ភ្នំពេញៈ ក្រសួងសុខភិបាលចេញសារាចរណែនាំដល់ក្រសួង ស្ថាប័នរដ្ឋ រដ្ឋបាលរាជធានី-ខេត្ត និងអង្គភាពពាក់ព័ន្ធដើម្បីរួមចំណែកដល់ការកាត់បន្ថយការរីករាលដាលនៃជំងឺកូវីដ ១៩។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការប្រតិបត្ដិនៃគណៈកម្មការអន្តរក្រសួង ដើម្បីប្រយុទ្ធប្រឆាំងនឹងជំងឺកូវីដ ១៩ កាលពីថ្ងៃទី ១០ ខែសីហា បានចេញសារាចរណែនាំស្ដីពីវិធានការនៃការរួមចំណែកកាត់បន្ថយការរីករាលដាលនៃជំងឺកូវីដ ១៩។
តាមរយៈសារាចរនេះ ស្ថាប័នរដ្ឋ ក្រុមហ៊ុន សហគ្រាស រោងចក្រ និងទីតាំងដែលមានអង្គការចាត់តាំង ត្រូវធ្វើតេស្តជាប្រចាំទៅលើមន្ត្រី និងបុគ្គលិករបស់ខ្លួន ដោយក្រសួងប្រៃសណីយ៍ និងទូរគមនាគមន៍បន្តចែកចាយឧបករណ៍តេស្តរហ័សក្នុងតម្លៃដើម។
តំបន់ដែលមានផ្ទុះជំងឺកូវីដ ១៩ ជាតំបន់បិទខ្ទប់ត្រូវបានកំណត់ធ្វើការវាយតម្លៃលើប្រជាពលរដ្ឋ ដែលមានការពាក់ព័ន្ធ និងធ្វើតេស្តរហ័ស ឬតេស្ត PCR ស្របតាមបទដ្ឋានបច្ចេកទេសសុខាភិបាល។ កន្លែងយកសំណាកសាធារណៈដោយមន្ត្រីសុខាភិបាលមូលដ្ឋាន ឬក្រុមអ្នកស្ម័គ្រចិត្តសម្រាប់ប្រជាពលរដ្ឋមិនមានលទ្ធភាពទិញឧបករណ៍តេស្តរហ័ស ត្រូវរៀបចំនៅតាមស្រុក ខណ្ឌ ឬឃុំ សង្កាត់។
ក្រសួងប្រៃសណីយ៍ និងទូរគមនាគមន៍ បន្តលក់ឧបករណ៍តេស្ដ ២ ខែទៀត ដើម្បីធ្វើឱ្យមានភាពសម្បូរណ៍ និងបន្សំទៅនឹងតម្លៃទីផ្សារ។ បន្ទាប់មកក្រសួងនឹងធ្វើការងារនេះឱ្យទៅអង្គភាពណាមួយទទួលខុសត្រូវ ឬទុកលទ្ធភាពឱ្យក្រុមហ៊ុនអាជីវកម្មក្នុងតម្លៃសមស្រប។
មន្ទីរពេទ្យឯកជន និងគ្លីនិកទាំងអស់ត្រូវផ្តល់សេវាធ្វើតេស្តរហ័សដល់ប្រជាពលរដ្ឋក្នុងតម្លៃទាបសមស្របដោយប្រើប្រាស់ឧបករណ៍តេស្ដរហ័សដែលទទួលស្គាល់ដោយក្រសួងសុខាភិបាល។ ឱសថស្ថាន និងឱសថស្ថានរងត្រូវលក់ឧបករណ៍តេស្តរហ័សក្នុងតម្លៃសមស្រប ដើម្បីឱ្យប្រជាពលរដ្ឋមានលទ្ធភាពទិញយកមកធ្វើតេស្ត ដោយមានការត្រួតពិនិត្យឱ្យបានហ្មត់ចត់ដោយក្រុមការងារសិក្សា និងស្រាវជ្រាវរកឱសថ និងបរិក្ខារសម្រាប់ប្រយុទ្ធនឹងជំងឺកូវីដ ១៩។
មូលដ្ឋានសុខាភិបាលសាធារណៈទាំងអស់ត្រូវប្រើប្រាស់ឧបករណ៍តេស្ដរហ័សផ្តល់ជូនដោយក្រសួងសុខាភិបាល។ សមត្ថកិច្ចពាក់ព័ន្ធត្រូវគ្រប់គ្រង និងត្រួតពិនិត្យឱ្យបានច្បាស់លាស់ ដើម្បីទប់ស្កាត់កុំឱ្យឧបករណ៍របស់រដ្ឋមាននៅលើទីផ្សារ៕