ភ្នំពេញៈ តាមការប៉ាន់ប្រមាណពីទិន្នន័យក្នុងរយៈពេល ១ ឆ្នាំនៅឆ្នាំ ២០២០ កម្ពុជាមានអ្នកផ្ទុកមេរោគអេដស៍ថ្មី ១ ១០០ នាក់ និងអ្នកស្លាប់ដោយជំងឺនេះមាន ១ ២០០ នាក់។
មន្ត្រីបញ្ជាក់ថា អត្រាឆ្លង និងស្លាប់ក្នុងប្រទេស គឺស្ថិតក្រោមការគ្រប់គ្រងបាន ដោយសម្រេចបានតាមគោលដៅរបស់អង្គការសហប្រជាជាតិ។
កាលពីដើមខែសីហា អាជ្ញាធរជាតិប្រយុទ្ធនឹងជំងឺអេដស៍បានសហការជាមួយអង្គការ យូអិន-អេដស៍ (UNAIDS) សម្រេចធ្វើបច្ចុប្បន្នភាពទិន្នន័យសង្ខេបឆ្នាំ ២០២០ អំពីមេរោគអេដស៍ និងជំងឺអេដស៍នៅកម្ពុជា ដើម្បីធ្វើការផ្សព្វផ្សាយ។
ទិន្នន័យសង្ខេបឆ្នាំ ២០២០ នេះបានឲ្យដឹងថា ចំនួនប៉ាន់ស្មានអ្នកផ្ទុកមេរោគអេដស៍សរុបក្នុងឆ្នាំ ២០២០ គឺមានប្រមាណ ៧៥ ០០០ នាក់ ក្នុងនោះ អ្នកមកទទួលសេវាប្រឆាំងមេរោគអេដស៍មានចំនួន ៦២ ៣១០ នាក់ដោយអត្រាប្រេវ៉ាឡង់អ្នកផ្ទុកមេរោគអេដស៍អាយុចាប់ពី ១៥ ឆ្នាំ ដល់ ៤៩ ឆ្នាំមានចំនួន ០,៥៤%។
ទិន្នន័យសង្ខេបដដែលបានឲ្យដឹងទៀតថា៖ «សម្រាប់ឆ្នាំ ២០២០ កន្លងមកនេះ ការប៉ាន់ប្រមាណគឺមានអ្នកឆ្លងថ្មីចំនួន ១ ១០០ នាក់ក្នុងនោះករណីស្លាប់ដោយមេរោគអេដស៍ គឺមានចំនួន ១ ២០០ នាក់ ហើយក្នុងចំណោមអ្នកឆ្លងថ្មី គឺមានអាយុលើសពី ១៥ ឆ្នាំ»។
ទិន្នន័យសង្ខេបនេះក៏បានឱ្យដឹងដែរថា ក្នុងចំណោមអ្នកផ្ទុកមេរោគអេដស៍ និងជំងឺអេដស៍ ទាំងជាង ៧ ម៉ឺននាក់នេះ គឺកើតចំពោះអ្នកប្រើប្រាស់គ្រឿងញៀន ៥,៧ ភាគរយ អ្នកចាក់គ្រឿងញៀនមាន ១៥,២ ភាគរយ បុរសរួមភេទជាមួយបុរសមាន ៤ ភាគរយ និងក្រុមស្ត្រីបំប្លែងភេទ មាន ៩,៦ ភាគរយ។
លោក ឈឹម ឃិនដារ៉េត អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេដស៍ ប្រាប់ភ្នំពេញប៉ុស្តិ៍នៅថ្ងៃទី ១២ សីហាថាយោងតាមទិន្នន័យដែលបានរកឃើញថ្មីនេះ គឺមានន័យថា ក្នុងឆ្នាំ ២០២០ កម្ពុជាបន្តបានលទ្ធផលល្អក្នុងគោលដៅ ៩០-៩០-៩០ របស់អង្គការសហប្រជាជាតិ និងរដ្ឋាភិបាលកម្ពុជា ដែលបានដាក់ចេញ។
លោកបន្តថា ក្នុងឆ្នាំ ២០២០ កម្ពុជាសម្រេចបាននូវគោលដៅ ៩០ ទី ១ គឺបាន ៨៤ ភាគរយ ចំពោះអ្នកដែលដឹងស្ថានភាពមេរោគអេដស៍។
គោលដៅ ៩០ ទី ២ ទទួលបានរហូតដល់ ៩៩ ភាគរយចំពោះអ្នកដែលដឹងពីស្ថានភាពមេរោគអេដស៍ ហើយទទួលបានសេវាប្រឆាំងមេរោគអេដស៍ និងគោលដៅ ៩០ ទី ៣ ទទួលបាន ៩៧ ភាគរយចំពោះអ្នកដែលដឹងហើយទទួលបានការព្យាបាល និងទទួលបានប្រសិទ្ធភាព។
លោករៀបរាប់ថា៖ «នៅក្នុងការរីករាលដាលជំងឺអេដស៍ មេរោគអេដស៍ នៅប្រទេសកម្ពុជានេះ គឺស្ថិតក្នុងការគ្រប់គ្រងបាន។ ជាពិសេសយើងបានសម្រេចបាននូវគោលដៅរបស់អង្គការសហប្រជាជាតិ ដែលបានកំណត់»។
លោកបញ្ជាក់ថា៖ «បើសិននៅក្នុងតំបន់ គឺយើងទទួលបានជោគជ័យខ្ពស់ជាងគេ ដោយបានការទទួលស្គាល់ពីអង្គការសហប្រជាជាតិចាប់តាំងពីឆ្នាំ ២០១៧»។
ជាមួយនឹងភាពជោគជ័យនេះ លោក ឃិន ដារ៉េត បានឱ្យដឹងថា សម្រាប់គោលដៅបន្តដល់ឆ្នាំ ២០២៥ កម្ពុជាប្តេជ្ញាឱ្យសម្រេចបាននូវគោលដៅ ៩៥-៩៥-៩៥ ដើម្បីលុបបំបាត់ការឆ្លងរីករាលដាលជំងឺអេដស៍ និងមេរោគអេដស៍នៅក្នុងប្រទេស។
លោកបានគូសបញ្ជាក់ថា ការសម្រេចបានគោលដៅទាំងនេះ គឺត្រូវការការចូលរួមពីគ្រប់ភាគីពាក់ព័ន្ធ ដើម្បីអនុវត្តផែនការយុទ្ធសាស្ត្ររបស់រដ្ឋាភិបាល ដែលបានដាក់ចេញក្នុងពេលនេះ។
កាលពីថ្ងៃទី ៨ ខែមិថុនា ឆ្នាំ ២០២១ កម្ពុជា និងប្រទេសដទៃទៀតនៅជុំវិញពិភពលោកបានបោះឆ្នោតគាំទ្រសេចក្តីថ្លែងការណ៍នយោបាយស្តីពីមេរោគអេដស៍ និងជំងឺអេដស៍ «ការបញ្ចប់វិសមភាព និងការឈានទៅរកការបញ្ចប់ជំងឺ អេដស៍ត្រឹមឆ្នាំ ២០៣០»។
សេចក្តីថ្លែងការណ៍នយោបាយ និងគោលដៅសកលលោក ឆ្នាំ ២០២៥ ក៏ត្រូវបានផ្សព្វផ្សាយយ៉ាងទូលំទូលាយផងដែរ ដល់សមាជិកពេញសិទ្ធិរបស់អាជ្ញាធរជាតិ ប្រយុទ្ធនឹងជំងឺអេដស៍ តាមរយៈ កិច្ចប្រជុំពេញអង្គ អាជ្ញាធរជាតិប្រយុទ្ធនឹងជំងឺអេដស៍។
ក្នុងនោះក៏មានការចូលរួមពីមន្ត្រីជាន់ខ្ពស់ ដែលមកពីក្រសួងនានា អភិបាលរាជធានី-ខេត្ត ២៥ រាជធានី-ខេត្ត អង្គការសង្គមស៊ីវិលអ្នកជំនាញពាក់ព័ន្ធ និងប្រជាជនគន្លឹះកាលពីថ្ងៃទី ៣០ ខែមិថុនា ឆ្នាំ ២០២១ ផងដែរ៕