.jpg)
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ក្នុងកម្មវិធីនាថ្ងៃទី ១២ សីហា។ រូបថត ក្រសួងអប់រំ
ភ្នំពេញៈ លោក ហង់ជួន ណារ៉ុន រដ្ឋមន្ដ្រីក្រសួង អប់រំ យុវជន និងកីឡា ថ្លែងថាការរៀបចំ «ទិវាអន្តរជាតិសម្រាប់យុវជន» គឺមានសារៈសំខាន់ណាស់ ដើម្បីធ្វើយ៉ាងណាឱ្យមានការទទួលស្គាល់ពីតួនាទីរបស់យុវជននៅក្នុងការអភិវឌ្ឍជាតិ ពិសេសនៅក្នុងបរិបទកូវីដ ១៩ នេះ។
លោករដ្ឋមន្ដ្រីក្រសួងអបរំ ថ្លែងបែបនេះ ក្នុងឱកាសថ្លែងសុន្ទកថា អបអរសាទរ «ទិវាអន្តរជាតិសម្រាប់យុវជន» ក្រោមប្រធានបទស្តីពី «យុវជនប្រកបដោយនវានុវត្តន៍ ដើម្បីមនុស្សជាតិ និងសុខភាពជាសាកល» និងវគ្គផ្តាច់ព្រ័ត្រកម្មវីធីជជែកដេញដោលយុវជនថ្នាក់ជាតិ ២០២១ នៅថ្ងៃទី ១២ ខែ សីហា ឆ្នាំ ២០២១។
លោករដ្ឋមន្ដ្រីថ្លែងថា៖ «ការរៀបចំ «ទិវាអន្តរជាតិសម្រាប់យុវជន» នេះ គឺមានសារៈសំខាន់ណាស់ ដែលបង្កើតឡើងក្នុងក្របខ័ណ្ឌអង្គការសហប្រជាជាតិតាំងពីឆ្នាំ ១៩៩១ ដើម្បីធ្វើយ៉ាងម៉េចដើម្បីឱ្យមានការទទួលស្គាល់ពីតួនាទីរបស់យុវជននៅក្នុងការអភិវឌ្ឍជាតិ ពិសេសនៅក្នុងបរិបទកូវីដ ១៩ នេះ»។
លោក ហង់ជួន ណារ៉ុន បានលើកឡើងថា ដោយសារតែក្រសួងអប់រំបានរៀបចំកំណែទម្រង់និងការពង្រឹងគុណភាពអប់រំបានបង្កលក្ខណៈឱ្យយុវជនខិតខំប្រឹងប្រែងរៀនសូត្រ ហើយតាមរយៈកម្មវិធីជជែកដេញដោលថ្នាក់ជាតិឆ្នាំ ២០២១ ដែលឈានដល់វគ្គប្រកួតផ្ដាច់ព្រ័ត្រ ក្នុងនោះយុវជនមកពីសាលាចំណេះទូទៅមីគីវ៉េបានឈ្នះជយលាភីលេខ ១ និងយុវវជនមកពីសាលាប៊ែលធីអន្តរជាតិជយលាភីលេខ២។លោកថ្លែងថា កម្មវិធីនេះ ក៏ជាឱកាសមួយដើម្បីឱ្យយុវវជនអាចមានឱកាសបង្ហាញអំពីសមត្ថភាពរបស់ខ្លួនឯងផងដែរ។
លោករដ្ឋមន្ដ្រីថ្លែងថា៖«យើងសង្ឃឹមថាក្រោយកូវីដ ១៩ នេះ យើងនឹងឃើញសមិទ្ធផលថ្មីៗថែមទៀត។ ដូច្នេះហើយបានសម្ដេចតេជោនាយករដ្ឋមន្ដ្រីលោកក៏បានដាក់ចេញជាគោលនយោបាយឬហៅថាជាការប្ដេជ្ញាចិត្ដជំរុញឱ្យប្រទេសកម្ពុជា ក្លាយជាប្រទេសមួយដែលមានកម្រិតការអភិវឌ្ឍមធ្យមកម្រិតខ្ពស់ក្នុងឆ្នាំ ២០៣០ និងជាប្រទេសការអភិវឌ្ឍកម្រិតខ្ពស់នៅឆ្នាំ ២០៥០»។
លោករដ្ឋមន្ដ្រីបានលើកឡើងថា ប្រសិនបើយុវជនកម្ពុជា មិនមានចំណេះដឹង មិនមានបំណិនជីវិត មិនមានការអប់រំទូលំទូលាយទេ គឺមិនអាចឆ្លើយតបទៅនឹងការប្ដេជ្ញាចិត្ត ដែលបានដាក់ចេញជាខ្សែបន្ទាត់គោលនយោបាយរបស់រាជរដ្ឋាភិបាលបានទេ។
លោកបានបញ្ជាក់ថា៖១ដូច្នេះហើយបានជារាជរដ្ឋាភិបាលកម្ពុជា បានដាក់ចេញក្របខ័ណ្ឌគោលនយោបាយសេដ្ឋកិច្ច និងសង្គមឌីជីថល ហើយដើម្បីសម្រេចបានការអប់រំតាមប្រពន្ធឌីជីថលប្រកបដោយជោគជ័យគឺត្រូវមានការកែលម្អជាប្រចាំ ដើម្បីឱ្យឆ្លើយតបទៅនឹងតម្រូវការទីផ្សារ តម្រូវការនៃការអភវិឌ្ឍសេដ្ឋកិច្ច»។
ក្នុងទិវាយុវជនអន្តរជាតិ ថ្ងៃទី ១២ ខែ សីហា ឆ្នាំ ២០២១ នេះដែរ សមាគមសម្ព័ន្ធសហគមន៍កសិករកម្ពុជា (CCFC-Cambodia)បានលើកឡើងថាយុវជនបានចូលរួមចំណែកយ៉ាងខ្លាំងក្នុងការលើកកម្ពស់ខឿនសេដ្ឋកិច្ចនិងការអភិវឌ្ឍពិសេសវិស័យឧស្សាហកម្ម និងវិស័យកសិកម្ម។ប៉ុន្ដែទោះជាយ៉ាងណាពួកគេបានប្រឈមមុខបញ្ហាជាច្រើនដែលទាមទារឲ្យមានការរៀបចំយុទ្ធសាស្ត្រ និងវិធីសាស្ត្រក្នុងការពង្រឹងសិទ្ធិអំណាចដល់យុវជនយ៉ាងពិតប្រាកដ។
ដើម្បីបង្កើនការយល់ដឹងអំពីរបៀបដែលយុវជនទទួលបានព័ត៌មាននិងចូលរួមសកម្មភាពសង្គមកាន់តែច្រើនឬក្លាយជាពលរដ្ឋសកម្មក្នុងការឃ្លាំមើល ការសម្រេចចិត្តនៃដំណើរការអភិវឌ្ឍន៍និងលើកកម្ពស់សេដ្ឋកិច្ច សង្គម វប្បធម៌ លទ្ធិប្រជាធិបតេយ្យ អភិបាលកិច្ច តម្លាភាព សិទ្ធិមនុស្ស និងនយោបាយជាដើម។
CCFC បានលើកឡើថា ដោយសារបច្ចេកវិទ្យាឌីជីថល និងការប្រើប្រាស់ប្រព័ន្ធផ្សព្វផ្សាយសង្គម យុវជនអាចមានឱកាសចូលរួមនយោបាយ សេដ្ឋកិច្ច ជីវភាព អភិបាលកិច្ច តម្លាភាព និងការអភិវឌ្ឍសង្គមដោយបើកចំហ ដើម្បីឲ្យរដ្ឋាភិបាលស្ថាប័នពាក់ព័ន្ធទាំងជាតិ និងអន្តរជាតិរៀបចំ និងពិចារណាដាក់បញ្ចូលយុវជនគ្រប់ផ្នែកទៅក្នុងគោលនយោបាយជាតិ អន្តរជាតិ ពិសេសសម្រាប់យុវជននៅតាមជនបទនិងស្ត្រីវ័យក្មេង ព្រោះថាយុវជនជាង ៨០ ភាគរយរស់នៅតំបន់ជនបទ និងភាគច្រើនធ្វើការងារក្នុងវិស័យកសិកម្ម។
CCFC បញ្ជាក់ថា «សក្ដានុពលក្នុងការអភិវឌ្ឍវិស័យកសិកម្មតាមបណ្ដាខ្សែចង្វាក់កសិកម្មនេះគឺមានតម្លៃខ្ពស់ ដោយជាដំបូងត្រូវកែលម្អផលិតភាពកសិកម្មឲ្យប្រសើរឡើងដើម្បីបង្កើនប្រាក់ចំណូលដល់យុវកសិករ និងកសិករ»។
បើតាម CCFC ដើម្បីកសាងនិងលើកទឹកចិត្តដល់យុវជនជនបទចាំបាច់ត្រូវមានហេដ្ឋារចនាសម្ព័ន្ធប្រសើរជាងមុនដូចជា ធារាសាស្ត្រ និងបច្ចេកទេសកសិកម្ម ហើយកសិករវ័យក្មេង គួរត្រូវបានបណ្ដុះបណ្ដាលស្ដីពីការអភិវឌ្ឍជំនាញអាជីវកម្ម ទីផ្សារ បច្ចេកទេសដាំដុះ៕
