ភ្នំពេញៈ ក្រុមរថយន្តចល័តយោធភូមិភាគទី៥ រួមជាមួយក្រុមគ្រូពេទ្យរបស់កងពលតូចថ្មើរជើងលេខ ៥១ បានបញ្ចប់ដំណើរការចល័តចាក់វ៉ាក់សាំងបង្ការជំងឺកូវីដ ១៩ ដូសទី៣ ដល់កងកម្លាំងជួរមុខចំនួន ១០ អង្គភាព ក្នុងទិសទី ១ ខេត្តបន្ទាយមានជ័យ តាមការគ្រោងទុក។
យោងតាមទំព័រហ្វេសប៊ុករបស់យោធភូមិភាគទី៥ នៅថ្ងៃទី ១០ សីហា បានឱ្យដឹងថា កងកម្លាំងចម្រុះជួរមុខដែលបានចាក់វ៉ាក់សាំងបង្ការជំងឺកូវីដ ១៩ ដូសទី៣ (ដូសជំរុញ) រួមមានស្ថាប័នកងទ័ពចំនួន ៩ អង្គភាព រួមជាមួយនគរបាលការពារព្រំដែនគោកសរុបចំនួន ១០ អង្គភាព ដែលបានដំណើរការចាក់ចាប់ពីម៉ោង ៦:៣០ នាទីព្រឹក ដល់ម៉ោង ១៦:០០ នាទីរសៀល បានបញ្ចប់តាមផែនការថ្នាក់លើ។
ក្នុងឱកាសអញ្ជើញចុះពិនិត្យការចាក់វ៉ាកសាំងបង្ការជំងឺកូវីដ ១៩ ជូនកងកម្លាំងចម្រុះ ទិសទី១ បន្ទាយមានជ័យ នៅថ្ងៃទី ១០ សីហា លោក សេង ធារិន មេបញ្ជាការរង និងជានាយសេនាធិការ យោធភូមិភាគទី៥ បានលើកឡើងថា ក្រុមរថយន្តចល័តយោធភូមិភាគទី ៥ និងក្រុមគ្រូពេទ្យរបស់កងពលតូចថ្មើរជើងលេខ ៥១ ដឹកនាំដោយលោក សឹង្ហ ទុំ មេបញ្ជាការកងពលតូចថ្មើរជើងលេខ ៥១ បានដំណើរការចល័តចាក់ចាប់ពីព្រំប្រទល់ខេត្តឧត្តរមានជ័យ ដល់ព្រំប្រទល់ខេត្តបាត់ដំបងជាង ១៥០ គីឡូម៉ែត្រ។
លោក សេង ធារិន បញ្ជាក់ថា៖ «អនុវត្តតាមបទបញ្ជារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងថ្នាក់ដឹកនាំកងទ័ពគ្រប់លំដាប់ថ្នាក់ យុទ្ធនាការចាក់វ៉ាក់សាំងជូនកងកម្លាំងជួរមុខឱ្យបានលឿនបំផុត ដើម្បីធានាបានសុខសុវត្ថិភាពជូនកងកម្លាំង ដែលកំពុងបំពេញប្រតិបត្តិការបិទខ្ទប់ជួរមុខ នៅតាមបន្ទាត់ព្រំដែនកម្ពុជា-ថៃ ចាប់តាំងពីខែធ្នូ ឆ្នាំ ២០២០ គិតមកដល់ពេលនេះរយ:ពេលជាង ៨ ខែហើយ»។
ជាមួយនឹងយុទ្ធនាការនៅខេត្តបន្ទាយមានជ័យ កងកម្លាំងជួរមុខទិសយោធភូមិភាគទី៥ ក៏បានចាប់ផ្តើមដំណើរការចាក់វ៉ាក់សាំងបង្ការជំងឺកូវីដ ដូសទី ៣ សម្រាប់កងកម្លាំងជួរមុខនៅខេត្តបាត់ដំបងជាបន្តបន្ទាប់ផងដែរ។
លោក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ បានថ្លែងថា វ៉ាក់សាំង AstraZeneca ដែលចាក់ជូនកម្លាំងជួរមុខទិសយោធភូមិភាគទី៥ ដូសទី៣ នាពេលនេះ គឺជាការផ្តល់ជូនពីសំណាក់ប្រមុខរដ្ឋាភិបាលដែលបានខិតខំគ្រប់បែបយ៉ាង ដើម្បីរកវ៉ាក់សាំង និងបានដាក់ចេញវិធានការ សម្រាប់ចាក់ជូនមន្ត្រីរាជការ កងកម្លាំងប្រដាប់អាវុធ ប្រជាពលរដ្ឋឱ្យបានគ្រប់ៗគ្នា។
លោកថ្លែងថា៖ «ដូច្នេះហើយ បងប្អូនត្រូវគោរពដឹងគុណចំពោះសម្តេច [ហ៊ុន សែន]។ ទោះបីជាទទួលបានការចាក់វ៉ាក់សាំងទាំង ២ ដូស និង៣ ដូស ហើយសូមបន្តចូលរួមអនុវត្តឱ្យបានខ្ជាប់ខ្ជួន វិធានការសុខាភិបាល ៣ការពារ និង៣កុំ»។
លោក ម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យ ប្រាប់ភ្នំពេញប៉ុស្តិ៍ថា៖ «សម្រាប់ខ្លួនខ្ញុំផ្ទាល់ ខ្ញុំបានទទួលវ៉ាក់សាំងដូសទី៣ នេះហើយ ជាមួយនឹងកងកម្លាំងដទៃទៀត»។
លោក ឈឿន ត្រៃយ៉ុង នាយករដ្ឋបាលខេត្តបន្ទាយមានជ័យប្រាប់ ភ្នំពេញ ប៉ុស្តិ៍ នៅថ្ងៃទី ១០ សីហាថា ការទទួលបានវ៉ាក់សាំងដូសទី៣ នេះនឹងធ្វើឱ្យកងកម្លាំងជួរមុខរបស់យើង មានកម្លាំងស្មារតី និងមានសុវត្ថិភាពថែម ១ កម្រិតទៀត ពីជំងឺកូវីដ ១៩។
បន្ថែមពីនេះលោកថ្លែងថា រដ្ឋបាលខេត្តក៏មិនភ្លេចជំរុញឱ្យកងកម្លាំងជួរមុខនៅតែប្រកាន់ខ្ជាប់វិធានការ ការពារបន្ថែមទៀត ដើម្បីចូលរួមប្រយុទ្ធប្រឆាំងជាមួយរដ្ឋាភិបាលក្នុងការទប់ស្កាត់ជំងឺកូវីដ ១៩ នេះ។ ជាពិសេស គឺយុទ្ធនាការក្នុងការទទួលយកពលករខ្មែររាប់ម៉ឺននាក់ ដែលវិលត្រឡប់ពីប្រទេសថៃ និងការបញ្ជូនពួកគេដោយសុវត្ថិភាព ដោយគ្មានការចម្លងជំងឺនេះ ចូលសហគមន៍។
លោកបានគូសបញ្ជាក់ថា៖ «យើងយកចិត្តទុកដាក់លើកម្លាំងជួរមុខយើងណាស់ ព្រោះពួកគាត់នឹងត្រូវប្រឈមនឹងការវិលត្រឡប់របស់បងប្អូនពលករយើង មកពីថៃ ដែលរដ្ឋាភិបាលបើកទ្វារព្រំដែនទទួលពួកគាត់។ កម្លាំងជួរមុខយើង គឺសំខាន់ណាស់»៕