ព្រះសីហនុ៖ លោក កុល ផាលី ស្នងការរងខេត្តព្រះសីហនុទទួលបន្ទុកផ្នែកព្រហ្មទណ្ឌបានឲ្យដឹងនៅថ្ងៃទី ១១ ខែសីហាថា សមត្ថកិច្ចបានបញ្ជូនបុរសម្នាក់ទៅតុលាការខេត្តក្រោយពីមានហេតុការណ៍អគ្គិភ័យបណ្ដាលឱ្យមនុស្ស ៤ នាក់របួសធ្ងន់ និងស្រាល ហើយត្រូវបានតុលាការចោទប្រកាន់ពីបទប៉ុនប៉ងឃាតកម្មដោយចេតនាគិតទុកជាមុន។
លោក ផាលី បានថ្លែងថា៖ «លោក កោ វណ្ឌី ប្រធានសាលាដំបូងខេត្តព្រះសីហនុ និងជាចៅក្រមស៊ើបសួរក្នុងសំណុំរឿងនេះ បានសម្រេចចោទប្រកាន់បុរសសង្ស័យជាប្ដីឈ្មោះ កែវ ឆ្លូញ (អាយុ៥១ ឆ្នាំ)នោះពីបទប៉ុនប៉ងឃាតកម្ម ដោយមានចេតនាគិតទុកជាមុន តាមបញ្ញតិមាត្រា ១៩៩ និងមាត្រា ២០០ នៃក្រមព្រហ្មទណ្ឌនិងបានបង្គាប់ឲ្យនាំជនសង្ស័យយកទៅឃុំខ្លួនជាបណ្ដោះអាសន្ន នៅពន្ធនាគារខេត្តព្រះសីហនុ ដើម្បីរង់ចាំការជំនុំជម្រះទោសជាក្រោយ»។
យោងតាមបទចោទប្រកាន់ខាងលើនេះ ជនសង្ស័យនឹងប្រឈមការផ្តន្ទាទោសជាប់ពន្ធនាគារពី ១០ ឆ្នាំទៅ ១៥ ឆ្នាំ។
កាលពីម៉ោង ២:៣០ នាទីទៀបភ្លឺ ថ្ងៃទី ៨ ខែសីហា ឆ្នាំ ២០២១ មានករណីគ្រោះអគ្គិភ័យមួយកើតឡើង នៅភូមិព្រែកស្វាយ ឃុំ-ក្រុងកោះរ៉ុង ខេត្តព្រះសីហនុ បណ្ដាលឲ្យមនុស្សក្មេងចាស់ប្រុស-ស្រី ៤ នាក់បានរងរបួសធ្ងន់នឹងស្រាល។
ក្នុងហេតុការណ៍នោះ សមត្ថកិច្ចនគរបាលមូលដ្ឋាននិងក្រុមសង្គ្រោះនៃក្រុមហ៊ុន GTVC របស់លោក ឧកញ៉ា ទៀ វិចិត្រ បានជួយអន្តរាគមន៍នាំជនរងគ្រោះ៣នាក់ដែលរងរបួសធ្ងន់ទៅកាន់មន្ទីរពេទ្យខេត្តព្រះសីហនុ ដើម្បីពិនិត្យព្យាបាល។
ចំណែកជនរងគ្រោះម្នាក់ទៀត ដែលរងរបួសស្រាល ត្រូវបានឃាត់ខ្លួនភ្លាមៗ ក្រោយពីស្ត្រីរងគ្រោះជាប្រពន្ធ និងកូនបានចោទប្រកាន់ថា បានយកដបសាំងចាក់ស្រោចមកលើពួកគាត់ ជាប្រពន្ធ និងកូន ហើយដុតក្នុងបំណងសម្លាប់ផ្ដាច់ពូជ។
ការចោទប្រកាន់នេះ មានភាពស៊ីចង្វាក់គ្នាទៅនឹងការសន្និដ្ឋានរបស់សមត្ថកិច្ចមូលដ្ឋានដែលបានអះអាងថា អគ្គិភ័យនោះមិនបណ្ដាលឲ្យឆេះផ្ទះទេ គឺឆេះតែ ពូក ខ្នើយ និង ភួយ មុងប៉ុណ្ណោះ ហើយនៅកន្លែងកើតហេតុ សមត្ថកិច្ចបានរកឃើញដបសាំងចំណុះ ១ លីត្រ ១ ដប នៅលើគំនរពូក ដែលឆេះនោះ៕