ភ្នំពេញៈ រដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជាលោក ជា វណ្ណដេត បានបញ្ជាក់ថា នៅសប្តាហ៍ក្រោយក្នុងខែសីហានេះ ក្រសួងនឹងដាក់លក់ឧបករណ៍ធ្វើតេស្តរហ័សរកមេរោគកូវីដ ១៩ (RapidTest) ដែលនាំចូលមកពីប្រទេសចិន ចំនួន ២ លានគ្រឿង ក្នុងតម្លៃដើម ២ ដុល្លារក្នុង ១ គ្រឿង ជូនដល់ប្រជាពលរដ្ឋ។
លោករដ្ឋមន្ត្រីបានលើកឡើងបែបនេះនៅក្នុងកិច្ចប្រជុំមួយតាមប្រព័ន្ធ Zoom ជាមួយប្រធានអង្គភាពព័ត៌មានមួយចំនួននៅកម្ពុជាកាលពីល្ងាចថ្ងៃទី ៩ ខែសីហាឆ្នាំ ២០២១។
លោក ជា វណ្ណដេត បានបញ្ជាក់បន្ថែមប្រាប់ ភ្នំពេញ ប៉ុស្ដិ៍ នៅថ្ងៃទី ១០ ខែសីហាថា ពេលនេះក្រសួងប្រៃសណីយ៍បានត្រៀមនាំមកនូវឧបករណ៍តេស្តរហ័សពីប្រទេសចិនចំនួន ២ លានគ្រឿង ដើម្បីលក់ជូនពលរដ្ឋតម្លៃត្រឹម ២ ដុល្លារ ដើម្បីចូលរួមចំណែកជួយដល់ការស្វែងរកមេរោគកូវីដ ១៩ ក៏ដូចជាទប់ស្កាត់ការរីករាលដាលជំងឺកូវីដ ១៩ ឱ្យទាន់ពេលវេលា។
លោករដ្ឋមន្ដ្រីបានបញ្ជាក់ថា៖ «ឧបករណ៍នេះងាយស្រួលប្រើប្រាស់ជាងមុន ដោយលូកតេស្តចូលរន្ធច្រមុះរាក់ៗ ហើយមានគុណភាពខ្ពស់ដដែល»។
ក្រសួងប្រៃសណីយ៍ និងទូរគមនាគមន៍ដោយអនុវត្ដតាមការណែនាំរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី ១ ខែកក្កដា ឆ្នាំ ២០២១ និងដើម្បីរួមចំណែកដល់កិច្ចខិតខំប្រឹងប្រែងរបស់រាជរដ្ឋាភិបាលក្នុងការទប់ស្កាត់ការរីករាលដាលជំងឺកូវីដ ១៩ បានទាន់ពេលវេលាក៏ធ្លាប់បាននាំចូលឧបករណ៍តេស្តរហ័សអង់ទីហ្ស៊ែនកូវីដ ១៩ (Covid-19 Rapid Antigen Test) ពីប្រទេសកូរ៉េ មកចែកចាយបន្តក្នុងតម្លៃដើម ៣,៧ ដុល្លារអាមេរិកក្នុង ១ គ្រឿងផងដែរ។
ក្រសួងបញ្ជាក់ថា ឧបករណ៍តេស្តរហ័សនេះនឹងត្រូវលក់ជូនក្នុងគោលដៅយកទៅប្រើប្រាស់តែប៉ុណ្ណោះ ដោយមិនត្រូវយកទៅលក់បន្តឡើយ។
យោងតាមសេចក្ដីប្រកាសព័ត៌មានរបស់ក្រសួងប្រៃសណីយ៍កាលពីថ្ងៃទី ២១ ខែកក្កដា បានបញ្ជាក់ថា កន្លងមកក្រសួងបានចាត់វិធានការជាបន្តបន្ទាប់ចំពោះជនឆ្លៀតឱកាសដែលបានយកឧបករណ៍តេស្តរហ័សអង់ទីហ្ស៊ែនកូវីដ ១៩ ទៅធ្វើអាជីវកម្មបន្តដែលខុសពីគោលការណ៍កំណត់ថា ឧបករណ៍នេះអាចទិញបានតែក្នុងគោលដៅប្រើប្រាស់ប៉ុណ្ណោះ។
ក្រសួងបញ្ជាក់ថា ជាក់ស្តែងក្រោយពីបានស៊ើបអង្កេតជាក់លាក់រួចមក ក្រសួងបានកំណត់មុខសញ្ញាជនឆ្លៀតឱកាសទាំងនោះ ហើយបានចុះទៅចាត់វិធានការភ្លាមៗនៅទីតាំងចំនួន ៥ និងរឹបអូសបានឧបករណ៍តេស្តចំនួន ៤ ២៥០ គ្រឿង ដែលឧបករណ៍តេស្តទាំងនោះបានបញ្ជាទិញពីក្រសួងប្រៃសណីយ៍ និងទូរគមនាគមន៍។
ការទិញឧបករណ៍តេស្តពីក្រសួងប្រៃសណីយ៍យកទៅធ្វើអាជីវកម្មបន្តនេះ ពុំបានផ្តល់ផលប្រយោជន៍អ្វីដល់ពលរដ្ឋឡើយ ក៏ប៉ុន្តែបែរជានាំឱ្យពលរដ្ឋខាតថវិកាស្របពេលកំពុងជួបការលំបាកពីជំងឺកូវី ១៩។
បច្ចុប្បន្នក្រសួងកំពុងបន្តនាំចូលឧបករណ៍តេស្តរហ័សនេះមកចែកចាយក្នុងតម្លៃដើមត្រឹមតែ ៣,៧ ដុល្លារអាមេរិក ដោយចែកចាយបន្តពីថ្ងៃចន្ទដល់ថ្ងៃអាទិត្យ ដែលជាមធ្យមក្នុង ១ ថ្ងៃចំនួន ៣៥០ ប្រតិបត្តិការបញ្ហាទិញរបស់ក្រុមហ៊ុនសហគ្រាស រោងចក្រ ស្ថាប័នដោយផ្ដល់អាទិភាពលើទីតាំងដែលកំពុងជួបហានិភ័យខ្ពស់ពាក់ព័ន្ធនឹងជំងឺកូវីដ ១៩។ នេះបើតាមការបញ្ជាក់ក្នុងសេចក្ដីប្រកាសព័ត៌មានដដែល ។
ជាមួយនេះដែរ ក្រសួងប្រៃសណីយ៍ក៏បានបញ្ជាក់ដែរថា នឹងបន្តសហការជាមួយអាជ្ញាធរមានសមត្ថកិច្ចដើម្បីកំណត់មុខសញ្ញាជនឆ្លៀតឱកាសហើយចាត់វិធានការឱ្យកាន់តែខ្លាំងក្លាបន្ថែមទៀតដោយមិនបណ្តោយឱ្យជនឆ្លៀតឱកាសទាំងនោះបង្កនូវបញ្ហា និងរំលោភបំពានលើគោលការណ៍កំណត់របស់ក្រសួងឡើយ៕
វីដេអូ៖