The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋបាល​ខេត្ត​ពោធិ៍សាត់ សម្រេច​បន្ត​អនុវត្ត​វិធានការ​រដ្ឋបាល​រយៈពេល ៧ ថ្ងៃ​ទៀត




រដ្ឋបាល​ខេត្ត​ពោធិ៍សាត់ សម្រេច​បន្ត​អនុវត្ត​វិធានការ​រដ្ឋបាល​រយៈពេល ៧ ថ្ងៃ​ទៀត

Content image - Phnom Penh Post
រដ្ឋបាល​ខេត្ត​ពោធិ៍សាត់ សម្រេច​បន្ត​អនុវត្ត​វិធានការ​រដ្ឋបាល​រយៈពេល ៧ ថ្ងៃ​ទៀត ដើម្បី​ប្រយុទ្ធ​ និង​ទប់ស្កាត់​ការ​ឆ្លង​រាលដាល​ជំងឺ​កូវីដ ១៩។ រូបថត រដ្ឋបាលខេត្ត

រដ្ឋបាល​ខេត្ត​ពោធិ៍សាត់ សម្រេច​បន្ត​អនុវត្ត​វិធានការ​រដ្ឋបាល​រយៈពេល ៧ ថ្ងៃ​ទៀត

ខេត្ត​ពោធិ៍សាត់៖ រដ្ឋបាល​ខេត្ត​ពោធិ៍សាត់ សម្រេច​បន្ត​ការ​អនុវត្ត​វិធានការ​រដ្ឋបាល​នៅ​ក្នុង​ភូមិសាស្ត្រ​ខេត្ត​ពោធិ៍សាត់ សម្រាប់​រយៈពេល ៧ ថ្ងៃ​បន្ថែម​ទៀត ដើម្បី​ប្រយុទ្ធ​ និង​ទប់ស្កាត់​ការ​ឆ្លង​រាលដាល​ជំងឺ​កូវីដ ១៩។

យោង​តាម​លិខិត​សម្រេច​របស់​លោក ម៉ៅ ធនិន អភិបាល​ខេត្ត​ពោធិ៍សាត់ កាល​ពី​ម្សិលមិញ​បាន​សម្រេច​បន្ត​អនុវត្តន៍​វិធានការ​រដ្ឋបាល ដើម្បី​ប្រយុទ្ធ និង​ទប់ស្កាត់​ការ​ឆ្លង​រាលដាល​នៃ​ជំងឺ​កូវីដ ១៩ នៅ​ក្នុង​ភូមិសាស្ត្រ​ខេត្ត​ពោធិ៍សាត់​រយៈពេល ៧ ថ្ងៃ​បន្ថែម​ទៀត ដោយ​គិត​ចាប់​ពី​ម៉ោង​សូន្យ ថ្ងៃទី ១៣ ខែ​ សីហា ឆ្នាំ ២០២១ រហូត​ដល់​ថ្ងៃទី ១៩ ខែ​សីហា។

ការ​បន្ត​វិធានការ​នេះ លោក​អភិបាល​ខេត្ត​ពោធិ៍សាត់​បញ្ជាក់​ថា គ្រប់​រោងចក្រ​សហគ្រាស​ក្នុង​មូលដ្ឋាន​ខេត្ត​ពោធិ៍សាត់ ត្រូវ​បន្ត​យក​ចិត្ត​ទុក​ដាក់​អនុវត្ត​គោល​ការណ៍​ណែនាំ និង​វិធានការ​នានា​របស់​ក្រសួង​សុខាភិបាល ក្រសួង​ការងារ និង​បណ្តុះបណ្តាល​វិជ្ជាជីវៈ និង​ក្រសួង​ស្ថាប័ន​ជំនាញ​ពាក់ព័ន្ធ​ថ្នាក់​ជាតិ និង​លិខិត​បទដ្ឋាន​គតិយុត្ត​ជា​ធរមាន។

លោក ម៉ៅ ធនិន បាន​ប្រាប់​ទៅ​ដល់​រដ្ឋបាល​ក្រុង-ស្រុក និង​មន្ទីរ​អង្គភាព​ជំនាញ​ពាក់ព័ន្ធ ត្រូវ​បង្កើន​ការ​យក​ចិត្ត​ទុក​ដាក់ ក្នុង​ការ​អនុវត្ត​ការ​ហាម​ឃាត់ រឹត​បន្តឹង​ការ​ត្រួត​ពិនិត្យ និង​ការ​រៀបចំ​របៀប​រៀប​រយ និង​សណ្តាប់​ធ្នាប់​នៅ​តាម​កន្លែង​ដែល​ជា​ប្រភព ឬ​អាច​មាន​ហានិភ័យ​ខ្ពស់​នៃ​ការ​ឆ្លង​រាលដាល​ជំងឺ​កូវីដ ១៩ ជា​ពិសេស​ផ្សារ និង​កន្លែង​លក់​ដូរ​គ្រឿង​ឧបភោគបរិភោគ និង​ទីតាំង​អាជីវកម្ម​ផ្សេង​ទៀត ព្រម​ទាំង​ទីតាំង​រៀបចំ​កម្មវិធី​សាសនា កម្មវិធី​ប្រពៃណី និង​កម្មវិធី​កីឡា​ជា​ដើម​ផង​ដែរ។

លោក​អភិបាល​ខេត្ត​ពោធិ៍សាត់ បាន​ប្រគល់​ភារកិច្ច​ជូន​គណៈកម្មការ​ដឹកនាំ​ការ​អនុវត្ត​ច្បាប់ ចំណុះ​ឱ្យ​គណៈកម្មការ​ខេត្ត​ប្រយុទ្ធ​ជំងឺ​កូវីដ ១៩ ខេត្ត​ពោធិ៍សាត់ ស្នងការដ្ឋាន​នគរបាល​ខេត្ត បញ្ជាការដ្ឋាន​កងរាជ​អាវុធហត្ថ​ខេត្ត រដ្ឋបាលក្រុង-ស្រុក រដ្ឋបាល​ឃុំ-សង្កាត់ គ្រប់​ប៉ុស្តិ៍ន​គរបាល​ឃុំ-សង្កាត់ ដើម្បី​បន្ត​សហការ​ចុះ​ត្រួត​ពិនិត្យ និង​អនុវត្ត​វិធានការ​រដ្ឋបាល។

លោក​ថ្លែង​ថា៖ «ករណី​រក​ឃើញ​ថា បុគ្គល ឬ​នីតិបុគ្គល​ទាំង​ឡាយ​ណា ដែល​បំពាន​វិធានការ​នេះ ត្រូវ​អនុវត្ត​ទណ្ឌកម្ម​រដ្ឋបាល និង​ទណ្ឌកម្ម​ច្បាប់ រួម​ទាំង​ការ​ផ្សព្វផ្សាយ​សាធារណៈ​ចំពោះ​បុគ្គល​ល្មើស ស្រប​តាម​ច្បាប់​ស្តីពី​វិធានការ​ទប់ស្កាត់​ការ​ឆ្លង​រាលដាល​ជំងឺ​កូវីដ ១៩ និង​ជំងឺ​ឆ្លង​កាច​សាហាវ និង​ប្រកប​ដោយ​គ្រោះ​ថ្នាក់​ធ្ងន់ធ្ងរ​ផ្សេង​ទៀត និង​លិខិត​បទដ្ឋាន​គតិយុត្ត​ពាក់ព័ន្ធ​ជា​ធរមាន ដោយ​គ្មាន​ការ​លើកលែង​ឡើយ»៕

អត្ថបទគួរចាប់អារម្មណ៍