.jpg)
លោក គៀត ច័ន្ទថារិទ្ធ អគ្គនាយកអន្តោប្រវេសន៍នៃក្រសួងមហាផ្ទៃ។ រូបថត DGI page
ភ្នំពេញៈ លោក គៀត ច័ន្ទថារិទ្ធ អគ្គនាយកអន្តោប្រវេសន៍នៃក្រសួងមហាផ្ទៃ បានព្រមានដល់មន្ត្រីជំនាញ និងមន្ត្រីច្រកទ្វារព្រំដែនទាំងអស់ត្រូវរក្សានូវការងារសម្ងាត់ និងចៀសវាងការចូលឆែកមើលប្រព័ន្ធទិន្នន័យមុខសញ្ញាអន្តោប្រវេសន៍ក្នុងន័យមិនល្អ។
ក្នុងកិច្ចប្រជុំផ្សព្វផ្សាយបទកំណត់ ស្តីពីការគ្រប់គ្រង និងការប្រើប្រាស់ប្រព័ន្ធទិន្នន័យមុខសញ្ញាអន្តោប្រវេសន៍តាមប្រព័ន្ធហ្ស៊ូម (Zoom) នៅថ្ងៃទី ១០ ខែសីហានេះ លោក គៀត ច័ន្ទថារិទ្ធ បានឱ្យដឹងថា ក្នុងករណីបែកធ្លាយទិន្នន័យណាមួយ ប្រធានអង្គភាពត្រូវមានចំណាត់ការដល់មន្ត្រីរូបណាដែលប្រព្រឹត្តល្មើសនឹងបទវិន័យនេះ។
លោកបានថ្លែងដោយបានណែនាំឱ្យក្រុមការងារធ្វើបច្ចុប្បន្នភាពមុខសញ្ញាជនអន្តោប្រវេសន៍ខុសច្បាប់ឱ្យបានទៀងទាត់ និងរក្សាការសម្ងាត់នូវការងារជំនាញ ជាពិសេសការរក្សាទុកនូវទិន្នន័យទាំងអស់ជាឯកសារ និងរក្សាទុកក្នុងប្រព័ន្ធអេឡិចត្រូនិក។
ជាមួយគ្នានេះ លោកបានណែនាំដល់នាយកដ្ឋានពាក់ព័ន្ធទាំងអស់ ចំណុះឱ្យអគ្គនាយកដ្ឋានអន្តោប្រវេសន៍ត្រូវសហការផ្តល់ព័ត៌មានចាំបាច់ដល់នាយកដ្ឋានជនបរទេសដែលមិនមែនអន្តោប្រវេសន្ត និងបច្ចេកវិទ្យាផងដែរ។
លោក កែវ វណ្ណថន អ្នកនាំពាក្យនៃអគ្គនាយកដ្ឋានអន្តោប្រវេសន៍ប្រាប់ភ្នំពេញប៉ុស្តិ៍នៅថ្ងៃទី ១០ ខែសីហា ឆ្នាំ ២០២១ នេះ ឱ្យដឹងថា កន្លងមកនេះ មិនដែលមានបញ្ហាបែកធ្លាយទិន្នន័យចេញទៅក្រៅនោះទេ ឬដាក់ទោសទណ្ឌលើមន្ត្រីជំនាញ ឬមន្ត្រីច្រកព្រំដែនណាមួយនោះទេ។
លោកបានឱ្យដឹងទៀតថា ការគ្រប់គ្រង និងការប្រើប្រាស់ប្រព័ន្ធទិន្នន័យមុខសញ្ញាអន្តោប្រវេសន៍ ត្រូវតែរក្សាការសម្ងាត់ ព្រោះការងារប៉ូលិស កំពុងតែស្រាវជ្រាវ និងតាមចាប់ខ្លួនជនសង្ស័យណាម្នាក់ដែលត្រូវបានបញ្ចូលទៅក្នុងប្រព័ន្ធទិន្នន័យនោះទៅក្នុងប្រព័ន្ធ បើសិនជាធ្វើឱ្យបែកធ្លាយ ជនល្មើសនឹងរត់គេចខ្លួនបាត់។
លោក កែវ វណ្ណថន ថ្លែងថា៖ «មន្ត្រីជំនាញត្រូវតែរក្សាការសម្ងាត់ កាលណាបែកធ្លាយទៅ មន្ត្រីជំនាញនោះត្រូវតែទទួលខុសត្រូវ និងត្រូវពិន័យទៅតាមលក្ខន្តិកៈរបស់ប៉ូលិស បើជាករណីធ្ងន់ធ្ងរត្រូវបណ្តេញចេញពីក្របខ័ណ្ឌនគរបាលជាតិជាដើម ប៉ុន្តែកន្លងមកមិនដែលមាននោះទេ»។
លោក កែវ វណ្ណថន ពន្យល់ថា ប្រព័ន្ធទិន្នន័យមុខសញ្ញាអន្តោប្រវេសន៍ ត្រូវបានដាក់ឱ្យដំណើរការយូរណាស់មកហើយ នៅគ្រប់ច្រកចេញចូលព្រំដែនកម្ពុជាទាំងអស់។ រាល់មុខសញ្ញាជនសង្ស័យដែលត្រូវតាមចាប់ខ្លួន មន្ត្រីជំនាញនឹងបញ្ចូលជនសង្ស័យនោះទៅក្នុងប្រព័ន្ធនេះ វានឹងលោតឱ្យដោយស្វ័យប្រវតិ្ត នៅពេលដែលជនសង្ស័យនោះឆ្លងកាត់ព្រំដែនណាមួយ ដែលមានភាពងាយស្រួលសម្រាប់នគរបាលចាប់ខ្លួន។
លោក កែវ វណ្ណថន បានថ្លែងឱ្យដឹងទៀតថា បច្ចុប្បន្ននេះមានជនសង្ស័យអន្តរប្រវេសន៍ដែលប្រព្រឹត្តខុសច្បាប់ជាច្រើន ត្រូវបានបញ្ចូលទៅក្នុងទិន្នន័យនេះ ដើម្បីតាមចាប់ខ្លួន៕
