.jpg)
សមត្ថកិច្ចពេលកំពុងកាប់ដើមកញ្ឆាពីថ្ងៃទី ១១ សីហា។ រូបថត ប៉ូលិស
តាកែវៈ សមត្ថកិច្ចស្រុកគិរីវង់កំពុងស្វែងរកមុខអ្នកលួចដាំដើមកញ្ឆានៅឃុំតាអូរ ស្រុកគិរីវង់ ខេត្តតាកែវ បន្ទាប់ពីបានកាប់បំផ្លាញដំណាំកញ្ឆាក្នុងភូមិសាស្ត្រនេះចំនួន ៥ ទីតាំង និងបំផ្លាញអាងស្តុកទឹកចំនួន ៤ ក្នុងផ្ទៃដីដាំដុះប្រមាណ ៣ ១៨៩ ម៉ែត្រការ៉េ ពីថ្ងៃទី ១១ ខែសីហា។
នេះបើតាមរបាយការណ៍អគ្គស្នងការដ្ឋាននគរបាលជាតិ។
យោងតាមអគ្គស្នងការដ្ឋាននគរបាលជាតិបានបញ្ជាក់ពីម្សិលមិញថា សមត្ថកិច្ចស្រុកគិរីវង់បានបន្តការចុះជាប្រចាំក្នុងការបង្ការ ទប់ស្កាត់ បង្ក្រាបបទល្មើសដំណាំកញ្ឆាខុសច្បាប់ដូចភ្លៀងរលឹម ជាពិសេសអនុវត្តគោលនយោបាយភូមិ ឃុំ មានសុវត្ថិភាព។
ជាក់ស្ដែងនៅថ្ងៃទី ១១ សីហា នគរបាលស្រុកបានបំផ្លាញដើមកញ្ឆានៅទីតាំង ៥ កន្លែង និងអាងស្តុកទឹកចំនួន ៤ នៅឃុំតាអូរ ស្រុកគិរីវង់ លើផ្ទៃដីប្រមាណ ៣ ១៨៩ ម៉ែត្រការ៉េ។
យ៉ាងណាក្ដីអគ្គស្នងការដ្ឋាននគរបាលជាតិមិនបានបញ្ជាក់ពីចំនួនដើមកញ្ឆាដែលបានបំផ្លាញនោះទេ ប៉ុន្តែបានឱ្យដឹងថា បច្ចុប្បន្នកម្លាំងជំនាញកំពុងស្រាវជ្រាវស្វែងរកម្ចាស់ទីតាំងជាអ្នកដាំដំណាំកញ្ឆាខាងលើ ដើម្បីយកមកផ្តន្ទាទោសតាមផ្លូវច្បាប់។
លោក ភឿង សារុន នាយការិយាល័យគ្រឿងញៀនខេត្តតាកែវ ប្រាប់ភ្នំពេញប៉ុស្តិ៍ពីម្សិលមិញថា អ្នកដែលលួចដាំដើមកញ្ឆានេះ ត្រូវបានសង្ស័យថាជាពលរដ្ឋក្នុងមូលដ្ឋាន ព្រោះដំណាំកញ្ឆានេះប្រើពេលតែ ៣ ខែ និងទទួលបានផលច្រើនជាងការធ្វើស្រែចម្ការ។
លោកបន្តថា ការចុះទៅបង្ក្រាបនេះសមត្ថកិច្ចមានផលលំបាកខ្លាំង ព្រោះពលរដ្ឋបានលួចដាំនៅលើភ្នំ ជ្រលងភ្នំ និងជ្រលងអូរជាដើម ជាពិសេសគឺពួកគាត់លួចដាំនៅកន្លៀតថ្មភ្នំ ដែលពិបាកក្នុងការចុះទៅបង្ក្រាប។
លោកបានបញ្ជាក់ថា៖ «យើងបង្ក្រាបនៅខាងលិច ពួកគាត់ទៅលួចដាំនៅខាងកើត ព្រោះតំបន់នេះនៅជាប់ព្រំប្រទល់ខ្មែរ-វៀតណាម។ ពួកគាត់ចេះតែឆ្លៀតឱកាស យើងចេះតែបន្តបង្ក្រាប។ ម្យ៉ាងយើងនៅមូលដ្ឋានមានការងារច្រើន មិនបានមើលដិតដល់ គាត់ក៏លួចទៅដាំ»។
បើតាមលោក ភឿង សារុន នៅពេលដែលទទួលបានផលដំណាំកញ្ឆានេះ ពលរដ្ឋបានយកទៅចែកចាយឱ្យឈ្មួញបន្តទៀត ប៉ុន្តែលោកមិនបានដឹងថា ពួកគាត់ចែកចាយឱ្យទៅឈ្មួញនៅទីណា និងឈ្មួញយកទៅកែច្នៃទៅជាអ្វីនោះទេ ព្រោះកញ្ឆានេះតាមច្បាប់មិនត្រូវបានអនុញ្ញាតឱ្យដាំដុះ និងធ្វើអាជីវកម្មនោះទេ។
លោក ភឿង សារុន ឱ្យដឹងទៀតថា កន្លងមកកម្លាំងសមត្ថកិច្ចបានចុះផ្សព្វផ្សាយ និងអប់រំជូនប្រជាពលរដ្ឋនៅក្នុងមូលដ្ឋាននេះមិនឱ្យមានការលួចដាំដំណាំកញ្ឆានោះទេ ព្រោះវាប៉ះពាល់ដល់ផ្លូវច្បាប់ និងប្រឈមទោសទណ្ឌ។ បន្ទាប់ពីការផ្សព្វផ្សាយ និងអប់រំមក ករណីលួចដាំដំណាំកញ្ឆាពីសំណាក់ប្រជាពលរដ្ឋបានធ្លាក់ចុះពី ៦០ ទៅ ៧០ ភាគរយ៕
