.jpg)
មន្ត្រីក្រសួងធនធានទឹកជួយបូមទឹកសង្គ្រោះស្រូវនៅឧត្តរមានជ័យពីថ្ងៃ ៨ សីហា។ រូបថត ក្រសួងធនធានទឹក
កំពង់ចាមៈ យ៉ាងហោចណាស់មានដំណាំស្រូវរបស់ប្រជាកសិករជាង ២ ៦០០ ហិកតា ក្នុងស្រុកចំនួន ៤ នៃខេត្តកំពង់ចាមបានរងផលប៉ះពាល់ ដោយសារភាពរាំងស្ងួតកាលពីដើមរដូវវស្សា ប៉ុន្តែមិនបង្កឱ្យខូចខាតទាំងស្រុងទេ បន្ទាប់ពីភ្លៀងបានចាប់ផ្ដើមធ្លាក់នៅចុងសប្ដាហ៍ទី ២ នៃខែកក្កដា ធ្វើឱ្យស្រូវទាំងនោះដុះលូតលាស់ឡើងវិញ។ នេះបើតាម លោក អ៊ុន ចាន់ដា អភិបាលខេត្តកំពង់ចាម។
ថ្លែងនៅក្នុងកិច្ចប្រជុំក្រុមប្រឹក្សាខេត្តកាលពីថ្ងៃអង្គារ លោក ចាន់ដា បានលើកឡើងថា ការងារបង្កបង្កើនផលស្រូវរដូវវស្សាក្នុងខេត្តកំពង់ចាមនៅឆ្នាំនេះមានភាពរស់រវើកជាងឆ្នាំមុនៗ។ ប៉ុន្តែកាលពីដើមរដូវមានភាពរាំងស្ងួត ជាពិសេសនៅចុងខែមិថុនា និងដើមខែកក្កដាបានធ្វើឱ្យដំណាំស្រូវរបស់ប្រជាកសិករជាង ២ ៦០០ ហិកតា ក្នុងស្រុកចំនួន ៤ រួមមាន ស្រុកបាធាយ ស្រុកព្រៃឈរ ស្រុកជើងព្រៃ និងស្រុកស្ទឹងត្រង់រងផលប៉ះពាល់ ដោយសារគ្មានប្រភពទឹកគ្រប់គ្រាន់។
លោកបានបញ្ជាក់ថា៖ «ប៉ុន្តែនៅចុងសប្តាហ៍ទី២ នៃខែកក្កដាកន្លងមកនេះ ឥទ្ធិពលនៃព្យុះទី៦ និងទី៧ ព្រមទាំងវិសម្ពាធទាបបានធ្វើឱ្យមានភ្លៀងធ្លាក់ជាបន្តបន្ទាប់ធ្វើឱ្យដំណាំស្រូវដែលរងផលប៉ះពាល់ទាំងនោះបានដុះលូតលាស់ស្រស់បំព្រងឡើងវិញ។ ប៉ុន្តែបងប្អូនប្រជាកសិករបានអះអាងថា ទិន្នផលរបស់វាបានធ្លាក់ចុះចន្លោះពី ៣០-៤០ ភាគរយ បើធៀបទៅនឹងស្រូវដែលមានទឹកស្រោចស្រពគ្រប់គ្រាន់តាំងពីដំបូងមក»។
ជាមួយគ្នានេះ លោក ចាន់ដា បានជំរុញឱ្យមន្ត្រីជំនាញសហការជាមួយអាជ្ញាធរមូលដ្ឋាន ចុះជួយអន្តរាគមន៍ផ្ដល់ប្រឹក្សាបច្ចេកទេសនៃការប្រើប្រាស់ជីនិងថ្នាំកសិកម្មដល់ប្រជាកសិករ ដើម្បីឱ្យដំណាំរបស់ពួកគាត់បានទិន្នផលខ្ពស់ និងមានសុវត្ថិភាពដល់អ្នកបរិភោគ។
ជុំវិញករណីនេះ លោក ស៊ឹម ថាវីរៈ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ចាម បានប្រាប់ភ្នំពេញ-ប៉ុស្តិ៍ថា គិតត្រឹមថ្ងៃទី ១១ ខែសីហា ការបង្កបង្កើនផលស្រូវវស្សាក្នុងខេត្តនៅឆ្នាំនេះបានសម្រេចលើសផែនការ។
លោកបានបញ្ជាក់ថា៖ «តាមផែនការដាំដុះស្រូវរដូវវស្សារបស់យើងក្នុងឆ្នាំនេះ ៨៦ ៥០០ ហិកតា ប៉ុន្តែគិតត្រឹមថ្ងៃទី ១១ ខែសីហា កសិករយើងបានដាំកើនដល់ ៩០ ០០០ ហិកតា លើសពីផែនការដែលបានគ្រោងទុករហូតដល់ ២ ៥០០ ហិកតា»។
បើតាមលោក ថាវីរៈ មកទល់ពេលនេះមានប្រភេទស្រូវស្រាលមួយចំនួនដែលប្រជាកសិករបានដាំដុះពីដើមរដូវវស្សាបានប្រមូលផលបណ្ដើរៗហើយបើទោះជាតំបន់ខ្លះជួបគ្រោះរាំងស្ងួតក្ដី។
លោកបានបន្តថា ពេលមានកូនរដូវប្រាំងកើតឡើងកន្លងទៅ មានស្រូវស្រាលជាង ២ ៦០០ ហិកតាក្នុងស្រុកព្រៃឈរស្រុកជើងព្រៃ ស្រុកបាធាយ និងស្រុកស្ទឹងត្រង់បានរងផលប៉ះពាល់ ខណៈស្រូវកំពុងបែកគុម្ព និងចេញផ្កា។ ក្នុងនោះ ស្រុកជើងព្រៃប៉ះពាល់ច្រើនជាងគេរហូតដល់ជាង ១ ០០០ ហិកតា។ ប៉ុន្តែក្រោយមានភ្លៀងធ្លាក់នៅចុងសប្ដាហ៍ទី ២ ខែកក្កដា ស្រូវទាំងនោះក៏បានដុះលូតលាស់ឡើងវិញ ប៉ុន្តែទិន្នផលបានធ្លាក់ចុះមកនៅចន្លោះពី ២,៨ តោនទៅ ៣ តោនក្នុង ១ ហិកតា ដែលតាមធម្មតាវាឱ្យផលមធ្យមពី ៤ តោន ទៅ ៥ តោនក្នុង ១ ហិកតា។
ស្រដៀងគ្នានេះ លោក អ៊ុំ វិបុល ប្រធានមន្ទីរធនធានទឹក និងឧតុនិយមខេត្តកំពង់ចាមបានប្រាប់ភ្នំពេញប៉ុស្តិ៍ថា ការបង្កបង្កើនផលរបស់ប្រជាកសិករក្នុងស្រុកទាំង ៤ ខាងលើនេះ គឺពឹងផ្អែកលើរបបទឹកភ្លៀង របបទឹកទន្លេមេគង្គ និងទន្លេសាប ដូច្នេះការធ្វើស្រូវស្រាលរបស់ប្រជាកសិករតែងជួបនឹងបញ្ហាខ្វះទឹកក្នុងអំឡុងមានកូនរដូវប្រាំងកើតឡើង។
លោកថ្លែងថា៖ «ក្រុមការងារយើងបានណែនាំឱ្យពួកគាត់រង់ចាំការដាំដុះក្នុងអំឡុងខែសីហា ដែលជាទូទៅមានទឹកភ្លៀងទៀងទាត់ល្អសម្រាប់ដំណាំគ្រប់ប្រភេទ ពិសេសដំណាំស្រូវ។ តែពួកគាត់ចង់ធ្វើឱ្យបាន ២ ដងក្នុង ១ រដូវ គឺធ្វើស្រូវស្រាលនាដើមរដូវវស្សាម្ដង និងស្រូវកណ្ដាល ដែលចាប់ផ្ដើមពីចុងខែកក្កដា ដល់ខែតុលាម្ដងទៀត។ ស្រូវដែលជួបបញ្ហាខ្វះទឹកនោះគឺស្រូវដើមរដូវវស្សានេះឯង ព្រោះក្នុងតំបន់ទាំងនោះគ្មានប្រភពទឹកនោះទេ សូម្បីតែបុកអណ្ដូងក៏មិនចេញទឹកដែរ»។
លោក អូត ឈាងលី អភិបាលស្រុកជើងព្រៃបានប្រាប់ភ្នំពេញប៉ុស្តិ៍ថា ការពិតកាលពីដើមរដូវវស្សា ដំណាំស្រូវស្រាលរបស់ប្រជាកសិករជាង ១ ២០០ ហិកតា នៅឃុំត្រពាំងគ,ឃុំស្រម៉,ឃុំសំពងជ័យ,ឃុំព្រីងជ្រំ,ឃុំស្ដើងជ័យ និងឃុំគោករវៀង បានជួបគ្រោះរាំងស្ងួតដែលស្ទើរតែខាតបង់ទៅហើយ ដោយសារគ្មានប្រភពទឹកសម្រាប់សង្គ្រោះ។
ប៉ុន្តែពេលនេះស្រូវដែលជួបបញ្ហាទាំងនោះប្រជាកសិករបាននិងកំពុងប្រមូលផល និងរៀបចំដាំដុះនៅជំហានទី ២ ទៀត។
លោកថ្លែងថា៖ «ស្រូវដែលរងផលប៉ះពាល់ដោយគ្រោះរាំងស្ងួតកន្លងទៅនោះ វាបានផ្ដល់ផលប្រមាណ ៦០ ភាគរយ ឬប្រមាណជាង ២ តោនក្នុង ១ ហិកតា។ បើទោះជាទិន្នផលរបស់វាបានធ្លាក់ចុះបន្តិចក្ដី ប៉ុន្តែវាបានជួយសម្រួលការលំបាកក្នុងជីវភាពរស់នៅរបស់ប្រជាកសិករយើងផងដែរ ជាពិសេសបានពូជ សម្រាប់ដាំដុះនៅក្នុងជំហានទី ២ នេះបន្តទៀត»។
បើតាមលោក ឈាង លី ពេលនេះប្រជាកសិករមួយចំនួនកំពុងមមាញឹកក្នុងការដាំដុះស្រូវកណ្ដាល ដែលអាចប្រមូលផលក្នុងរយៈពេលជាង ១០០ ថ្ងៃ ដែលស្រូវទាំងនោះជាពូជស្រូវក្រអូប រួមមាន ស្រូវផ្កាម្លិះ សែនពិដោរ ផ្ការំដួល និងនាងខុន។
ដោយឡែកនៅក្នុងខេត្តឧត្តរមានជ័យវិញក៏មានគ្រោះរាំងស្ងួតបង្កផលប៉ះពាល់ដល់ដំណាំស្រូវរបស់ប្រជាកសិករនៅភូមិគោកពង្រ និងភូមិស្រែប្រាំងនៃឃុំជើងទៀន ស្រុកចុងកាល់ ជាង ៣០០ ហិកតាផងដែរ។
ប៉ុន្តែកាលពីថ្ងៃអាទិត្យសប្ដាហ៍មុន ក្រុមការងារមន្ទីរធនធានទឹក និងឧតុនិយមខេត្ត បានបញ្ជូនគ្រឿងចក្រ ម៉ាស៊ីនបូមទឹកកម្លាំង ៦៥ សេះ ចំនួន ២ គ្រឿង និងម៉ាស៊ីនខ្នាតតូចរបស់ប្រជាកសិករចំនួន ១២ គ្រឿង ចុះជួយបូមទឹកសង្គ្រោះដំណាំស្រូវទាំងនោះឡើងវិញ។ នេះបើតាមការអះអាងរបស់លោក ញើន កួន ប្រធានមន្ទីរធនធានទឹក និងឧតុនិយម ខេត្តឧត្តរមានជ័យកាលពីថ្ងៃទី ១១ សីហា៕
