បាត់ដំបងៈ តុលាការខេត្តបាត់ដំបងបានឃុំខ្លួនបុរសម្នាក់នៅពន្ធនាគារខេត្តនៅថ្ងៃទី ១១ សីហា ពាក់ព័ន្ធករណីសម្លាប់បុរសចំណាស់ម្នាក់ ដោយប្រើត្បូងចប ប្រព្រឹត្តកាលពីថ្ងៃទី ៨ សីហា នៅភូមិចកតូច ឃុំកកោះ ស្រុកម៉ោងឫស្សី ខេត្តបាត់ដំបង។
លោក កោ ស៊ុនកាំង នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបាត់ដំបងឱ្យដឹងនៅរសៀលថ្ងៃទី ១១ សីហាថា ជនឈ្មោះ ឡី លី ភេទប្រុស អាយុ ២៧ ឆ្នាំ រស់នៅភូមិចកតូច ឃុំកកោះស្រុកម៉ោងឫស្សី ត្រូវបានលោកចៅក្រមស៊ើបសួរសម្រេចចេញដីកាឃុំខ្លួនក្នុងពន្ធនាគារ ហើយនៅវេលាថ្ងៃត្រង់នេះ (ថ្ងៃទី ១១ សីហា)។
លោកប្រាប់ថា៖ «ជនដៃដល់ត្រូវតុលាការឃុំខ្លួន បន្ទាប់ពីតំណាងអយ្យការចោទបទឃាតកម្មតាមមាត្រា១៩៩នៃក្រមព្រហ្មទណ្ឌ»។ ពាក់ពន្ធនឹងមាត្រា១៩៩នៃក្រមព្រហ្មទណ្ឌនេះ ប្រសិនប្រើតុលាការរកឃើញថា ជនត្រូវចោទពិតជាបានប្រព្រឹត្តមែននោះនឹងត្រូវផ្តន្ទាទោសដាក់ពន្ធនាគារពី ១០ ទៅ ១៥ ឆ្នាំ។
លោក ស គឹមឡុង អធិការនគរបាលស្រុកម៉ោងឫស្សីបាននិយាយដោយស្រង់តាមសម្តីអ្នកភូមិថា ជនឈ្មោះ ឡី លី និងជនរងគ្រោះឈ្មោះវ៉ាន់ ប្រឹក្សា ហៅញេស អាយុ ៥៥ ឆ្នាំ គឺជាមនុស្សរស់នៅក្នុងភូមិចកតូច ឃុំកកោះស្រុកម៉ោងឫស្សី ជាមួយគ្នា។
លោកបន្តថា ជនដៃដល់ម្នាក់នេះត្រូវបានប្រពន្ធរបស់គាត់ចុះចោលជាង ១ ឆ្នាំមកហើយ។ ចំពោះមូលហេតុដែលនាំឱ្យប្រពន្ធរត់ចោលនោះក៏ព្រោះតែជនសង្ស័យជាមនុស្សញៀនស្រា ហើយវាយដំប្រពន្ធទើបធ្វើឱ្យនាងទ្រាំរស់នៅជាមួយតទៀតមិនបាន។
លោកថ្លែងថា៖ «បើតាមខ្ញុំចុះសួរអ្នកភូមិគេគ្រប់គ្នាប្រាប់ថា ជនម្នាក់នេះដើរបង្ករឿងក្នុងភូមិស្ទើររាល់ថ្ងៃ។គាត់មានតែឪពុក តែឪពុកនោះទៅមានស្រីចោលគាត់រស់នៅតែលតោលម្នាក់ឯង»។
លោកបន្តតាមសម្តីអ្នកភូមិទៀតថា នៅថ្ងៃទី ៨ សីហា ជនសង្ស័យបានផឹកស្រាសអស់ ១ លីត្រ ក៏ស្រវឹងទោរ ហើយបានដើរប្រាប់អ្នកភូមិថាតាញេសបានរួមភេទជាមួយប្រពន្ធរបស់គាត់បាន៧ដង។
មួយសន្ទុះក្រោយមកស្រាប់តែអ្នកភូមិនាំគ្នាឆោឡោថា ឈ្មោះលោកតាញេស ត្រូវបានឈ្មោះ ឡី លី វាយត្រូវក្បាលនឹងត្បូងចប និងកាប់នឹងចបស្លាប់បាត់ហើយ ខណៈជនរងគ្រោះកំពុងសម្រាន្ត លក់ក្នុងខ្ទមពេលថ្ងៃត្រង់។
លោកបន្ថែមថា ក្រោយកើតហេតុ ប្រជាពលរដ្ឋបានរាយការណ៍ប្រាប់នគរបាលប៉ុស្តិ៍ឃុំកកោះចុះទៅឃាត់ខ្លួនជនសង្ស័យតែម្តង។ បន្ទាប់មកលោកបានចុះទៅស្រាវជ្រាវសួរប្រជាពលរដ្ឋហើយ ពលរដ្ឋប្រាប់ថា ជនរងគ្រោះជាមនុស្សស្លូតបូតហើយក៏មិនបានប្រព្រឹត្តដូចការចោទរបស់ជនសង្ស័យដែរ។ មានតែជនសង្ស័យទេ ដែលតែងតែបង្កបញ្ហាស្រែកឡោឡាជេរបញ្ចោដល់ពួកគេដែលរស់នៅក្នុងភូមិ។
បើតាមលោក គឹមឡុង ថា៖ «អ្នកភូមិថាជនល្មើសញៀនថ្នាំហើយបែកថ្នាំ តែខ្ញុំបានពិនិត្យទឹកនោមមិនឃើញមានផ្ទុកសាធារធាតុញៀនក្នុងខ្លួនទេ»៕