ភ្នំពេញៈ ក្រុមការងារហ្វេសប៊ុករបស់លោក ស ខេង រដ្ឋមន្ត្រីក្រសួងមហាផ្ទៃ បានដោះស្រាយបញ្ហានានាជូនប្រជាពលរដ្ឋចំនួន ១៨ គណនីក្នុងចំណោម ៧៣ គណនីហ្វេសប៊ុកដែលបានបញ្ជូនចូលមកក្នុងគណនីហ្វេសប៊ុករបស់ក្រុមការងារនេះនៅក្នុងខែកក្កដា ឆ្នាំ ២០២១។
លោក ស ខេង កាលពីថ្ងៃទី ៩ ខែសីហានេះ បានសរសេរសារនៅលើហ្វេសប៊ុករបស់លោកដោយស្នើសុំការយោគយល់ពីប្រជាពលរដ្ឋចំពោះមតិយោបល់ ឬសំណូមពរមួយចំនួនទៀតដែលក្រុមការងារ និងភាគីពាក់ព័ន្ធនៅមិនទាន់បានដោះស្រាយចប់សព្វគ្រប់។
លោកបានថ្លែងថា៖ «ខ្ញុំក៏សូមយកឱកាសនេះស្នើសុំការយល់យោគអធ្យាស្រ័យពីបងប្អូនជនរួមជាតិចំពោះករណីមួយចំនួនទៀតដែលក្រុមការងារ និងភាគីពាក់ព័ន្ធនៅមិនទាន់បានដោះស្រាយចប់សព្វគ្រប់អាស្រ័យលើករណីខ្លះទាមទារពេលវេលា និងអនុវត្តទៅតាមនីតិវិធី»។
លោក ស ខេង បានឱ្យដឹងថា នៅក្នុងខែកក្កដា ឆ្នាំ ២០២១ នេះក្រុមការងារតាមដានអំពីការដោះស្រាយមតិយោបល់ ឬសំណូមពររបស់ប្រជាពលរដ្ឋនៅក្នុងទំព័រហ្វេសប៊ុករបស់លោកបានទទួលសំណូមពរ និងសំណួររបស់ប្រជាពលរដ្ឋដែលស្ថិតក្នុងដែនសមត្ថកិច្ចក្រសួងមហាផ្ទៃ គឺមានចំនួន ៧៣ គណនី និងបានឆ្លើយតប និងដោះស្រាយចំនួន ១៨ គណនី ក្រៅពីនោះគឺស្ថិតក្នុងដំណាក់កាលកំពុងដំណើរការដោះស្រាយនៅឡើយ។
លោកបានថ្លែងថា៖ «វឌ្ឍនភាពការងារនេះអាចសម្រេចបានដោយសារកិច្ចខិតខំប្រឹងប្រែង និងការសហការគ្នាដ៏ល្អរវាងថ្នាក់ដឹកនាំ និងមន្ត្រីក្រសួងមហាផ្ទៃ ស្ថាប័នថ្នាក់ជាតិ និងថ្នាក់ក្រោមជាតិ និងក្រុមការងារគេហទំព័រហ្វេសប៊ុករបស់ខ្ញុំទោះជាត្រូវប្រឈមមុខនឹងបញ្ហាបង្កឡើងដោយជំងឺកូវីដ ១៩ ក៏ដោយ»។
លោក ស ខេង ក៏បានថ្លែងអំណរគុណដល់បងប្អូនជនរួមជាតិដែលបានលើកជាមតិយោបល់ និងសំណូមពរនានាមកកាន់លោក តាមរយៈទំព័រហ្វេសប៊ុកដើម្បីរួមគ្នាដោះស្រាយនូវបញ្ហានានា និងរួមគ្នាអភិវឌ្ឍសង្គមជាតិឱ្យកាន់តែរីកចម្រើន។
លោក ជា សុគន្ធា ប្រធានក្រុមការងារដោះស្រាយមតិយោបល់ និងសំណូមពរពលរដ្ឋដែលបានបញ្ជូន ចូលមកលើហ្វេសប៊ុកលោក ស ខេង បានថ្លែងប្រាប់ ភ្នំពេញ ប៉ុស្ដិ៍ថា ទោះបីស្ថានភាពនៃការរីករាលដាលជំងឺកូវីដ ១៩ នៅបន្តរីករាលដាលខ្លាំងក្នុងប្រទេសកម្ពុជា ប៉ុន្ដែក្រុមការងារនៅបន្តទទួលដោះស្រាយមតិយោបល់ និងសំណូមពរពលរដ្ឋដែលបានផ្ញើមកដដែល។
លោកបានថ្លែងថា៖ «ចាប់តាំងពីបង្កើតក្រុមការងារដោះស្រាយមតិយោបល់ ឬសំណូមពរពលរដ្ឋតាមហ្វេសប៊ុកសម្ដេចក្រឡាហោម ស ខេង កាលពីខែកក្កដា ឆ្នាំ ២០២០ រហូតមកក្រុមការងារបានដោះស្រាយមតិយោបល់ និងសំណូមពរពលរដ្ឋជាប្រចាំមិនដែលអាក់ខានឡើយ។ យើងមានសំណុំរឿងមួយចំនួនជាសំណុំរឿងវិវាទដីធ្លីនៅមូលដ្ឋានគឺយើងបានស្នើសុំគោលការណ៍ពីថ្នាក់ដឹកនាំផ្ទេរទៅឱ្យមន្ដ្រីមូលដ្ឋានជាអ្នកដោះស្រាយ»។
លោក ជា សុគន្ធា ថ្លែងថា សំណុំរឿងដែលក្រុមការងារមានការលំបាក និងត្រូវចំណាយពេលវេលាច្រើនក្នុងការដោះស្រាយ គឺករណីវិវាទដីធ្លីនៅថ្នាក់មូលដ្ឋានរាជធានី ខេត្ដ ដែលត្រូវផ្ទេរសំណុំរឿងទៅកាន់អាជ្ញាធរ មូលដ្ឋាន ដើម្បីសហការជាមួយក្រុមការងារក្រសួងមហាផ្ទៃក្នុងការដោះស្រាយ។
លោក អំ សំអាត នាយករងអង្គការលីកាដូ ថ្លែងថា ការបង្កើតឱ្យមានការទទួលបណ្តឹង ឬសំណូមពរពលរដ្ឋដោយផ្ទាល់តាមហ្វេសប៊ុករបស់លោក ស ខេង បែបនេះ ជាវិធីជួយសម្រួលដល់ពលរដ្ឋដោយមិនចាំបាច់ចំណាយពេលធ្វើដំណើរ និងថវិកាច្រើនមកដាក់បណ្ដឹង ហើយពលរដ្ឋអាចលើកពីបញ្ហាអសកម្ម និងការព្រងើយកន្តើយពីមន្ត្រីមូលដ្ឋានជម្រាបជូនដល់ថ្នាក់ដឹកនាំ។
លោកថ្លែងថា៖ «តាមលទ្ធផលឃើញថា ក្រុមការងាររបស់សម្តេចក្រឡាហោម ស ខេង បាននិងកំពុងដោះស្រាយ និងឆ្លើយតបបណ្តឹង និងសំណូមពររបស់ពលរដ្ឋបានមួយចំនួន។ ប៉ុន្តែបញ្ហាទាក់ទងករណីធំៗ ដូចជាករណីទំនាស់ដីធ្លីនៅតាមបណ្តាខេត្ត និងរាជធានីជាច្រើននៅមិនទាន់អាចដោះស្រាយ និងឆ្លើយតបបានដែរ»។
លទ្ធផលប្រចាំឆមាសទី១ ឆ្នាំ ២០២១ អំពីការទទួលយក និងការដោះស្រាយចំពោះមតិយោបល់ ឬសំណូមពររបស់ពលរដ្ឋនៅក្នុងទំព័រហ្វេសប៊ុករបស់លោក។ សរុបមតិយោបល់ ឬសំណូមពរប្រជាពលរដ្ឋទូទៅមានចំនួន ៦៦៥ គណនីនៅក្នុងនោះគឺបានទទួលយកពិនិត្យដោះស្រាយមានចំនួន ៤២៤ គណនី និងបានដោះស្រាយរួចរាល់ជូនប្រជាពលរដ្ឋមានចំនួន ២៥៩ គណនី៕