.jpg)
ក្រសួងណែនាំឱ្យស្ថាប័នរដ្ឋ និងក្រុមហ៊ុនឯកជន ត្រូវធ្វើតេស្តរកមេរោគកូវីដ ១៩ ជាប្រចាំទៅលើមន្ត្រី និងបុគ្គលិក ដើម្បីរួមចំណែកដល់ការកាត់បន្ថយការរីករាលដាលនៃជំងឺកូវីដ ១៩។ ហុង មិនា
ភ្នំពេញ៖ ក្រសួងសុខាភិបាលចេញសារាចរណែនាំចំនួន ៧ ចំណុចដល់ក្រសួង ស្ថាប័នរដ្ឋ រដ្ឋបាលរាជធានី-ខេត្ត និងអង្គភាពពាក់ព័ន្ធ ដើម្បីរួមចំណែកដល់ការកាត់បន្ថយការរីករាលដាលនៃជំងឺកូវីដ ១៩។ ក្នុងសារាចរនេះ ក៏បានណែនាំឱ្យក្រុមហ៊ុនឯកជន រោងចក្រ សហគ្រាស ត្រូវធ្វើតេស្តរកមេរោគកូវីដ ១៩ ជាប្រចាំទៅលើមន្ត្រី និងបុគ្គលិករបស់ខ្លួនផងដែរ។
នេះបើយោងតាមសារាចរណែនាំស្ដីពីវិធានការនៃការរួមចំណែកកាត់បន្ថយការរីករាលដាលនៃជំងឺកូវីដ ១៩ ចុះហត្ថលេខាដោយលោក ម៉ម ប៊ុនហេង រដ្ឋមន្រ្ដីក្រសួងសុខាភិបាល និងជាប្រធានគណៈកម្មការប្រតិបត្ដិនៃគណៈកម្មការអន្តរក្រសួងដើម្បីប្រយុទ្ធប្រឆាំងនឹងជំងឺកូវីដ ១៩ នៅថ្ងៃទី ១០ ខែសីហា។
សារាចរណែនាំនេះក៏យោងតាមចំណារចុះថ្ងៃទី ៦ ខែ សីហា ឆ្នាំ ២០២១ របស់លោក អូន ព័ន្ធមុនីរ័ត្ន រដ្ឋមន្រ្ដីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈប្រចាំការនៃគណៈកម្មការជាតិប្រយុទ្ធនឹងជំងឺកូវីដ ១៩។
ក្រសួងសុខាភិបាលបានធ្វើការណែនាំតាមរយៈសារាចរនេះ រួមមាន ទី១ ស្ថាប័នរដ្ឋ ក្រុមហ៊ុន សហគ្រាស រោងចក្រ និងទីតាំងដែលមានអង្គការចាត់តាំង ត្រូវធ្វើតេស្ត ជាប្រចាំទៅលើមន្ត្រី និងបុគ្គលិករបស់ខ្លួន ដោយក្រសួងប្រៃសណីយ៍ និងទូរគមនាគមន៍ បន្តចែកចាយឧបករណ៍តេស្តរហ័សក្នុងតម្លៃដើម។
២ តំបន់ដែលមានផ្ទុះជំងឺកូវីដ ១៩ ជាតំបន់បិទខ្ទប់ ត្រូវបានកំណត់ធ្វើការវាយតម្លៃលើប្រជាពលរដ្ឋ ដែលមានការពាក់ព័ន្ធ និងធ្វើតេស្តរហ័ស ឬតេស្ដ PCR ស្របតាមបទដ្ឋានបច្ចេកទេសសុខភិបាល។
៣ កន្លែងយកសំណាកសាធារណៈដោយមន្ត្រីសុខាភិបាលមូលដ្ឋាន ឬក្រុមអ្នកស្ម័គ្រចិត្តសម្រាប់ ប្រជាពលរដ្ឋមិនមានលទ្ធភាពទិញឧបករណ៍តេស្ដរហ័ស ត្រូវរៀបចំនៅតាមស្រុក ខណ្ឌ ឬឃុំ សង្កាត់។
ឧបករណ៍តេស្តរហ័សអង់ទីហ្សែនកូវីដ ១៩ រហ័ស។ ហុង មិនា
៤ ក្រសួងប្រៃសណីយ៍ និងទូរគមនាគមន៍ បន្តលក់ឧបករណ៍តេស្ដ ២ ខែទៀត ដើម្បីធ្វើឱ្យមានភាពសម្បូរ និងបន្សំទៅនឹងតម្លៃទីផ្សារ។ បន្ទាប់មកក្រសួងនឹងធ្វើការងារនេះ ឱ្យទៅអង្គភាពណាមួយទទួលខុសត្រូវ ឬទុកលទ្ធភាពឱ្យក្រុមហ៊ុនអាជីវកម្មក្នុងតម្លៃសមស្រប។
៥ មន្ទីរពេទ្យឯកជន និងគ្លីនីកទាំងអស់ ត្រូវផ្តល់សេវាធ្វើតេស្តរហ័សដល់ប្រជាពលរដ្ឋក្នុងតម្លៃទាបសមស្រប ដោយប្រើប្រាស់ឧបករណ៍តេស្ដរហ័សដែលទទួលស្គាល់ដោយក្រសួងសុខាភិបាល។
៦ ឱសថស្ថាន និងឱសថស្ថានរង ត្រូវលក់ឧបករណ៍តេស្តរហ័សក្នុងតម្លៃសមស្រប ដើម្បីឱ្យប្រជាពលរដ្ឋមានលទ្ធភាពទិញយកមកធ្វើតេស្ត ដោយមានការត្រួតពិនិត្យឱ្យបានហ្មត់ចត់ដោយក្រុមការងារសិក្សា និងស្រាវជ្រាវរកឱសថ និងបរិក្ខារសម្រាប់ប្រយុទ្ធនឹងជំងឺកូវីដ ១៩។
៧ មូលដ្ឋានសុខាភិបាលសាធារណៈទាំងអស់ ត្រូវប្រើប្រាស់ឧបករណ៍តេស្ដរហ័សផ្តល់ជូនដោយ ក្រសួងសុខាភិបាល។ សមត្ថកិច្ចពាក់ព័ន្ធត្រូវគ្រប់គ្រង និងត្រួតពិនិត្យឱ្យបានច្បាស់លាស់ ដើម្បីទប់ស្កាត់កុំឱ្យឧបករណ៍របស់រដ្ឋមាននៅលើទីផ្សារ។
ក្រសួងសុខាភិបាលបញ្ជាក់ថា ក្រសួង ស្ថាប័នរដ្ឋ រដ្ឋបាលរាជធានី-ខេត្ត និងអង្គភាពពាក់ព័ន្ធទាំងអស់ ត្រូវអនុវត្តផ្សព្វផ្សាយ និងតាមដានការអនុវត្តសារាចរណែនាំនេះឱ្យមានប្រសិទ្ធភាពខ្ពស់ និងដោយស្មារតីទទួលខុសត្រូវខ្ពស់៕
វីដេអូ៖
