The Phnom Penh Post Search

Search form

Logo of Phnom Penh Post newspaper Phnom Penh Post - តុលាការ​ខេត្ត​បាត់​ដំបង សម្រេច​ឃុំ​ខ្លួនជន​បែក​ថ្នាំ ដែល​ប្រើកាំភ្លើង​កែច្នៃ បាញ់​សម្លាប់​ម្តាយ​ខ្លួន​ឯង​




តុលាការ​ខេត្ត​បាត់​ដំបង សម្រេច​ឃុំ​ខ្លួនជន​បែក​ថ្នាំ ដែល​ប្រើកាំភ្លើង​កែច្នៃ បាញ់​សម្លាប់​ម្តាយ​ខ្លួន​ឯង​

Content image - Phnom Penh Post
ជន​បែក​ថ្នាំ​ ដែល​ត្រូវ​តុលាការ​សម្រេច​ឃុំខ្លួន ​ដែល​ត្រូវ​ជន​នេះ​បាញ់​សម្លាប់។ រូប​ថត នគរបាល​

តុលាការ​ខេត្ត​បាត់​ដំបង សម្រេច​ឃុំ​ខ្លួនជន​បែក​ថ្នាំ ដែល​ប្រើកាំភ្លើង​កែច្នៃ បាញ់​សម្លាប់​ម្តាយ​ខ្លួន​ឯង​

បាត់ដំបងៈ​ ចៅក្រម​ស៊ី​ប​សួរ​សាលាដំបូង​ខេត្តបាត់ដំបង លោក គី ទី​ម៉េង បានសម្រេច​ឃុំខ្លួន​ជន​ ​បែក​ថ្នាំ​មាន​សតិ​មិន​សូវ​គ្រប់​ម្នាក់ ពាក់ព័ន្ធ​នឹង​បទ​ឃាតកម្ម​ ប្រើ​កាំភ្លើង​កែច្នៃ បាញ់​សម្លាប់​ម្តាយ​របស់​ខ្លួនដាក់ពន្ធនាគារ​ នៅ​ព្រឹក​ថ្ងៃទី ១១ ខែសីហា។

លោកស្រី ជា ចាន់​រស្មី អ្នកនាំពាក្យ​សាលាដំបូង​ខេត្តបាត់ដំបង​ប្រាប់ ភ្នំពេញ​ ប៉ុស្ដិ៍​ នៅ​ព្រឹក​ថ្ងៃទី ១១ ខែសីហា​​ថា ជន​ត្រូវ​ចោទ​ឈ្មោះ ឈឿ​ម សំណាង អាយុ ២៦ ឆ្នាំ ត្រូវបាន​ចៅក្រម​សម្រេច​ឃុំខ្លួន ​នៅក្នុង​ពន្ធនាគារ​ខេត្តហើយ។

លោក ដួង សារ៉ន អ្នកនាំពាក្យ​សាលាដំបូង​ខេត្តបាត់ដំបងម្នាក់​ទៀត​ ថ្លែង​នៅ​ថ្ងៃទី ១០ ខែសីហា​ថា ករណី​ឈ្មោះ ឈឿ​ម សំណាង ដែល​ម​ត្ថ​កិច្ច​បញ្ជាក់ថា​ ជា​ជន​បែក​ថ្នាំ​ ហើយ​បាន​បាញ់សម្លាប់​ម្តាយ​របស់ខ្លួន ​ដោយ​កាំភ្លើង​កែច្នៃ​នោះ ត្រូវបាន​តំណាង​អយ្យការ​ចោទប្រកាន់​ពីបទ ឃាតកម្ម តាម​មាត្រា ១៩៩ នៃ​ក្រមព្រហ្មទណ្ឌ នៅ​រសៀល​ថ្ងៃទី ១០ ខែសីហា។

លោក​ថ្លែងថា៖ «តំណាង​អយ្យការ​បាន​បន្ត​នីតិវិធី​ហើយ​បាន​ចោទប្រកាន់​ពីបទ ឃាតកម្ម តាម​មាត្រា ១៩៩ នៃ​ក្រមព្រហ្ម​ទណ្ឌ និង​បាន​បញ្ជូនទៅ​ចៅក្រម​បន្ត​នីតិវិធី​នៅ​ល្ងាច​ថ្ងៃ​ដដែល»។

លោក​វរសេនីយ៍ឯក ប៉ាង ហៀ​ង អធិការនគរបាល​ស្រុក​គាស់ក្រឡថ្លែងថា ​ជនសង្ស័យ​​រូប​នោះ ​បែក​ថ្នាំ​មាន​សតិ​មិន​ដឹង​ខុស​ត្រូវ ហើយ​យក​កាំភ្លើង​កែច្នៃ​បាញ់សម្លាប់​ម្តាយបង្កើត​របស់ខ្លួន​ ហើយ​សមត្ថ​កិច្ច​បាន​ចាប់ខ្លួនបានភ្លាមៗនៅ​យប់​កើត​ហេតុ​ថ្ងៃទី ៨ ខែសីហា។

បើតាម​លោក​វរសេនីយ៍ឯក ប៉ាង ហៀ​ង ជនសង្ស័យ ឈ្មោះ ឈឿ​ម សំណាង ភេទ​ប្រុស​អាយុ ២៦ ឆ្នាំ ចំណែក​ជនរង​គ្រោះ​ត្រូវជា​ម្តាយ​មានឈ្មោះ ធី​វ មុនី អាយុ ៦២ ឆ្នាំ អ្នក​ទាំង ២ រស់នៅ​ភូមិ​កូន​ព្រហ្ម ឃុំ​ធិបតី ស្រុក​គាស់ក្រឡ ។

បើតាម​លោក​​ ប៉ាង ហៀ​ង នៅមុន​ពេល​កើតហេតុ​ ក្នុង​យប់​ថ្ងៃទី ៨ ខែសីហា ជនសង្ស័យ​បាន​ទៅ​គោះទ្វា​រឲ្យ​ម្តាយ​របស់គេ​បើកទ្វារ នៅវេលា​ម៉ោង​ជិត ១១ យប់។ ក្រោយពេល​បើ​កទ្វា​រភ្លាម​ជនសង្ស័យ​បាន​បាញ់​សំដៅ​ជនរងគ្រោះ១គ្រាប់​ត្រូវចំ​ដើម​ដោះ​ខាងឆ្វេង​បណ្តាល​ឲ្យ​ស្លាប់​នៅនឹងកន្លែង។

លោក​ថ្លែងថា៖ «នៅ​យប់​នោះ​ជនសង្ស័យ​មិនដឹង​មកពីណា មាន​ទាំង​កាំភ្លើង​ខ្យល់​សម្រាប់​បាញ់​ត្រី​មាន​គ្រាប់​ព្រួញ​ដែក​ប្រវែង​ប្រមាណ៣តឹក មកដល់​ផ្ទះ​បាន​គោះទ្វា​រឲ្យ​ម្តាយ​របស់ខ្លួន​បើ​ទ្វារ ដែល​នៅក្នុង​ផ្ទះ​នោះ​ក្រៅពី​ម្តាយ​គាត់​នៅមាន​ក្មេង​ម្នាក់​ផងដែរ រីឯ​ឪពុក​មិន​នៅផ្ទះ​ទេ។ អ៊ីចឹង​ពេល​បើកទ្វារ​ទៅ​ជនសង្ស័យ​តម្រង់​កាំភ្លើង​បាញ់​ទៅលើ​ជនរងគ្រោះ​តែម្តង» ។

ក្រោយពេល​បាញ់សម្លាប់​ម្តាយ​ហើយ​ រូបគេ​បានរ​ត់ទៅ​ពួន​នៅផ្ទះ​របស់ខ្លួន​ដែល​នៅក្បែរនោះ តែ​ត្រូវ​សមត្ថកិច្ច​រកឃើញ និង​ឃាត់ខ្លួន​ដើម្បី​សួរនាំ ក្រោយ​ពី​​ក្មេងស្រី​ម្នាក់​ ដែល​ស្នាក់នៅ​ជាមួយ​ជនរងគ្រោះ​ បាន​រត់​ទៅប្រាប់​ឪ​ពុក​ជនសង្ស័យ។

លោក​ថ្លែងថា៖«ជនសង្ស័យ​ឆ្លើយថា បាញ់​ម្តាយ​របស់ខ្លួន​ពិតមែន មូលហេតុ​ដោយសារតែ​ម្តាយ​របស់គេ​ជា​អាប។ មាន​ន័យ​ថា គេ​ថា​ ខ្លួនគេ​ហ្នឹង​ជា​មនុស្ស​ត្រឹមត្រូវ ឯ​ម្តាយ​គាត់​នោះ​ជា​អាប អីចឹង គេ​មិនអាច​រស់នៅ​ជាមួយ​បានទេ ទើប​បានជា​គេ​​បាញ់​​សម្លាប់»៕

អត្ថបទគួរចាប់អារម្មណ៍