តាកែវៈ អាជ្ញាធរស្រុកបាទី ចុះអប់រំ និងណែនាំដល់ប្រជាពលរដ្ឋ ដែលមកកម្សាន្តរណ្ដៅថ្មមួយកន្លែង ស្ថិតនៅភ្នំចំបាប់ ក្នុងឃុំត្នោត ខេត្តតាកែវ និងប្រកាសហាមឃាត់ មិនឱ្យមកកម្សាន្តនៅតំបន់នេះជាបណ្ដោះអាសន្ន ដោយអះអាងថា ខុសនឹងបម្រាមរបស់រដ្ឋាភិបាល ខណៈរណ្ដៅទឹកនេះនឹងធ្វើឱ្យប៉ះពាល់ដល់សុខភាព។
លោក ឈន ទ្រឿន អធិការរងស្រុកបាទី បានប្រាប់ ភ្នំពេញ ប៉ុស្តិ៍ នៅថ្ងៃទី ១១ សីហាថា កាលពីថ្ងៃទី ១០ សីហា អាជ្ញាធរចម្រុះស្រុកបាទី បានដឹកនាំកម្លាំង ចុះអប់រំណែនាំដល់ប្រជាពលរដ្ឋដែលបាននាំគ្នាមកកម្សាន្តនៅរណ្តៅថ្មនេះ ជាមួយនឹងអប់រំណែនាំ អាជ្ញាធរក៏បានធ្វើការហាមឃាត់ មិនឱ្យប្រជាពលរដ្ឋ មកជួបជុំកម្សាន្តនៅតំបន់នេះផងដែរ ដោយសំអាងថា ផ្ទុយនឹងបម្រាមរបស់រដ្ឋាភិបាល ដែលប្រកាសបិទរាល់រមណីយដ្ឋាន និងការជួបជុំក្នុងលក្ខណៈទ្រង់ទ្រាយធំ ដើម្បីបង្ការទប់ស្កាត់ការរីករាលដាលជំងឺកូវីដ ១៩។
លោកអះអាងថា៖ «ក្រៅពីពួកគាត់មកកម្សាន្តនៅទីនេះ ផ្ទុយនឹងបម្រាមហើយ រណ្តៅទឹកនេះក៏មានគ្រោះថ្នាក់ដល់សុខភាពរបស់ពួកគាត់ផងដែរ ព្រោះវាគឺកម្អែលនៃគ្រាប់រំសេវ គីមី ដែលគេបំផ្ទុះយកថ្ម។ សំខាន់គាត់មកកម្សាន្តកន្លែងនេះ គឺសុទ្ធតែប៉ះពាល់នឹងសុខភាពរបស់គាត់ទាំងអស់ ដែលយើងត្រូវតែហាមឃាត់»។
បើតាមលោក ឈន ទ្រឿន រណ្តៅនេះ គឺជារណ្តៅដែលក្រុមហ៊ុនឯកជន ធ្វើការបំផ្ទុះយកថ្មភ្នំ ហើយវាត្រូវបានក្រុមហ៊ុនទុកចោល ក្រោយរដ្ឋបាលខេត្តប្រកាសផ្អាកអាជីវកម្ម ដោយសារតែបង្កផលប៉ះពាល់ដល់អ្នកស្រុកដែលរស់នៅក្បែរនោះ។ ក្រោយរណ្តៅនេះទុកចោលមួយរយៈ វាកកើតជាទឹកដក់ថ្លា ដែលធ្វើឱ្យប្រជាពលរដ្ឋរស់នៅក្បែរៗនោះទៅកម្សាន្តលេង ដោយមិនដឹងពីផលប៉ះពាល់។
លោកថ្លែងថា៖ «តាមរយៈគេទុកចោលនេះ ប្រជាពលរដ្ឋផ្អើលទៅលេងប្រហែល ២ ឆ្នាំហើយនៅរណ្តៅទឹកនេះ ហើយពួកគាត់មិនបានដឹងពីផលប៉ះពាល់នៃរណ្តៅទឹកនេះទេ។ ស្របពេលនេះសារាចរណែនាំរបស់រដ្ឋាភិបាលបិទរមណីយដ្ឋានទូទាំងប្រទេសទៀត កុំឱ្យប្រជាពលរដ្ឋទៅជុំគ្នាច្រើនកុះករ យើងក៏ដាក់វិធានការនេះទៅ»។
លោក ឈន ទ្រឿន បានអះអាងថា ចាប់ពីថ្ងៃប្រកាសហាមឃាត់នេះតទៅ បើសិនជាមានប្រជាពលរដ្ឋណាម្នាក់ទៅកម្សាន្តកន្លែងរណ្តៅថ្មនេះទៀត នោះអាជ្ញាធរនឹងអនុវត្តវិធានការពិន័យជាអន្តរការណ៍ ស្របច្បាប់ស្តីពីការគ្រប់គ្រងទប់ស្កាត់ការឆ្លងរីករាលដាលជំងឺកូវីដ ១៩ ដោយគ្មានលើកលែង។
កាលពីឆ្នាំ ២០១៩ អាជ្ញាធរស្រុកបាទី បានចុះពិនិត្យ និងបានបញ្ជាក់ហើយថា ទឹកស្អាងភ្នំចំបាប់ គឺមានផ្ទុកសារធាតុរំសេវ ដែលធ្វើឱ្យប៉ះពាល់ដល់សុខភាពអ្នកមកលេងទឹកនៅតំបន់នេះ ប៉ុន្តែបច្ចុប្បន្ននៅតែមានប្រជាពលរដ្ឋក្នុងតំបន់ និងខេត្តនានាទៅកម្សាន្ត ដោយមិនខ្វល់ពីគ្រោះថ្នាក់នោះទេ។
លោកស្រី តាន់ រស្មី អនុប្រធានមជ្ឈមណ្ឌលស្រាវជ្រាវ និងនវានុវត្តន៍នៃវិទ្យាស្ថានបច្ចេកវិទ្យាកម្ពុជាហៅកាត់ថា តិចណូ បានប្រាប់ភ្នំពេញប៉ុស្តិ៍នៅថ្ងៃទី ១១ សីហាថា ជាទូទៅរណ្តៅរំសេវដែលបន្សល់ពីការបំផ្ទុះយកថ្មភ្នំ គឺផ្ទុកទៅដោយជាតិកំបោរ និងសារធាតុ តេអិនតេ (TNT)។
ប៉ុន្តែលោកស្រី ពន្យល់ថា គ្រប់រណ្តៅទាំងនោះគឺមិនអាចសន្និដ្ឋានឱ្យប្រាកដបានទេថា ផលប៉ះពាល់នៃ TNT នេះមានកម្រិតណា លុះត្រាតែមានការចុះពិសោធ ឬធ្វើតេស្តរកសារធាតុទាំងនេះនៅក្នុងទឹក។
លោកស្រីថ្លែងថា៖ «សារធាតុ TNT គឺជាគ្រឿងផ្ទុះម្យ៉ាងដែលមានការបំផ្ទុះអាចបណ្តាលឱ្យមានរបួសរាងកាយធ្ងន់ធ្ងររួមទាំងការស្លាប់ផងដែរ។ ហើយសំណល់នៃសារធាតុនេះគឺអាចបណ្តាលឱ្យមានភាពមិនប្រក្រតីនៃប្រព័ន្ធសរសៃប្រសាទ រួមទាំងឈឺក្បាល និងវិលមុខ»។ ដើម្បីងាយស្រួលយកថ្មភ្នំ រ៉ែ ឬការបង្កើតផ្លូវក្រោមដី កាត់ភ្នំ។ល។ នោះ បច្ចុប្បន្នការប្រើគ្រាប់បែកបំផ្ទុះគឺជាវិធីសាស្ត្រមួយក្នុងចំណោមវិធីសាស្ត្រជាច្រើន ហើយគ្រាប់បែកទាំងនោះផ្ទុកទៅដោយសារធាតុ TNT។
ក្រោយពីបំផ្ទុះយកថ្ម ឬរ៉ែជាទូទៅការដ្ឋានទាំងនោះបន្សល់នូវណ្ដៅជ្រៅៗ ដែលមិនមានចរន្តហូរចេញចូល ហើយទឹកដែលដក់ក្នុងរណ្ដៅទាំងនោះ គឺពោរពេញទៅដោយសារធាតុគីមីជាច្រើន រួមទាំង តេអិនតេ ផងដែរ។ នេះបើយោងតាមរបាយការណ៍ដែលចេញដោយ អាយឡូ (ILO) និង អង្គការសុខភាពពិភពលោក (WHO) ដែលត្រូវបានគេបកប្រែ និងចែកចាយបន្តគ្នា៕
វីដេអូ៖