.jpg)
លោក ប៉ិ ពឿន ដែលមន្ត្រីទូតជួយអន្តរាគមន៍បញ្ជូនមកកម្ពុជាវិញ ។ រូបថត សហការី
ភ្នំពេញៈមន្ត្រីស្ថានទូតខ្មែរប្រចាំប្រទេសម៉ាឡេស៊ីនិងប៉ូលិសអន្តោប្រវេសន៍នៃប្រទេសនេះកាលថ្ងៃទី ១៥ ខែសីហា បានបញ្ជូនពលករនេសាទខ្មែរម្នាក់ឱ្យមកកាន់កម្ពុជាវិញ បន្ទាប់ពីជួយសង្គ្រោះគាត់ពីការលោតចូលក្នុងសមុទ្រដើម្បីគេចពីការប៉ុនប៉ងប្រព្រឹត្តមិនល្អពីក្រុមពលករបរទេសដែលធ្វើការលើទូកនេសាទជាមួយគ្នា។នេះបើតាមសេចក្ដីជូនដំណឹងរបស់អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិ។
បើតាមសេចក្ដីជូនដំណឹងចុះថ្ងៃទី១៥ សីហា ពលករខ្មែររូបនេះ ឈ្មោះ ប៉ិ ពឿន អាយុ៤១ឆ្នាំ មានលំនៅក្នុងភូមិត្រឡាចស ឃុំត្របែក ស្រុកកំចាយមារ ខេត្តព្រៃវែង ។ គាត់បានទៅធ្វើការនៅលើទូកនេសាទដោយខុសច្បាប់នៅតំបន់ Panchor នៃរដ្ឋ Perak របស់ម៉ាឡេស៊ី តាមរយៈ មេខ្យល់ កាលពីដើមឆ្នាំ២០២០។
នៅក្នុងសេចក្ដីជូនដំណឹងនេះ លោក កុយ គួង អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិបានបញ្ជាក់ថា៖«ដោយមានអារម្មណ៍ថាពលករបរទេសផ្សេងទៀតដែលធ្វើការលើទូកនេសាទជាមួយគ្នាមានបំណងធ្វើបាប គាត់ក៏បានសម្រេចចិត្តលោតពីលើទូកដោយបណ្តែតខ្លួនជាមួយពោងរយៈពេល៤ថ្ងៃ នៅលើផ្ទៃសមុទ្រ ទើបត្រូវប៉ូលិសជើងទឹកប្រចាំតំបន់Lumut រដ្ឋPerak ជួយសង្គ្រោះ នៅថ្ងៃទី ២៦ ខែមិថុនា ឆ្នាំ ២០២១»។
បើតាមលោក កុយ គួង បន្ទាប់ពីទទួលបានព័ត៌មាននោះ ក្រុមការងារស្ថានទូតកម្ពុជាប្រចាំប្រទេសម៉ាឡេស៊ី ក៏បានសហការជាមួយមន្ត្រីប៉ូលិសជើងទឹកប្រចាំតំបន់ ដោយបានណែនាំឱ្យក្រុមភ្នាក់ងារស្ម័គ្រចិត្តនៅរដ្ឋ Perak ទៅទទួលពលកររងគ្រោះពីការិយាល័យប៉ូលិសជើងទឹកនិងផ្តល់ការហូបចុក កន្លែងស្នាក់នៅជាបណ្តោះអាសន្ននៅរដ្ឋ Penang ជាប់ព្រំប្រទល់រដ្ឋ Perak។ ទោះយ៉ាងណា ពលកររងគ្រោះនោះមិនមានព័ត៌មានអ្វីទាំងអស់ពាក់ព័ន្ធនឹងថៅកែទូក ហើយស្នើសុំស្ថានទូត ជួយអន្តរាគមន៍ឱ្យបានត្រឡប់ទៅកម្ពុជាវិញ។
លោក គួង បានបន្ថែមថា តាមរយៈកម្មវិធី Repatriation Recalibration Plan លោក ប៉ិ ពឿនត្រូវបានស្ថានទូតខ្មែរប្រចាំប្រទេសម៉ាឡេស៊ីចេញលិខិតធ្វើដំណើរបណ្តោះអាសន្ន និងសម្របសម្រួលជាមួយមន្ត្រីអន្តោប្រវេសន៍ម៉ាឡេស៊ី ជួយចាត់មន្ត្រីជូនដំណើរទៅកាន់អាកាសយានដ្ឋានអន្តរជាតិ KLIA ដើម្បីឱ្យគាត់វិលត្រឡប់មកកម្ពុជាវិញតាមជើងយន្តហោះ អាកាសចរណ៍សិង្ហបុរីលេខ SQ158 ដែលត្រូវមកដល់ព្រលានយន្តហោះអន្តរជាតិភ្នំពេញនៅម៉ោង ៥:៣០ នាទីល្ងាចថ្ងៃទី១៥ ខែសីហា ឆ្នាំ ២០២១៕
