បើទោះបីជាយុទ្ធនាការផ្សព្វផ្សាយក្រោមប្រធានបទ «រួមគ្នាទទួលខុសត្រូវទប់ស្កាត់ការចម្លងវីរុសកូវីដ ១៩» មិនទាន់បានប្រកាសដាក់អនុវត្តជាផ្លូវការក៏ដោយ ប៉ុន្តែរដ្ឋបាលខេត្តព្រះវិហារបានចាប់ផ្តើមធ្វើយុទ្ធនាការនេះ ក្នុងភូមិសាស្រ្តខេត្តរបស់ខ្លួនហើយ កាលពីថ្ងៃទី ១៣ ខែសីហា ម្សិលមិញ។
រដ្ឋបាលខេត្តព្រះវិហារ ដែលមានមន្ទីរសុខាភិបាលជាសេនាធិការ បានប្រារព្ធពិធីហែក្បួនរថយន្តយុទ្ធនាការជាតិស្តីពីជំងឺកូវីដ ១៩ ដោយមានការចូលរួមពីបណ្តាមន្ទីរអង្គភាពជុំវិញខេត្ត សេវាឯកជន និងដៃគូអភិវឌ្ឍន៍នានាធ្វើការផ្សព្វផ្សាយ និងអប់រំទៅដល់ប្រជាពលរដ្ឋនៅក្នុងខេត្តនេះ ចូលរួមទប់ស្កាត់នូវជំងឺកូវីដ ១៩។
រដ្ឋបាលខេត្តព្រះវិហារបានឱ្យដឹងថា យុទ្ធនាការនេះគឺធ្វើការអប់រំ ផ្សព្វផ្សាយ និងបណ្តុះបណ្តាលដល់ប្រជាពលរដ្ឋឱ្យយល់ដឹងអំពីគ្រោះថ្នាក់នៃវីរុសកូវីដ ១៩ និងដើម្បីជំរុញការទទួលខុសត្រូវរបស់បុគ្គល គ្រួសារ សហគមន៍ ស្ថាប័នពាក់ព័ន្ធ សេវាឯកជន អាជ្ញាធរមូលដ្ឋាន រួមគ្នាទទួលខុសត្រូវខ្ពស់ ក្នុងស្មារតីភាព ដើម្បីកាត់ផ្តាច់ខ្សែចម្លងវីរុសកូវីដ ១៩ ដើម្បីទប់ស្កាត់ការចម្លងវីរុសកូវីដ ១៩ ចូលក្នុងសហគមន៍ ជាពិសេសវីរុសបំប្លែងខ្លួនថ្មីប្រភេទ Delta កំពុងឆ្លងរាលដាលក្នុងសហគមន៍។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានឱ្យដឹងផងដែរថា អាជ្ញាធរនៅតាមភូមិ-ឃុំទាំងអស់ ត្រូវរៀបចំចាត់ចែងដោយធ្វើការចាក់ផ្សាយ និងបិទបដានៅតាមគ្រប់ទីកន្លែង ដើម្បីទទួលបានជោគជ័យក្នុងការទប់ស្កាត់ជំងឺនេះទាំងអស់គ្នា។
លោកស្រីមានប្រសាសន៍ថា៖ «ពេលនេះ ការរួមគ្នានូវមុំទាំង ៣ គឺ ជំរុញនូវការអប់រំ, ការគ្រប់គ្រងនៃបុគ្គលដែលចល័ត ការព្យាបាល និងការធ្វើតេស្តរហ័សឱ្យបានទូលំទូលាយ និងការចាក់វ៉ាក់សាំង។ ដូចនេះ បើយើងរុញមុំទាំង ៣ នេះឱ្យទៅជាមួយគ្នាតែមួយ នោះយើងសង្ឃឹមថា នឹងអាចទប់ស្កាត់នូវការរីករាលដាលជំងឺនេះ ពិសេស គឺប្រភេទថ្មីដែលតានេះ»។
គួរបញ្ជាក់ថា នាពេលថ្មីៗកន្លងមកនេះ ប្រមុខរាជរដ្ឋាភិបាលបានរៀបចំបន្ថែមនូវសេចក្តីណែនាំដល់អភិបាលរាជធានី-ខេត្ត អនុវត្តនូវយុទ្ធនាការជាតិស្តីពីជំងឺកូវីដ ១៩ ក្នុងគោលបំណង គឺដើម្បីលើកកម្ពស់តម្លៃសង្គម និងសាមគ្គីភាពសង្គម ក្នុងការរួមចំណែកទប់ស្កាត់ការរីករាលដាលនៃជំងឺកូវីដ ១៩៕