ភ្នំពេញៈ វ៉ាក់សាំងបង្ការជំងឺកូវីដ ១៩ ប្រភេទស៊ីណូវ៉ាក់ ចំនួន ៣ លានដូសបន្ថែមទៀត ដែលជាការបញ្ជាទិញរបស់រាជរដ្ឋាភិបាលកម្ពុជាបានដឹកពីប្រទេសចិន មកដល់កម្ពុជាហើយ នៅម៉ោងប្រមាណ ១០ ព្រឹកថ្ងៃទី ១២ ខែសីហានេះ។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានថ្លែងក្នុងពេលធ្វើជាអធិបតីទទួលវ៉ាក់សាំងស៊ីណូវ៉ាក់៣លានដូសនេះថា ថ្ងៃនេះរាជរដ្ឋាភិបាលបានសម្រេចផែនការជោគជ័យក្នុងការបញ្ជាទិញវ៉ាក់សាំងបង្ការជំងឺកូវីដ ១៩ ហើយវ៉ាក់សាំងបានដឹកមកដល់កម្ពុជា ដើម្បីផ្គត់ផ្គង់ការចាក់ជូនប្រជាពលរដ្ឋតាមផែនការជាបន្តបន្ទាប់មិនដែលអាក់ខានឡើយ។
លោកស្រីបានថ្លែងថា៖ «វ៉ាក់សាំងស៊ីណូវ៉ាក់នេះ ថ្ងៃនេះមកដល់ ៣ លានដូស យើងនៅសល់ប្រហែល ២ លានដូសទៀតនឹងដឹកមកដល់នៅសប្ដាហ៍ទី៣ ឬដើមសប្ដាហ៍ទី៤ នៃខែសីហានេះដើម្បីគម្រប់ចំនួន ១៦ លាន ៥ សែនដូសនៃវ៉ាក់សាំងស៊ីណូវ៉ាក់»។
លោកស្រីបានបញ្ជាក់ថា សរុបវ៉ាក់សាំងទាំងអស់ ទាំងវ៉ាក់សាំងដែលកម្ពុជាទើបទទួលបាន៣លានដូសទៀតនេះ កម្ពុជាបានទទួលវ៉ាក់សាំងសរុបជាង ២៤ លានដូសរួចមកហើយ។
តាមរយៈវ៉ាក់សាំងទាំងនេះបានជួយឱ្យកម្ពុជាចាក់វ៉ាក់សាំងជូនប្រជាពលរដ្ឋអាយុចាប់ពី ១៨ ឆ្នាំឡើងបានចំនួនជាង ៨ លាននាក់មកហើយនៃប្រជាជនគោលដៅ ១០ លាននាក់។ ដោយឡែកការចាក់វ៉ក់សាំងដល់កុមារ និងយុវវ័យអាយុចាប់ពី ១២ ឆ្នាំ ទៅក្រោម ១៨ ឆ្នាំ បានចំនួនជាង ៣៥ ម៉ឺននាក់ផងដែរ ក្នុងចំណោមប្រមាណ ២ លាននាក់។
កម្ពុជាត្រូវបានអង្គការសុខភាពពិភពលោក និងអង្គការសហប្រជាជាតិចាត់ទុកជាប្រទេសក្នុងតំបន់ និងពិភពលោកមួយដែលបានចាក់វ៉ាក់សាំងដល់ប្រជាពលរដ្ឋបានច្រើនជាងគេក្នុងនោះមានចាក់ជូនដល់គ្រូបង្រៀន ប្រជាពលរដ្ឋពេញវ័យនិងកុមារ។ ម្យ៉ាងទៀតបច្ចុប្បន្នកម្ពុជាក៏កំពុងបន្តផែនការចាក់វ៉ាក់សាំងដូសទី៣ ជូនក្រុមគ្រូពេទ្យ និងមន្ដ្រីជួរមុខ រួមនឹងអ្នកប្រតិបត្តិការងារប្រយុទ្ធប្រឆាំងជំងឺកូវីដ ១៩ ជួរមុខ ក៏ដូចជាជនអាទិភាពតាមក្រសួងស្ថាប័ននានាផងដែរ៕