ភ្នំពេញ៖ យុទ្ធនាការចាក់វ៉ាក់សាំងបង្ការជំងឺកូវីដ១៩ សម្រាប់មនុស្សអាយុចាប់ពី ១២ ឆ្នាំដល់ក្រោម ១៨ឆ្នាំ សម្រាប់ដូសទី១ ដែលមានរយៈពេល ១៤ ថ្ងៃក្នុងរាជធានីភ្នំពេញ គឺត្រូវបិទបញ្ចប់នៅថ្ងៃទី១៤ ខែសីហានេះ ប៉ុន្តែក្នុងករណីមណ្ឌលចាក់វ៉ាក់សាំងណាដែលនៅតែមានអ្នកមកចាក់ទៀត គឺនឹងនៅតែបន្តទទួលចាក់រហូតបានគ្រប់គ្នា។
លោក ងី មានហេង ប្រធានមន្ទីរសុខាភិបាលរាជធានីភ្នំពេញ បានឱ្យដឹងថា មកដល់ថ្ងៃទី១៤ ខែសីហានេះ ក្រុមមនុស្សដែលមានអាយុពី ១២ ឆ្នាំដល់ក្រោម ១៨ ឆ្នាំ ចំនួនជាង ១៧៦ ២០០នាក់ បានទទួលការចាកវ៉ាក់សាំងរួចហើយ។
លោកមានប្រសាសន៍ថា៖ «យើងអាចធ្វើការពន្យារសម្រាប់មណ្ឌកចាក់វ៉ាក់សាំងណាដែលនៅតែមានអ្នកមកចាក់។ ដំណើរការនៃការចាក់វ៉ាក់សាំងគឺចប់នៅថ្ងៃទី ១៤នេះ តែបើនៅមានអ្នកមកចាក់គឺយើងនឹងបន្តនៅថ្ងៃស្អែកទៀត ហើយបើនៅថ្ងៃស្អែកមិនទាន់ចប់ យើងបន្តពន្យារនៅថ្ងៃខានស្អែកទៀតរហូតទាល់តែមានអ្នកបានចាក់គ្រប់គ្នា»។
លោក ងី មានហេង បានបន្តធ្វើការអំពាវនាវទៅដល់មាតាបិតាឬអាណាព្យាបាលនាំយកកូនមកចាក់វ៉ាក់សាំង ប្រសិនបើមិនទាន់ទទួលបានការចាក់ដូសទី១ នៅឡើយ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខ័ណ្ឌទូទាំងប្រទេស បានឱ្យដឹងផងដែរថា នាព្រឹកថ្ងៃទី១៣ ខែសីហា គបក-១៩ បានធ្វើការបែងចែកវ៉ាក់សាំងទៅតាមបណ្តាខេត្តផ្សេងៗទៀតនៅទូទាំងប្រទេស សម្រាប់រៀបចំចាក់ដល់ក្រុមអាយុពី ១២ ដល់ក្រោម ១៨ ឆ្នាំ បន្ទាប់ពីទទួលបានវ៉ាក់សាំង ស៊ីណូវ៉ាក់ ចំនួន ៣ លានដូសដែលជាការបញ្ជាទិញរបស់រាជរដ្ឋាភិបាលកម្ពុជាពីសាធារណរដ្ឋប្រជាមានិតចិន។
លោកស្រីបានមានប្រសាសន៍ថា៖ «កន្លងមកនេះ យើងធ្វើបានមួយចំនួនហើយដោយសារយើងរង់ចាំវ៉ាក់សាំងមកដល់ ហើយពេលនេះវ៉ាក់សាំងបានមកដល់ហើយ ហើយយើងមិនបានទុកវ៉ាក់សាំងនេះមួយកន្លែងទេ គឺយើងចាត់ចែងចែកទៅតាមបណ្តាខេត្តផ្សេងៗតែម្តង»។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមយប់ថ្ងៃទី១៣ ខែសីហា ក្រុមមនុស្សដែលមានអាយុចាប់ពី ១២ ដល់ក្រោម ១៨ ឆ្នាំសរុបចំនួនជិត ៤៩ ម៉ឺននាក់បានចាក់វ៉ាក់សាំងការពារវីរុសកូវីដ១៩ នៅក្នុងរាជធានីភ្នំពេញនិងតាមបណ្តាខេត្តមួយចំនួន៕