កំពង់ឆ្នាំងៈ គិតចាប់ពីឆ្នាំ ២០១៩ រហូតដល់បច្ចុប្បន្ននេះ អាជ្ញាធរស្រុកបរិបូណ៌បានចាប់បញ្ជូនជនសង្ស័យចំនួន ២៤ នាក់ទៅតុលាការ ដើម្បីអនុវត្តទៅតាមនីតិវិធីពាក់ព័ន្ធនឹងការលបលួចឈូសឆាយទន្ទ្រានដីព្រៃលិចទឹក ដែលមានទំហំផ្ទៃដីសរុបជាង ១៩០ ហិកតា។
លោក ឈឹម វ៉ាន នាយខណ្ឌជលផលស្រុកបរិបូណ៌ប្រាប់ ភ្នំពេញ ប៉ុស្តិ៍ នៅថ្ងៃទី ១១ ខែសីហា ឆ្នាំ ២០២១ ថា ទោះជាយ៉ាងណា មនុស្សហាក់មិនមានការខ្លាចរអាបន្តិចណាឡើយ បន្ទាប់ពីជនសង្ស័យទាំងនេះត្រូវបានបញ្ជូនទៅតុលាការយ៉ាងណាក្តី ដោយនៅតែមានអ្នកប្រព្រឹត្តលបលួចឈូសឆាយព្រៃលិចទឹកនេះដដែលទៀត។
លោកបន្តថា ក្នុងករណីបន្តលបលួចឈូសឆាយដីព្រៃលិចទឹកនៅក្នុងភូមិសាស្ត្រស្រុកបរិបូណ៌នេះអាជ្ញាធរនឹងធ្វើកំណត់ហេតុ និងកសាងសំណុំរឿងបញ្ជូនទៅតុលាការ ដើម្បីបន្តនីតិវិធីបន្ថែមទៀត។ អាជ្ញាធរស្រុក មិនព្រងើយកន្តើយឡើយចំពោះករណីនេះ ព្រោះវាបានធ្វើឱ្យប៉ះពាល់ដល់ទីតាំងជម្រកត្រីពងកូននៅពេលដែលរដូវទឹកឡើងមកដល់។
លោកថ្លែងថា៖ «អាជ្ញាធរមានសមត្ថកិច្ច តែងតែចុះល្បាតជាប្រចាំ ហើយឱ្យតែឃើញកន្លែងណាមានករណីកាប់ទន្ទ្រាន ឬឈូសឆាយថ្មី យើងនឹងស្រាវជ្រាវធ្វើកំណត់ហេតុបញ្ជូនទៅតុលាការហើយ។ កន្លងមក យើងបានបញ្ជូនករណីទន្ទ្រានដីព្រៃលិចទឹកនេះ ដូចជាករណីនៅឃុំខុនរ៉ង ឃុំដំរីស្លាប់ ឃុំឆ្នុកទ្រូ និងទីតាំងផ្សេងទៀតទៅតុលាការដើម្បីអនុវត្តច្បាប់»។
បើតាមលោក ឈឹម វ៉ាន អ្នកដែលលបលួចឈូសឆាយដីព្រៃលិចទឹក នៅក្នុងភូមិសាស្ត្រស្រុកបរិបូណ៌ភាគច្រើនគឺជាប្រជាពលរដ្ឋដែលមានដីស្រែនៅជាប់ទីនោះ។ ប្រជាពលរដ្ឋទាំងនេះ លបលួចឈូសឆាយដីព្រៃលិចទឹកធ្វើជាកម្មសិទ្ធិក្នុងគោលបំណងពង្រីកដីកសិកម្មរបស់ពួកគេ ដោយមិនបានគិតដល់ជម្រកត្រីពងកូនឡើយ។
លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំងប្រាប់ភ្នំពេញប៉ុស្តិ៍នៅថ្ងៃទី ១១ ខែសីហាថា ករណីលបលួចឈូសឆាយដីព្រៃនេះ សាលាដំបូងខេត្តកំពង់ឆ្នាំងបានទទួលច្រើនករណី និងបានអនុវត្តទៅតាមនីតិវិធី។ ដោយឡែកចំពោះករណីនៅស្រុកបរិបូណ៌ សាលាដំបូងខេត្តក៏បានទទួលសំណុំរឿងច្រើនករណីដែរ ហើយករណីមួយចំនួនក៏សមត្ថកិច្ចកំពុងតែកសាងសំណុំរឿងបញ្ជូនមកដែរ។
ពាក់ព័ន្ធនឹងករណីខាងលើនេះ បន្ទាប់ពីមានការផ្សព្វផ្សាយពីករណីទន្ទ្រានដីព្រៃលិចទឹក ស្ថិតនៅក្នុងឃុំ ១ កន្លែងតាមបណ្តាញសង្គម រដ្ឋបាលស្រុកបរិបូណ៌ កាលពីថ្ងៃទី ៩ ខែសីហា បានចេញសេចក្តីបំភ្លឺមួយដោយទទួលស្គាល់ថា ពិតជាមានការលបលួចឈូសទន្ទ្រានដីព្រៃលិចទឹកពេលយប់ នៅតំបន់ត្រពាំងត្រស់ជាប់ព្រំប្រទល់ភូមិល្បើក និងភូមិកំពង់អូរ ឃុំខុនរ៉ងពិតប្រាកដមែន។
សេចក្តីបំភ្លឺដដែលបន្តថា កម្លាំងគណៈបញ្ជាការឯកភាព រដ្ឋបាលស្រុក និងសមត្ថកិច្ចជំនាញពាក់ព័ន្ធបានចុះទៅពិនិត្យ និងចុច GPS លើផ្ទៃដីខូចខាតទំហំប្រហែល ២៥ ហិកតា ដោយបានបោះស្លាកហាមឃាត់ចំនួន ៦ ស្លាក និងកំណត់មុខសញ្ញាជនល្មើសចំនួន ៤ នាក់ ដើម្បីកសាងសំណុំរឿងបញ្ជូនទៅតុលាការរួចរាល់អស់ហើយ ។
សេចក្តីបំភ្លឺដដែលបន្តថា កន្លងមក គណៈអភិបាលស្រុកបានយកចិត្តទុកដាក់ក្នុងការផ្សព្វផ្សាយច្បាប់ស្តីពីជលផល និងទោសបញ្ញត្តិផ្សេងៗជូនដល់ គណៈបញ្ជាការឯកភាពរដ្ឋបាលឃុំ ពិសេសតែងតែដឹកនាំកម្លាំងចម្រុះចុះពិនិត្យមើលព្រៃលិចទឹកជាប់ជាប្រចាំនៅគ្រប់តំបន់ទាំងអស់ធ្វើយ៉ាងណារួមចំណែកថែរក្សាការពារព្រៃលិចទឹក ដែលជាដែនជម្រកត្រីពងកូនឱ្យខាងតែបានជាដាច់ខាត ទោះបីមិនបានទាំងស្រុងក៏ដោយ៕