The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋាភិបាល​នឹង​ផ្តល់ប្រាក់​ឧបត្ថម្ភ​មន្ត្រីរាជការ​ក្នុង​ម្នាក់​ ៥ ​ម៉ឺន​រៀល​ សម្រាប់​បុណ្យ​ភ្ជុំបិណ្ឌ




រដ្ឋាភិបាល​នឹង​ផ្តល់ប្រាក់​ឧបត្ថម្ភ​មន្ត្រីរាជការ​ក្នុង​ម្នាក់​ ៥ ​ម៉ឺន​រៀល​ សម្រាប់​បុណ្យ​ភ្ជុំបិណ្ឌ

Content image - Phnom Penh Post
លោកនាយក​រដ្ឋមន្ត្រី ហ៊ុន សែន ជួប​ជាមួយ​មន្ត្រីរាជការ​កាល​ពី​ពេលកន្លងមក​។ ហេង ជីវ័ន

រដ្ឋាភិបាល​នឹង​ផ្តល់ប្រាក់​ឧបត្ថម្ភ​មន្ត្រីរាជការ​ក្នុង​ម្នាក់​ ៥ ​ម៉ឺន​រៀល​ សម្រាប់​បុណ្យ​ភ្ជុំបិណ្ឌ

ភ្នំពេញៈ ​រាជរដ្ឋាភិបាល​នឹង​ផ្តល់ប្រាក់​ឧបត្ថម្ភ​សម្រាប់​ឱកាស​បុណ្យ​ភ្ជុំបិណ្ឌ​ប្រពៃណីជាតិ ក្នុង​ម្នាក់​ទឹកប្រាក់ ៥ ​ម៉ឺន​រៀល​ទៅដល់​មន្ត្រីរាជការ​ស៊ីវិល និង​មន្ត្រី​ជាប់កិច្ចសន្យា ប្រមាណ​ ៥០ ​ម៉ឺន​នាក់​នៅ​ខែកញ្ញា​ខាងមុខ ដែល​សរុប​ទឹកប្រាក់​ខ្ទង់​ ៨ ​លាន​ដុល្លារ​។

លិខិត​ជូនដំណឹង​ស្តីពី​ការបើក​ផ្តល់​បៀវត្សរ៍​ជូន​មន្ត្រីរាជការ​ស៊ីវិល និង​មន្ត្រី​ជាប់កិច្ចសន្យា​សម្រាប់​ខែកញ្ញា ឆ្នាំ​ ២០២១ របស់​ក្រសួង​មុខងារ​សាធារណៈ​ដែល​ភ្នំពេញ​ប៉ុស្តិ៍​ទទួលបាន​កាលពី​ម្សិលមិញ​បានឱ្យដឹងថា ក្រសួង​នឹងធ្វើ​ការដាក់បញ្ចូល​ដោយ​ស្វ័យប្រវត្តិ​នូវ​ប្រាក់ឧបត្ថម្ភ​ក្នុង​ឱកាស​បុណ្យ​ភ្ជុំបិណ្ឌ​ប្រពៃណីជាតិ ចំនួន​ទឹកប្រាក់ ៥ ​ម៉ឺន​រៀល (​ប្រាំ​ម៉ឺន​) របស់​រាជរដ្ឋាភិបាល ទៅក្នុង​តារាង​ទូទាត់​ប្រាក់បៀវត្សរ៍​មន្ត្រីរាជការ​ស៊ីវិល និង​តារាង​ប្រាក់ឧបត្ថម្ភ​មន្ត្រី​ជាប់កិច្ចសន្យា​។

ការផ្តល់ជូន​នេះ​ធ្វើឡើង​ដោយ​យោង​តាម​អនុក្រឹត្យ​លេខ​ ៤១ ចុះ​ថ្ងៃទី​ ១៩ ខែមីនា ឆ្នាំ​ ២០២១ ស្តីពី​ការផ្តល់​ប្រាក់ឧបត្ថម្ភ​ក្នុងឱកាស​ពិធី​ចូលឆ្នាំថ្មី​ប្រពៃណីជាតិ និង​ពិធីបុណ្យ​ភ្ជុំបិណ្ឌ ក្នុង​ ២០២១ ​នេះ​។

លិខិត​សរសេរថា​៖ «​ការបើក​ផ្តល់ប្រាក់​ឧបត្ថម្ភ​ក្នុង​ឱកាស​បុណ្យ​ភ្ជុំបិណ្ឌ​ប្រពៃណី​ជាតិ​នេះ គឺ​ត្រូវ​រៀបចំ​អនុវត្ត​ក្នុងពេល​ជាមួយគ្នា​នៃ​ការបើក​ផ្តល់​ប្រៀវត្សរ៍​លើក​ទី​ ២ ក្នុង​ខែកញ្ញា ឆ្នាំ​ ២០២១»​។

យោងតាម​អនុក្រឹត្យ​ចុះហត្ថលេខា​ដោយ​លោកនាយក​រដ្ឋមន្ដ្រី ហ៊ុន សែន ​កាលពី​ថ្ងៃទី​ ១៩ ខែមីនា គឺ​បានសម្រេច​ផ្តល់ប្រាក់​ឧបត្ថម​ក្នុង​ឱកាស​ពិធីបុណ្យ​ចូលឆ្នាំថ្មី​ប្រពៃណីជាតិ និង​ពិធីបុណ្យ​ភ្ជុំបិណ្ឌ ចំនួន​ ៥០ ០០០ ​រៀល​ក្នុង​ម្នាក់ ជូន​ដល់​មន្ត្រី​រាជការ​ស៊ីវិល​នៃ​ក្រុម​នីតិប្បញ្ញត្តិ នីតិប្រតិបត្តិ តុលាការ មន្ត្រី​នគរបាលជាតិ មន្ត្រី​ពន្ធនាគារ ក្រសួងមហាផ្ទៃ យោធិន​នៃ​កងយោធពល​ខេមរភូមិន្ទ មន្ត្រី​រាជការ​នៃ​អាជ្ញាធរ​សវនកម្ម​ជាតិ មន្ត្រីរាជការ​នៃ​គណៈកម្មាធិការ​ជាតិ​រៀបចំ​ការបោះឆ្នោត មន្ត្រី​ខុទ្ធការល័យ​ដូច​មាន​ក្នុង​អនុក្រឹត្យ​លេខ​ ១១ ​ចុះ​ថ្ងៃទី​ ៣១ ខែមករា ឆ្នាំ​ ២០១៧ ​ស្តីពី​ការរៀបចំ និង​ការប្រព្រឹត្តទៅ​របស់​ខុទ្ទកាល័យ​នាយករដ្ឋមន្ត្រី​។

តាមរយៈ​អនុក្រឹត្យ​នោះ​លោកនាយក​រដ្ឋមន្ដ្រី​បញ្ជាក់ថា ក្នុង​មន្ដ្រីរាជការ​ម្នាក់ៗ​នឹង​ទទួលបាន​ប្រាក់ឧបត្ថម្ភ ៥ ​ម៉ឺន​រៀល សម្រាប់​ពិធី​ចូលឆ្នាំថ្មី​ហើយ ៥ ម៉ឺន​រៀល​ទៀត​សម្រាប់​ពិធីបុណ្យ​ភ្ជុំបិណ្ឌ​។ លោក​បាន​ថ្លែងថា​៖ «​ក្រសួង​សេដ្ឋកិច្ច​ និង​ហិរញ្ញវត្ថុ និង​ក្រសួង​ស្ថាប័ន​សាមី​ត្រូវ​សហការ​ និង​ចាត់ចែង​រៀបចំ​ការបើក​ផ្តល់​ជា​បុរេប្រទាន​សម្រាប់​ប្រាក់ឧបត្ថម្ភ​ក្នុង​ឱកាស​បុណ្យ​ភ្ជុំបិណ្ឌ​ឱ្យដល់​សមីជន​ម្នាក់ៗ នៅក្នុងពេល​បើក​បៀវត្សរ៍​មុន​ពិធីបុណ្យ​ភ្ជុំបិណ្ឌ​» ។

លោក យក់ ប៊ុនណា អ្នកនាំពាក្យ​ក្រសួង​មុខងារ​សាធារណៈ​ថ្លែង​ពី​ម្សិលមិញ​ថា ស្ថានភាព​កូវីដ​ ១៩ ធ្វើឱ្យ​រដ្ឋាភិបាល​ប្រឈម​នឹង​ការដោះស្រាយ​បញ្ហា​ជាច្រើន ប៉ុន្តែ​យ៉ាងណា​ក៏ដោយ​រដ្ឋាភិបាល​នៅតែ​គិតគូរ​ទៅដល់​ជីវភាព​របស់​មន្ត្រីរាជការ និវត្តជន និង​អ្នក​ដែល​បាន​ចូលរួម​ផ្តល់​សេវាសាធារណៈ​ទាំងអស់ ទាំង​ថ្នាក់ជាតិ និង​ថ្នាក់ក្រោមជាតិ​។

លោក​ថ្លែងថា៖ «​ថវិកា​ភ្ជុំបិណ្ឌ​ខាងមុខនេះ​យើង​គ្រោង​ចំណាយ​ខ្ទង់​ ៨ លាន​ដុល្លារ សម្រាប់​ទាំង​មន្ត្រីរាជការ​ស៊ីវិល កងកម្លាំង​ប្រដាប់អាវុធ មន្ត្រី​ជាប់កិច្ចសន្យា​និវត្តជន​មន្ត្រី​នៅក្នុង​ក្រុមប្រឹក្សា​រហូត​ទៅដល់​ភូមិ ឃុំ​។ គ្រួសារ​របស់​អតីត​យុទ្ធជន​ក៏​រដ្ឋាភិបាល​ឧបត្ថម្ភ​ដែរ គឺ​គ្រួសារ​អតីតយុទ្ធជន​ដែល​ពិការ ឬ​មរណភាព​ដែលមាន​ក្នុង​ប្រព័ន្ធ​របស់​យើង​។ បើ​សរុប​ចំនួន​មនុស្ស​ប្រហែល​ ៥០ ​ម៉ឺន​នាក់​»​។

លោក ប៉ិច ពិសី នាយកប្រតិបត្តិ​នៃ​អង្គការ​តម្លាភាព​កម្ពុជា​ថ្លែង​ពី​ម្សិលមិញ​ថា​ការធ្វើ​តុល្យភាព​ផ្នែក​ហិរញ្ញវត្ថុ​ជា​រឿង​សំខាន់​ណាស់ ព្រោះ​ត្រូវ​ការចំណាយ​ច្រើន​ទាក់ទង​ និង​វិបត្តិ​ជំងឺឆ្លង​កូវីដ​ ១៩ ​ប៉ុន្តែ​យ៉ាងណា​ការឧបត្ថម្ភ​ថវិកា​នេះ​ជា​រឿង​ល្អ​សម្រាប់​មន្ត្រីរាជការ​។ បើតាម​លោក ពិសី ការបើកប្រាក់​ឧបត្ថម្ភ​ដល់​មន្ដ្រីរាជការ នាពេល​បច្ចុប្បន្ន គឺ​មិនសូវ​មាន​ភាពមិនប្រក្រតី​ដូច​ពី​ច្រើន​ឆ្នាំមុន​ទេ ព្រោះ​ប្រើប្រាស់​តាម​ប្រព័ន្ធ​ធនាគារ​។

លោក​ថ្លែងថា​៖ «​លើកលែងតែ​មន្ត្រី​គាត់​មាន​ការស៊ុមគ្រលំ​ជូន​ ឬ​ឱ្យ​សាគុណ​តាម​វិធី​ណាមួយ អាហ្នឹង​ជា​រឿង​របស់គាត់ ប៉ុន្តែ​ការកាត់លុយ​ផ្តេសផ្តាស គឺ​លែងមាន​ទៀតហើយ​បើតាម​អ្វីដែល​ខ្ញុំ​បានដឹង​។ មួយទៀត​ដោយសារ​យើង​មាន​ប្រព័ន្ធ​អនឡាញ​ហ្នឹង​គឺ​មានន័យថា អត្តសញ្ញាណ​របស់​មន្ត្រី​គឺជា​មន្ត្រី​ពិត​លែង​មាន​មន្ត្រី​ខ្មោច​ដូច​មុន​ទៀតហើយ​»៕

វីដេអូ៖

អត្ថបទគួរចាប់អារម្មណ៍