ព្រះវិហារៈ មន្ត្រីនៃមជ្ឈមណ្ឌលសកម្មភាពកំចាត់មីនកម្ពុជាកាលពីថ្ងៃទី ១១ សីហា បានរាវគ្រាប់មីនតោនបាន ១១ គ្រាប់ បន្ទាប់ពីពលរដ្ឋប្រទះឃើញនៅភូមិតេជោបុស្បូវ ឃុំសាអែម ស្រុកជាំក្សាន្ត ខេត្តព្រះវិហារ ហើយបានរាយការណ៍ទៅអាជ្ញាធរដែនដី។
លោក លិញ យុត អភិបាលរងស្រុកជាំក្សាន្តទទួលការងារដោះស្រាយអាវុធជាតិផ្ទុះបានប្រាប់ភ្នំពេញប៉ុស្ដិ៍ពីម្សិលមិញថា គ្រាប់មីនតោន ១១ គ្រាប់ ដែលកប់ក្នុងដីពីសម័យសង្គ្រាមនោះ ត្រូវបានមន្ត្រីជំនាញរបស់មជ្ឈមណ្ឌលសកម្មភាពកំចាត់មីនកម្ពុជា (CMAC) ដោះយកមករក្សាទុកដោយសុវត្ថិភាពហើយ។
លោកបន្តថា ការដោះគ្រាប់មីនតោននេះ បន្ទាប់ពីមានបុរសកសិករម្នាក់បានទៅកាប់ឆ្ការស្មៅនៅដីចម្ការកាលពីថ្ងៃទី ១១ សីហា ហើយប្រទះឃើញគ្រាប់មីនតោន ១ គ្រាប់។ នៅពេលនោះគាត់បានរាយការណ៍មកនគរបាលប៉ុស្តិ៍ឃុំសាអែមហើយនគរបាលបានរាយការណ៍បន្តមកមន្ត្រីរបស់លោក។
លោក លិញ យុត បានបន្តថា ក្រោយទទួលបានសេចក្តីរាយការណ៍ភ្លាមគឺលោកបានជូនដំណឹងទៅមន្ត្រី CMAC ដែលឈរជើងនៅស្រុកជាំក្សាន្តចុះដាក់ម៉ាស៊ីនរាវរកគ្រាប់មីនតែម្តង។
ដំបូងឡើយ មន្ត្រីជំនាញរាវយកគ្រាប់មីនបាន ១ គ្រាប់ទេ ហើយពេលរាវបន្តក៏ឃើញគ្រាប់មីនរហូតដល់ ១១ គ្រាប់។
លោកបានបញ្ជាក់ថា៖ «គ្រាប់មីនទាំងនោះនៅមានគុណភាព តែខាងជំនាញគាត់បន្សាបទៅជាសំណល់ដែលមានតែសម្បកគ្រាប់ទេ។ គាត់ដោះគីបដោះស្នូលចេញអស់ហើយ។ វាអត់ផ្ទុះទេ»។
លោកបានរៀបរាប់ថា ស្រុកជាំក្សាន្ត គឺជាអតីតតំបន់សមរភូមិក្នុងសម័យសង្គ្រាមហើយឃុំទាំង ៨ ក្នុងស្រុកជាំក្សាន្តសុទ្ធតែសម្បូរគ្រាប់មីនតោនដែលខ្មែរក្រហមកប់ដី ដើម្បីការពារបន្ទាយរបស់ពួកគេ។ ប៉ុន្តែដោយសារមានកងទី ៦ របស់ CMAC អង្គការដោះមីនហេឡូត្រាស់ និងអង្គការដោះមីនកម្ពុជា បានមកឈរជើងនៅក្នុងស្រុកជាំក្សាន្តគឺមន្ត្រីជំនាញដោះគ្រាប់មីនបានចំនួនច្រើនមកហើយ។
លោកបានប្រាប់ថា៖ «កាលពីខែប្រាំងគោយន្តកែច្នៃបានជាន់មីនតោនផ្ទុះ ១ គ្រាប់ និងរបួសមនុស្សម្នាក់។ ក្នុងដើមឆ្នាំ ២០២១ មកទល់ខែសីហានេះមានករណីជាន់មីនផ្ទុះតែ ២ ទៅ ៣ ករណី និងគ្មានអ្នកស្លាប់ទេ» ចំពោះគ្រាប់មីនតោន ១១ គ្រាប់នោះ នៅឆ្ងាយពីផ្លូវប្រហែល ៦០០ ម៉ែត្រឯណោះស្ថិតនៅក្នុងភូមិតេជោបុសស្បូវ និងឆ្ងាយពីផ្ទះពលរដ្ឋ។
ទាក់ទងនឹងករណីគ្រាប់យុទ្ធភណ្ឌមិនទាន់ផ្ទុះនេះដែរ លោក ហេង រតនា អគ្គនាយកនៃមជ្ឈមណ្ឌលកំចាត់មីនកម្ពុជាបានសរសេរសារលើហ្វេសប៊ុករបស់លោកកាលពីម្សិលមិញថា នៅព្រឹកថ្ងៃទី ១២ សីហា កម្លាំងជំនាញអង្គភាពស៊ីម៉ាក់បានបោសសម្អាតគ្រាប់ទម្លាក់ពីយន្តហោះប្រភេទ MK-82 ទម្ងន់ប្រមាណ ២៣០ គីឡូក្រាម បានចំនួន ១ គ្រាប់ដែលស្ថិតនៅក្នុងភូមិបឹងគ្រើល សង្កាត់ឪឡោក ខណ្ឌកំបូល រាជធានីភ្នំពេញ៕