.jpg)
ជនសង្ស័យនិងវត្ថុតាងគ្រឿងញៀនដែល សមត្ថកិច្ចបង្ក្រាបបាន។ រូបថតហ្វេសប៊ុក សម្តេច ក្រឡាហោម ស ខេង
ភ្នំពេញៈ លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានឱ្យដឹងនៅក្នុងសាររបស់លោកនៅល្ងាចថ្ងៃទី១៣ ខែសីហានេះថា នៅក្នុងខែកក្កដាកន្លងមក សមត្ថកិច្ចបង្ក្រាបបានបទល្មើសគ្រឿងញៀន សរុបចំនួន ៣២៩ករណី គឺមានការថយចុះ ៤៨ ករណី និងមានជនសង្ស័យសរុបចំនួន ៨៤៩នាក់ ត្រូវបានឃាត់ខ្លួន កើន ៤៧នាក់ស្មើនឹង ៥,២ភាគរយ បើធៀបនឹងខែមិថុនាក្នុងឆ្នាំ ២០២១។
បទល្មើសបង្ក្រាបមាន ករណីជួញដូរ រក្សាទុកចំនួន ២៤២ករណី ការប្រើប្រាស់ចំនួន ៨៤ករណី ករណីសំយោគ កែច្នៃ ១ករណី និងករណីដាំដុះ ២ករណី។
ជនសង្ស័យដែលត្រូវបានចាប់ខ្លួនទាំងនោះ ពាក់ព័ន្ធនឹងករណីជួញដូរ និងរក្សាទុកគ្រឿងញៀនចំនួន ៥១០នាក់ ករណីប្រើប្រាស់គ្រឿងញៀន ៣៣១នាក់ ករណីសំយោគ និងកែច្នៃ ៥នាក់ និងករណីដាំដុះ ៣នាក់។ ជនសង្ស័យទាំងនោះ មានខ្មែរ ៧៧៦នាក់ និងជនបរទេស ៧៣នាក់។ នេះបើតាមសារលោក ស ខេង ដែលដាក់បង្ហោះនៅលើទំព័រហ្វេសប៊ុករបស់លោក នៅល្ងាចថ្ងៃទី ១៣ ខែសីហានេះ។
ការបង្ក្រាបបទល្មើសគ្រឿងញៀនក្នុងខែកក្កដា ឆ្នាំ ២០២១នេះ សមត្ថកិច្ចបានចាប់យកគ្រឿងញៀន សរុបចំនួន ២១៩គីឡូក្រាម និង៤៦០,៧១ក្រាម។
លោក ស ខេង បញ្ជាក់ថា៖ «ថ្វីដ្បិតថា ការបង្ក្រាបបទល្មើសមានការថយចុះ បើធៀបនឹងខែមិថុនាក្តី ប៉ុន្តែចំនួនគ្រឿងញៀនដែលសមត្ថកិច្ច បង្ក្រាបបាន មានការកើនឡើងដល់ទៅ ៧៣ គីឡូក្រាម ដែលស្មើនឹងប្រមាណជាង ៥០ ភាគរយ បើធៀបនឹងខែមុន»។
លោកបន្តថា គ្រឿងញៀនទាំងនោះ រួមមាន មេតំហ្វេតាមីនក្រាមម្សៅ(ICE) ជាង ៥៥ គីឡូក្រាម មេតំហ្វេតាមីនគ្រាប់ (WY) ចំនួន១១៣,៣០ក្រាម, អ៊ិចស្តាស៊ី (MDMA) ១០២ គីឡូក្រាម ៣៧៩,៩០ក្រាម កេតាមីន ២១ គីឡូក្រាម ២៣៧,៤០ក្រាម ហេរ៉ូអ៊ីន៥,១៦ក្រាម, កាទីណូន ៣៩ គីឡូក្រាម និង ៨៥៤ក្រាម ព្រមទាំងសារធាតុគីមីផ្សំចំនួន ១១២១ គីឡូក្រាម កញ្ឆាស្រស់ ១៥៦៥ដើម និងកញ្ឆាស្ងួតចំនួន ៣៦ គីឡូក្រាម និង ២២៧ក្រាម។
លោកឧបនាយករដ្ឋមន្ត្រី បានបញ្ជាក់ទៀតថា៖ «ជាការកត់សម្គាល់! ករណីគ្រឿងញៀនចាប់ពី ១ គីឡូក្រាមឡើងទៅ មានចំនួន ៥ ករណី ស្មើនឹង ៥ក្រុម ឃាត់ខ្លួនជនសង្ស័យ ១៣ នាក់ រួមមាន មេក្លោង ១ នាក់ និងបណ្ដាញ ១២ នាក់ ក្នុងនោះជនជាតិខ្មែរ ៨ នាក់ ជនជាតិចិន ១នាក់ ជនជាតិវៀតណាម ៤នាក់»។
សរុបករណីធំៗទាំង ៥ នេះ មានគ្រឿងញៀនសរុបដល់ទៅ ២១៣ គីឡូក្រាម និង ៨៣៤,០៨ក្រាម និងសាធាតុគីមីផ្សំ ៧ គីឡូក្រាម និង ៧៨២,៥៨ ក្រាម។
លោក ស ខេង មានប្រសាសន៍ថា៖ «ជនរួមជាតិជាទីគោរព! ក្នុងនាមសម្ដេចតេជោ នាយករដ្ឋមន្រ្តី ក្នុងនាមក្រសួងមហាផ្ទៃ និងខ្លួនខ្ញុំផ្ទាល់ ខ្ញុំសូមផ្ញើនូវសេចក្ដីកោតសរសើរ និងការលើកទឹកចិត្តខ្ពស់ ជូនចំពោះថ្នាក់ដឹកនាំ និងមន្រ្តីពាក់ព័ន្ធទាំងអស់ ទាំងស៊ីវិល នគរបាល និងកងរាជអាវុធហត្ថ ដែលបានរួមសហការគ្នាយ៉ាងល្អ ក្នុងកិច្ចប្រតិបត្តិការបង្ក្រាបបទល្មើសគ្រឿងញៀន ដើម្បីរួមចំណែកការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គមជូនជាតិនិងប្រជាជន»។
ជាមួយគ្នានេះ លោក ស ខេង ក៏បានផ្ញើសារជូនជនរួមជាតិ គ្រប់មជ្ឈដ្ឋានសង្គម និងកម្លាំងអនុវត្តច្បាប់ទាំងអស់ សូមចូលរួមគាំទ្រ និងអនុវត្តពាក្យស្លោកជាតិ ៣ការពារ ១រាយការណ៍។
លោកគូសបញ្ជាក់ថា៖«កុំពាក់ព័ន្ធ ៖ កុំជួញដូរ កុំចែកចាយ កុំធ្វើខ្នងបង្អែក កុំឃុបឃិត និងកុំប្រើប្រាស់គ្រឿងញៀន។ កុំអន្តរាគមន៍ ៖ កុំរារាំងការរអនុវត្តច្បាប់ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារ សាច់ញាតិ ឬ មិត្តភក្តិក៏ដោយ។ កុំលើកលែង ៖ កុំបន្ធូរបន្ថយការអនុត្តច្បាប់ចំពោះឧក្រិដ្ឋជនគ្រឿងញៀន។ សមត្ថកិចុចពាក់ព័ន្ធទាំងអស់ត្រូវអនុវត្តច្បាប់ដោយម៉ឺងម៉ាត់ និងស្មោះត្រង់វិជ្ជាជីវៈរបស់ខ្លួន ហើយជនគ្រប់រូបត្រូវគោរព និងអនុវត្តច្បាប់»។
ចំណែកមួយរាយការណ៍ គឺត្រូវរាយការណ៍ ផ្តល់ព័ត៌មាន ដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃផលិត និងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ច ដើម្បីអាចបន្តរួមកម្លាំង សាមគ្គីជាតិ ប្រយុទ្ធប្រឆាំងគ្រឿងញៀន ដែលជាសត្រូវនៃការអភិវឌ្ឍសេដ្ឋកិច្ច សង្គម និងធនធានមនុស្ស ជាពិសេស ធនធានយុវជន ដែលជាសសរទ្រូងប្រទេសជាតិ៕
