ព្រះសីហនៈសមត្ថកិច្ចនគរបាលជំនាញព្រហ្មទណ្ឌខេត្តព្រះសីហនុ នៅថ្ងៃទី ១៥ ខែសីហា កំពុងសាកសួរជនជាតិចិនចំនួន៥នាក់ តាមនីតិវិធី ពាក់ព័ន្ធករណីបង្កភាពអនាធិបតេយ្យ នៅតាមដងផ្លូវ ក្រោយចាប់ខ្លួនបានកាលនៅថ្ងៃទី ១៤ ខែសីហា នៅតាមបណ្តោយវិថីឯករាជ្យ ចំណុចស្តុបសូរិយាតូច ស្ថិតក្នុងភូមិ២ សង្កាត់៤ ក្រុងព្រះសីហនុ ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ថ្លែងនៅថ្ងៃទី១៥សីហាថា ជនសង្ស័យជាជនជាតិចិនមានគ្នា៤នាក់ (ស្រី១នាក់) បានធ្វើសកម្មភាពចាប់ជនសង្ស័យជាបុរសជនជាតិចិនម្នាក់ទៀត នៅរសៀលថ្ងៃទី ១៤ ខែសីហា នៅតាមបណ្តោយវិថីឯករាជ្យ ចំណុចស្តុបសូរិយាតូច ស្ថិតក្នុងភូមិ២។
សមត្ថិច្ចនគរបាលបានឃាត់ខ្លួនអ្នកទាំង៥នាក់នោះបាននៅវេលាម៉ោង ១ និង៤៥នាទីរសៀល ពាក់ព័ន្ធករណីបង្កភាពអនាធិបតេយ្យ នាំឲ្យខូចសណ្តាប់ធ្នាប់។ ក្រោយឃាត់ខ្លួន ពួកគេត្រូវបានបញ្ជូនមកសួរនាំ តាមនីតិវិធីនៅស្នងការដ្ឋាននគរបាលខេត្ត។
លោកថ្លែងថា៖ «ពួកគាត់បង្កភាពអនាធិបតេយ្យ ហើយមានបញ្ហាជាមួយគ្នាដោយសារការជំពាក់លុយ ប៉ុន្តែមិនដោះស្រាយតាមផ្លូវច្បាប់ បែជាប្រុងចាប់គេដាក់ក្នុងឡានយកទៅដោះស្រាយក្រៅផ្លូវការ។ អាហ្នឹងគឺបំពានច្បាប់និងនាំឲ្យបាត់បង់សណ្តាប់ធ្នាប់។ អ៊ីចឹងទេ ការិយាល័យជំនាញយើងកំពុងតែ សួរនាំតាមនីតិវិធី» ។
លោក កុល ផាលី ស្នងការរងខេត្តព្រះសីហនុ ទទួលផែនការងារព្រហ្មទណ្ឌ ថ្លែងថា មកដល់ល្ងាចថ្ងៃទី ១៥ ខែសីហានេះ សមត្ថកិច្ចនៅមិនទាន់អាចបញ្ចប់នីតិវិធីនៅឡើយទេ។
ប៉ុន្តែលោកបញ្ជាក់ថា ជនជាតិចិនទាំង៥នាក់នោះ នឹងត្រូវបញ្ជូនទៅតុលាការ៤នាក់ គឺជនសង្ស័យដែលព្យាយាមចាប់ចងជនរងគ្រោះដាក់ចូលក្នុងរថយន្ត មានប្រុស ៣ នាក់ និង ស្រីម្នាក់។
បើតាមលោក កុល ផាលី ករណីនេះ បើសិនជាសមត្ថកិច្ចអន្តរាគមន៍មិនទាន់ពេលនោះទេ អាចក្លាយទៅជាការចាប់ជំរិត ប្រសិនបើជនសង្ស័យធ្វើសកម្មភាពបានសម្រេច។
លោកថ្លែងថា ៖«ថ្ងៃនេះយើងធ្វើមិនទាន់ទេ ប្រហែលដល់ស្អែកព្រឹកទើបអាចបញ្ជូនទៅបាន ករណីហ្នឹងយើងអាចហៅបានថា ជាការចាប់មនុស្សចូលឡាន» ។
លោក កុល ផាលី បញ្ជាក់ថា នៅថ្ងៃកើតហេតុ សមត្ថកិច្ចនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តព្រះសីហនុ ដែលកំពុងឈរជើងតាមគោលដៅចរាចរណ៍ក្បែរនោះ បានសហការគ្នាជាមួយសមត្ថកិច្ចព្រហ្មទណ្ឌ បានធ្វើការឃាត់ខ្លួនជនជាតិចិនខាងលើនោះបានភ្លាមៗ ក្រោយពួកគេធ្វើការចាប់ទាញជនរងគ្រោះបម្រុងដាក់ឲ្យចូលក្នុងរថយន្ត។
បើតាមលោក ផាលី ជនរងគ្រោះមាន ឈ្មោះ ZHANG GUO ភេទប្រុស អាយុ២៧ឆ្នាំ មុខរបរជាអ្នករកស៊ី ស្នាក់នៅភូមិ២ សង្កាត់៤ ក្រុងព្រះសីហនុ។
ចំណែក ជនសង្ស័យចំនួន៤នាក់ រួមមាន ឈ្មោះ GAO PAN ភេទស្រី អាយុ២៧ឆ្នាំ ស្នាក់នៅភូមិ១ សង្កាត់៣ ឈ្មោះ ZHANG JIN WEI អាយុ២៨ឆ្នាំ មុខរបររកស៊ី (ម្ចាស់ភាគហ៊ុនសណ្ឋាគារហ៊ូវី) ឈ្មោះ LIU SHUIA អាយុ២៥ឆ្នាំ មុខរបរអ្នកគ្រប់គ្រងកាស៊ីណូវិមានខ្សាច់ស និង ឈ្មោះ JIANG LIE QIANG អាយុ២១ឆ្នាំ មុខរបរបើកបររថយន្តឲ្យថៅកែកាស៊ីណូ។
ក្នុងប្រតិបត្តិការនេះ សមត្ថកិច្ចដកហូតបាន រថយន្ត ១ គ្រឿង ម៉ាក PORSCHE ពណ៌ស ពាក់ស្លាកលេខ ភ្នំពេញ 2AI-2106៕