.jpg)
ខេត្តសៀមរាបនឹងបន្តដាក់ទីតាំងត្រួតពិនិត្យសុខភាពបឋម ដើម្បីស្រង់ព័ត៌មាន និងស្កេន QR Code ទប់ស្កាត់កូវីដ ១៩។ រូបថត រដ្ឋបាលខេត្ត
គណៈបញ្ជាការឯកភាពរដ្ឋបាលខេត្តសៀមរាបបានសហការជាមួយគណៈបញ្ជាការឯកភាពរដ្ឋបាលស្រុកជីក្រែង គណៈបញ្ជាការឯកភាពរដ្ឋបាលស្រុកក្រឡាញ់ គណៈបញ្ជាការឯកភាពរដ្ឋបាលស្រុកស្រីស្នំ មន្ទីរ-អង្គភាព អាជ្ញាធរមូលដ្ឋាន និងសមត្ថកិច្ចពាក់ព័ន្ធបន្តការដាក់ទីតាំងត្រួតពិនិត្យសុខភាពបឋម ដើម្បីស្រង់ព័ត៌មាន និងស្កេន QR Code ទប់ស្កាត់កូវីដ ១៩ ដោយអនុវត្តចាប់ពីថ្ងៃទី ១៦ ខែសីហាតទៅ។
យោងតាមសេចក្តីជូនដំណឹងរបស់រដ្ឋបាលខេត្តនៅថ្ងៃទី ១៣ ខែសីហា បានឱ្យដឹងថា ការដាក់ទីតាំងត្រួតពិនិត្យសុខភាពបឋមនេះ មាននៅចំណុចព្រំប្រទល់ខេត្តសៀមរាបចំនួន ៣ ទីតាំង រួមមាន ព្រំប្រទល់ស្រុកជីក្រែង-ស្រុកស្ទោង នៃខេត្តកំពង់ធំ ព្រំប្រទល់ស្រុកក្រឡាញ់-ស្រុកព្រះនេត្រព្រះ នៃខេត្តបន្ទាយមានជ័យ និងព្រំប្រទល់ស្រុកស្រីស្នំ-ស្រុកចុងកាល់ នៃខេត្តឧត្តរមានជ័យ។
រដ្ឋបាលខេត្តសៀមរាបបានបញ្ជាក់ថា ការបន្តត្រួតពិនិត្យសុខភាពបឋមនេះ គឺដើម្បីអនុវត្តតាមការណែនាំរបស់រាជរដ្ឋាភិបាល ក្រសួងសុខាភិបាល ព្រមទាំងយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ នៅទូទាំងប្រទេស។
រដ្ឋបាលខេត្តបានលើកឡើងថា៖ «ការពិនិត្យសុខភាពបឋមនេះ ក្នុងគោលបំណងបង្ការទប់ស្កាត់ការឆ្លងរាលដាលនៃជំងឺកូវីដ ១៩ ចូលសហគមន៍ក្នុងភូមិសាស្ត្រខេត្តសៀមរាប និងបង្កលក្ខណៈងាយស្រួលដល់មន្ត្រីជំនាញក្នុងការស្រាវជ្រាវពាក់ព័ន្ធនឹងជំងឺកូវីដ ១៩។ ដូចនេះ សូមមេត្តាចូលរួមផ្តល់កិច្ចសហការ និងផ្តល់ព័ត៌មានជូនដល់ក្រុមការងារប្រចាំការនៅទីតាំងទាំង ៣ គោលដៅនេះ»។
ជាមួយគ្នានេះដែរ សាធារណជនអាចចុះឈ្មោះតាមប្រព័ន្ធអនឡាញដែលមានតំណភ្ជាប់តាមវេបសាយ srprovince.com/login ជាមុន ដើម្បីសម្រួលដល់ការត្រួតពិនិត្យ និងចំណេញពេលវេលា៕
