ្រោះមិនទទួលបានប្រាក់ឈ្នួលទេ ដោយជនត្រូវចោទបានលើកហេតុផលថាពួកគេបានចំណាយលើការហូបចុកប្រចាំថ្ងៃសម្រាប់ជនរងគ្រោះជំនួសប្រាក់ខែអស់ហើយ។
កំណត់ហេតុបានបង្ហាញទៀតថា នៅមុនពេលកើតហេតុនាថ្ងៃទី ៦ សីហា ដោយសារតូចចិត្តពេក ជនរងគ្រោះបានទិញស្រាថ្នាំមកផឹកតែម្នាក់ឯងនៅផ្ទះប្តីប្រពន្ធនោះ រហូតដល់វេលាម៉ោងប្រហែល ៩ យប់។
ពេលនោះជនរងគ្រោះស្រវឹងស្រា និងបានស្រែកឡូឡាទាំងយប់ ហើយជនត្រូវចោទបានឃាត់ តែជនរងគ្រោះមិនព្រមស្តាប់តាម។
កំណត់ហេតុបន្តទៀតថា ដោយឃាត់មិនស្តាប់ ទាំង ២ នាក់ប្ដីប្រពន្ធក៏បានចាប់ជនរងគ្រោះ និងយកខ្សែគោប្រវែងប្រហែល ២ ម៉ែត្រចងជនរងគ្រោះភ្ជាប់នឹងសសរផ្ទះ។ ពេលនោះអ្នកជិតខាងឃើញក៏រាយការណ៍ប្តឹងនគរបាលប៉ុស្តិ៍ឃុំសំបួរមាសចុះមកឃាត់ខ្លួនតែម្តង។
នៅចំពោះមុខសមត្ថកិច្ចទាំង ២ នាក់ប្ដីប្រពន្ធ នោះបានសារភាពថា ពួកគេពិតជាបានយកខ្សែនីឡុងពណ៌សចងជនរងគ្រោះភ្ជាប់នឹងសសរផ្ទះរបស់ខ្លួនពិតប្រាកដមែន៕