.jpg)
យុវជនដែលត្រូវបានតុលាការចោទប្រកាន់ រឿងរួមភេទជាមួយក្មេងស្រី។ រូបថត នគរបាល
កណ្តាលៈ តុលាការខេត្តកណ្តាលពីថ្ងៃទី ១១ សីហា បានសម្រេចឃុំខ្លួនយុវជនម្នាក់នៅពន្ធនាគារខេត្តក្នុងរឿងរួមភេទជាមួយប្អូនស្រីជីដូនមួយវ័យ ១២ ឆ្នាំប្រព្រឹត្តនៅឃុំពញាឮ ស្រុកពញាឮ កាលពីពេលថ្មីៗនេះ។
លោក រស់ សារិន នាយការិយាល័យប្រឆាំងការជួញដូរមនុស្ស និងការពារអនីតិជនខេត្តកណ្តាលប្រាប់នៅថ្ងៃទី ១២ សីហាថា ជនត្រូវចោទឈ្មោះ ឈួន ណាន់ ហៅ ម៉ី អាយុ ១៩ ឆ្នាំជាកម្មកររោងចក្រត្រូវបានចៅក្រមស៊ើបសួរ ខេត្តកណ្តាល ចេញដីការឃុំខ្លួនក្នុងពន្ធនាគារហើយ។
លោកថ្លែងថា៖ «គាត់ត្រូវចោទពាក់ព័ន្ធបទរួមភេទជាមួយអនីតិជនក្រោមអាយុ ១៥ ឆ្នាំ តាមមាត្រា ៤២ ច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ»។ ពាក់ព័ន្ធបទចោទមាត្រា ៤២ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទនេះបើតុលាការរកឃើញថា ជនត្រូវចោទពិតជាប្រព្រឹត្តមែននោះ ត្រូវប្រឈមទោសដាក់ពន្ធនាគារពី ៥ ទៅ ១០ ឆ្នាំ។
ពាក់ព័ន្ធអង្គហេតុនេះត្រូវបានលោក ពេញ វុទ្ធី នាយផ្នែកព្រហ្មទណ្ឌស្រុកពញាឮឱ្យដឹងនៅថ្ងៃទី ១២ សីហាថា ក្មេងស្រីរងគ្រោះមានឈ្មោះ ស.ល អាយុ ១២ ឆ្នាំមានលំនៅភូមិ-ឃុំពញាឮ ស្រុកពញាឮ ខេត្តកណ្តាល។ ក្មេងរងគ្រោះ ក៏ត្រូវជាបងប្អូនជីដូនមួយរបស់ជនល្មើសដែរ។
លោកថា៖ «រឿងនេះទាំងជនរងគ្រោះ ទាំងជនល្មើសប្រាប់សមត្ថកិច្ចដូចគ្នា គឺរួមភេទបាន ៣ ដង។ នេះជាចម្លើយស៊ីចង្វាក់គ្នារបស់ពួកគេ»។ លោក វុទ្ធី បានរំឭកតាមសម្តីម្តាយក្មេងស្រីថា ផ្ទះរបស់គាត់ និងផ្ទះឪពុកម្តាយរបស់ជនសង្ស័យនៅក្នុងភូមិជាមួយគ្នា ហើយក៏នៅមិនឆ្ងាយពីគ្នាប៉ុន្មានដែរ។ ប៉ុន្តែគាត់ក៏មិនបានចាប់អារម្មណ៍ថា កើតមានហេតុការណ៍អាក្រក់បែបនេះដែរ ព្រោះពួកគេជាបងប្អូនជីដូនមួយជាមួយគ្នា។
លោកបានស្រង់សម្តីស្ត្រីជាម្តាយក្មេងរងគ្រោះថា៖ «បងប្អូនជីដូនមួយ ប្រៀបដូចជាបងប្អូនបង្កើតអ៊ីចឹងដែរ។ តែហេតុអ្វីបានជាធ្វើទៅរួច»។ ករណីនេះ គឺម្តាយក្មេងស្រីរងគ្រោះកាលពីថ្ងៃទី ៩ សីហាដោយសង្កេតឃើញអាការៈរបស់កូនស្រីគាត់ ខុសប្រក្រតីក៏ហៅសួរ។ បន្ទាប់ពីសួរកូនដឹងរឿងហេតុអស់ គាត់ក៏បានមកប្តឹងសមត្ថកិច្ចនៅប៉ុស្តិ៍រដ្ឋបាលឃុំពញាឮ នៅថ្ងៃទី ៩ សីហា។ បន្ទាប់មកលោកអធិការ ស្រុកពញាឮ ដួង តេង បានជូនដំណឹងទៅការិយាល័យប្រឆាំងការជួញដូរមនុស្សខេត្តកណ្តាល និងអយ្យការសាលាដំបូងខេត្តកណ្តាល។
ក្រោយទទួលបានបញ្ជាពីអយ្យការអមសាលាដំបូងខេត្តកណ្តាលមក កម្លាំងសមត្ថកិច្ចបានចុះទៅឃាត់ខ្លួនជនសង្ស័យនៅថ្ងៃទី ៩ សីហាតែម្តង។
បើតាមលោក វុទ្ធី ក្រោយឃាត់ខ្លួនគឺជនសង្ស័យបានសារភាពថា រូបគេពិតជាបានរួមភេទជាមួយជនរងគ្រោះបាន ៣ ដងពិតមែន។ ចំណែកក្មេងស្រីរងគ្រោះក៏បាននិយាយប្រាប់សមត្ថកិច្ចដែរថា ឈ្មោះ ឈួន ណាន់ បានលួងលោមនាងរួមភេទបាន ៣ ដងមែន៕
