.jpg)
ក្រុមគ្រូពេទ្យចុះយកសំណាកប្រជាពលរដ្ឋ ដោយសង្ស័យមានអ្នកវីរុសកូវីដ-១៩ បំប្លែងថ្មី នៅភូមិព្រែកតាឡុង២ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ រូបថត សហការី
ភ្នំពេញ៖ ក្រសួងសុខាភិបាល បានប្រកាសរកឃើញអ្នកមានវិជ្ជមានវីរុសកូវីដ ១៩ បំប្លែងថ្មី B.1.617.2 (Delta) ចំនួន ៦៥ ករណីទៀត ពីថ្ងៃទី១១ ដល់ថ្ងៃទី ១៣ ខែសីហា ឆ្នាំ ២០២១។
តាមសេចក្ដីប្រកាសព័ត៌មានរបស់ក្រសួងសុខាភិបាលដែលទើបចេញនៅយប់នេះបានឱ្យដឹងថា យោងតាមលទ្ធផលនៃការធ្វើវិភាគដោយវិទ្យាស្ថានប៉ាស្ទ័រកម្ពុជា បានរកឃើញករណីឆ្លងវីរុសកូវីដ១៩ ដែលបំប្លែងថ្មីប្រភេទ ដែលតា នៅក្នុងប្រទេសកម្ពុជា មកពីបរទេស តាមជើងហោះហើរចំនួន ៤ នាក់ (ស្រី ១នាក់) ពលករខ្មែរត្រលប់ពីប្រទេសថៃ ចំនួន ១៧នាក់ (ស្រី ៩នាក់) បុគ្គលិកសុខាភិបាល ចំនួន ៤ នាក់ (ស្រី ៣នាក់) មន្ត្រីរាជការចំនួន ៤ នាក់ និងប្រជាជនអ្នកភូមិនៅក្នុងសហគមន៍ ចំនួន ៣៦ នាក់ (ស្រី ២១នាក់)។
គិតចាប់ពីថ្ងៃទី ៣១ ខែ មីនា ឆ្នាំ២០២១ ដល់ថ្ងៃទី ១៣ ខែសីហា ឆ្នាំ ២០២១ កម្ពុជា បានរកឃើញអ្នកមានវិជ្ជមានវីរុសកូវីដ១៩ ប្រភេទ ដែលតា លើពលករត្រលប់ពីប្រទេសថៃ និង ប្រទេសវៀតណាម អ្នកដំណើរមកតាមជើងហោះហើរ បុគ្គលិកសុខាភិបាល មន្ត្រីរាជការ និង អ្នកភូមិនៅក្នុងសហគមន៍ សរុបទាំងអស់ ចំនួន ៤៩៤ នាក់ (ស្រី ២៤៣នាក់) និង បានប៉ះពាល់ដល់ ២២ រាជធានី-ខេត្ត ហើយគិតត្រឹមថ្ងៃទី ១៣ ខែសីហានេះ លើកលែងតែ ៣ ខេត្តប៉ុណ្ណោះគឺ ខេត្ត កែប ខេត្តតាកែវ និង ខេត្តក្រចេះ នៅមិនទាន់រកឃើញករណី ដែលតា នៅឡើយ៕
