The Phnom Penh Post Search

Search form




Logo of Phnom Penh Post newspaper Phnom Penh Post - កុមារ និង​យុវវ័យ​កំព្រា​អនាថា​នៅ​ភ្នំពេញ ១ ៥៨៧ ​នាក់ បាន​ចាក់​វ៉ាក់សាំង​បង្ការ​កូវីដ​ ១៩

កុមារ និង​យុវវ័យ​កំព្រា​អនាថា​នៅ​ភ្នំពេញ ១ ៥៨៧ ​នាក់ បាន​ចាក់​វ៉ាក់សាំង​បង្ការ​កូវីដ​ ១៩

Content image - Phnom Penh Post
ក្មេងប្រុស​ម្នាក់​កំពុង​ចាក់​វ៉ាក់សាំង​បង្ការ​កូវីដ​នៅ​មជ្ឈមណ្ឌល​គាំពារ​មាតា និង​ទារក​។ ហេង ជីវ័ន

កុមារ និង​យុវវ័យ​កំព្រា​អនាថា​នៅ​ភ្នំពេញ ១ ៥៨៧ ​នាក់ បាន​ចាក់​វ៉ាក់សាំង​បង្ការ​កូវីដ​ ១៩

ភ្នំពេញៈ កុមារ និង​យុវវ័យ​ពិការ កំព្រា អនាថា​គ្មាន​ទីពឹង ដែល​មាន​អាយុ​ចាប់ពី​ ១២ ដល់​ ១៧ ​ឆ្នាំ​នៅ​រាជធានី​ភ្នំពេញ​ចំនួន ១ ៥៨៧ ​នាក់ ​បានទទួល​ការចាក់​វ៉ាក់សាំង​បង្ការ​ជំងឺ​កូវីដ​ ១៩ បើ​គិត​ត្រឹម​ថ្ងៃទី​ ១០ ខែសីហា​។

លោកស្រី មុំ ចាន់ដានី ប្រធាន​មន្ទីរ​សង្គមកិច្ច អតីតយុទ្ធជន យុវនីតិសម្បទា ថ្លែង​ពី​ម្សិលមិញ​ថា មាន​យុវវ័យ​ពិការ និង​កុមារ​ពិការ​អនាថា គ្មាន​ទីពឹង កុមារ​រងគ្រោះ និង​ងាយ​រងគ្រោះ​នៅ​ភ្នំពេញ​សរុប​ចំនួន​ ១ ៥៨៧ ​នាក់​បាន​ចាក់​វ៉ាក់សាំង​ការពារ​ជំងឺ​កូវីដ​គិត​ត្រឹម​ថ្ងៃទី​ ១០ ខែសីហា​ក្នុងនោះ​មាន​កុមារី​ចំនួន​ ៦០៣ ​នាក់​។

លោកស្រី​ថ្លែងថា​៖ «​កុមារកំព្រា​ក្នុង​មណ្ឌល​ថែទាំ​ជំនួស​រដ្ន ក្នុង​មណ្ឌល​ថែទាំ​ជំនួស អង្គការ​សមាគម​ដៃគូ កុមារ​អនាថា កុមារ​ពិការ កុមារ​រងគ្រោះ និង​ងាយ​រងគ្រោះ មាន​អាយុ​ ១២ ​ឆ្នាំ​ដល់​ក្រោម ១៧ ​ឆ្នាំ​ទទួល​បាន​ការចាក់​វ៉ាក់សាំង​បង្ការ​កូវីដ​ ១៩ នៅតាម​មណ្ឌល​សុខាភិបាល​សាធារណៈ​ក្នុង​រាជធានី​ភ្នំពេញ​»​។ បើតាម​លោកស្រី​ មុំ ចាន់ដានី បច្ចុប្បន្ន​ពួកគេ​កំពុង​បន្ត​ទទួល​បាន​ការចាក់​វ៉ាក់សាំង​បណ្ដើរៗ តាម​ការស្នើសុំ​លេខ​រៀង ដើម្បី​កាត់បន្ថយ​ចំនួន​ចង្អៀត និង​រក្សា​គម្លាត​សុវត្ថិភាព​។

ពេលនេះ​លោកស្រី​កំពុង​ឆ្លើយឆ្លង​ជាមួយ​បណ្តា​អង្គការ​ដៃគូ ដើម្បី​ធ្វើការ​ប្រមូល​ទិន្នន័យ​បន្ថែមទៀត ព្រោះ​មាន​អង្គការ​ដៃគូ​មួយចំនួន​បាននិង​កំពុង​បិទខ្ទប់ ក្រោយ​រកឃើញ​មាន​ជំងឺ​កូវីដ​ ១៩​។

លោកស្រី​ថ្លែងថា​៖ «​ជាទូទៅ​យើង​ត្រូវការ​ការស្ម័គ្រចិត្ត​ពី​កុមារ ហើយ​យើង​ធ្វើការ​សម្រេចចិត្ត​ក្នុងនាម​យើង​ជា​អ្នកផ្តល់​ឧត្តមប្រយោជន៍​ដល់​កុមារ តែ​ពេលនេះ​ចាក់​អត់​ទាន់​បាន​ទាំងអស់​ទេ​។ អ៊ីចឹង​ខ្ញុំ​សុំ​ពេល​ដើម្បី​ធ្វើការ​អាប់ឌែត​បន្ថែមទៀតថា តើ​មាន​ចំនួន​ប៉ុន្មាន ព្រោះ​កិច្ចការងារ​ហ្នឹង​យើង​ធ្វើ​ជាមួយ​អង្គការ​»​។

ដោយឡែក​យុវវ័យ និង​មនុស្ស​ចាស់​ចាប់ពី​អាយុ​ ១៨ ​ឆ្នាំ​ឡើងទៅ​ដែល​បាននិង​កំពុង​ស្នាក់នៅ​មើលថែ​ពី​អង្គការ និង​មណ្ឌល​នានា​បាន​ចាក់​វ៉ាក់សាំង​ការពារ​ជំងឺ​កូវីដ​ ១៩ ​រួចរាល់​អស់ហើយ​។

លោក ឯម ច័ន្ទមករា រដ្ឋលេខាធិការ និង​ជាម​ន្ត្រី​នាំពាក្យ ក្រសួង​សង្គមកិច្ច អតីតយុទ្ធជន យុវនីតិសម្បទា ថ្លែង​ពី​ម្សិលមិញ​ថា អ្នក​ដែលមាន​ពិការភាព​នៅ​ចន្លោះ​អាយុ​ ១២ ​ដល់​ ១៧ ​ឆ្នាំមាន​ចំនួន​មិនតិចជាង​ ៥ ០០០ ទៅ ៦ ០០០ ​នាក់​នោះទេ ដែល​បាន​ចាក់​វ៉ាក់សាំង​ការពារ​ជំងឺ​កូវីដ ​១៩ តាមរយៈ​ការជួយ​សម្រួល​ពី​ក្រសួង​សង្គមកិច្ច​ក្នុង​ក្របខ័ណ្ឌ​ទូទាំងប្រទេស​។ លោក​ថ្លែងថា​៖ «​ជនពិការ​មិនតិចជាង​ ៥ ​ទៅ​ ៦ ​ពាន់​នាក់​ទេ ដែល​បានទទួល​ការចាក់​វ៉ាក់សាំង ដោយមាន​ការសម្របសម្រួល​ពី​ពួកយើងខ្ញុំ​»៕

អត្ថបទគួរចាប់អារម្មណ៍