.jpg)
សមត្ថកិច្ចកំពុងត្រួតពិនិត្យសាច់ជ្រូកបង្កកដែលដឹកតាមរថយន្ត។ រូបថត មន្ទីរកសិកម្មខេត្តកំពង់ឆ្នាំង
កំពង់ឆ្នាំងៈមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បានបញ្ចូនសំណាកសាច់ជ្រូកបង្កកចំនួន០៣ធុងក្លាសេ យកមកធ្វើតេស្តរកមេរោគនៅមន្ទីរពិសោធន៍ នៅរាជធានីភ្នំពេញ បន្ទាប់ពីមន្ត្រីជំនាញ ស្ទាក់ចាប់រថយន្តដែលដឹកសាច់ជ្រូកទាំងនេះ ពីប្រទេសថៃ ឆ្លងកាត់ខេត្តកំពង់ឆ្នាំង បម្រុងយកទៅចែកចាយក្នុងរាជធានីភ្នំពេញ ដោយគ្មានច្បាប់អនុញ្ញាត។
លោក ងិន ហ៊ុន ប្រធានមន្ទីរកសិកម្មរុក្ខាប្រមាញ់និងនេសាទខេត្តកំពង់ឆ្នាំង បានប្រាប់ភ្នំពេញប៉ុស្តិ៍នៅថ្ងៃទី ១៥ សីហាថា សត្វជ្រូកបង្កកចំនួន០៣ធុងក្លាសេនេះ គឺ ស្មើនឹង ៦៥ ក្បាល មានទម្ងន់ ៤២០ គីឡូក្រាម និងគ្រឿងក្នុង ៣០ គីឡូក្រាម ដែលជាប្រភេទពូជជ្រូកកណ្តុរ។
ជ្រូកទាំងនេះ ត្រូវដឹកតាមរថយន្តមួយគ្រឿង មានម៉ាក HYUNDAI ពណ៌សលាយក្រហម ជាប្រភេទរថយន្តដឹកទំនិញចំណុះ ២,៥ តោន ពាក់ស្លាកលេខចង្កូតស្ដាំ PSHN 0319 ។
លោក បានបញ្ជាក់ថា៖«ត្រូវបានក្រុមការងារអន្តរាគមន៌បង្ក្រាបបទល្មើសចរាចរសត្វ សហការជាមួយក្រុមការងារអន្តរាគមន៍បង្ក្រាបបទល្មើសចរាចរសត្វ របស់ការិយាល័យផលិតកម្ម និងបសុព្យាបាលខេត្ត ស្ទាក់ចាប់បានកាលពីវេលាម៉ោង០៥ ព្រឹក ថ្ងៃទី ១៥ ខែសីហាឆ្នាំ នៅចំណុចភូមិអូររូង ឃុំឈូកស ស្រុកកំពង់ត្រឡាច»។
បន្ថែមពីនេះ ប្រធានមន្ទីរកសិកម្ម រូបនេះ ក៏បានឲ្យដឹងទៀតថា នេះជាករណីទី១ ដែលមន្ត្រីជំនាញខេត្តកំពង់ឆ្នាំង បានស្ទាក់ចាប់បានប្រភេទសត្វជ្រូកកណ្តុរបង្កកទាំងនេះនៅក្នុងខេត្ត។
លោកបន្តថា គោលដៅនៃក្រុមឈ្មួញ គឺនាំសាច់ជ្រូកបង្កកនេះទៅលក់ចែកចាយនៅរាជធានីភ្នំពេញ តាមរថយន្តពីប្រទេសថៃ ចូលមកកម្ពុជាតាមច្រករបៀង ស្រុកវាលវែង ខេត្តពោធិ៍សាត់ ឆ្លងកាត់ខេត្តកំពង់ឆ្នាំង ដោយពុំមានលិខិតអនុញ្ញាតអ្វីទាំងអស់។
លោក បានបញ្ជាក់ថា៖«បន្ទាប់ពីបង្ក្រាបបាន ក្រុមការងារ បានបញ្ចូនសំណាកសត្វជ្រូកទៅរាជធានីភ្នំពេញនៅថ្ងៃអាទិត្យនេះផងដែរ ដើម្បីធ្វើពិសោធន៍រកជំងឺ ហើយបើភស្តុតាងត្រូវរកឃើញថា មានជំងឺ នោះក្រុមជំនាញ នឹងដុតកម្ទេចចោល»។
យ៉ាងណា លោក ងិន ហ៊ុន បានសង្កត់ធ្ងន់ថា ចំពោះចំណាត់ការបន្តយ៉ាងណាទៀតនោះ គឺរង់ចាំលទ្ធផលសំណាកនៃសាច់ជ្រូកជាមុនសិន ខណៈក្រុមការងារបានបញ្ជូនវត្ថុតាងនិងបទល្មើសខាងលើនេះ ទៅរក្សាទុកនៅទីតាំងចត្តាឡីស័កសត្វ របស់ការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់និងនេសាទខេត្តកពង់ឆ្នាំង៕
