.jpg)
បុរស ២ នាក់ ដែលក្លែងខ្លួនធ្វើជាមន្ត្រីអង្គភាពប្រឆាំងអំពើពុករលួយ។ រូបថត អបព
ភ្នំពេញៈ អយ្យការអមសាលាដំបូងរាជធានីភ្នំពេញសម្រេចធ្វើការចោទប្រកាន់ទៅលើបុគ្គល ២ នាក់ ដែលក្លែងខ្លួនជាមន្ត្រីអង្គភាពប្រឆាំងអំពើពុករលួយ (អបព) ដើម្បីទារប្រាក់ពីជនរងគ្រោះពីបទឆបោកមានសា្ថនទម្ងន់ទោស បន្ទាប់ពី អបព បានបញ្ជូនពួកគេទៅតុលាការ។
បុគ្គលដែលក្លែងខ្លួនជាមន្ត្រី អបព រូបនោះម្នាក់មានឈ្មោះ ហ៊ឹម ភាព ឬហៅ ជា សុវណ្ណារិទ្ធ ភេទប្រុស អាយុ ៥១ ឆ្នាំមុខរបរ រត់ម៉ូតូឌុប និងជាអតីតសមាជិកក្រុមប្រឹក្សាសង្កាត់ចោមចៅទី១។ ចំណែកម្នាក់ទៀត គឺមានឈ្មោះ អ៊ុ សេដ្ឋី ភេទប្រុស អាយុ ៤០ ឆ្នាំ មុខងារ នាយកសាលាបឋមសិក្សា ហ៊ុន សែន ចម្រើនជាតិ។
លោក ប្លង់ សុផល អ្នកនាំពាក្យតំណាងអយ្យការអមសាលាដំបូងរាជធានីភ្នំពេញ បានប្រាប់ ភ្នំពេញ ប៉ុស្តិ៍ នៅថ្ងៃទី ១៥ សីហាថា៖ «ករណីនេះ តំណាងអយ្យការទទួលបន្ទុកបានបើកការស៊ើបសួររួចរាល់ហើយពីបទឆបោកដោយមានស្ថានទម្ងន់ទោស តាមមាត្រា ៣៧៧ និងមាត្រា ៣៨០ នៃក្រមព្រហ្មទណ្ឌ»។
យ៉ាងណា ចំពោះនីតិវិធីបន្តលោកថ្លែងថា គឺជាសិទ្ធិសម្រេចរបស់ចៅក្រមស៊ើបសួរ ខណៈការស៊ើបអង្កេត និងការស៊ើបសួររបស់ស្ថាប័ននេះ គឺត្រូវតែជាការសម្ងាត់។
អ្នកនាំពាក្យ អបព បានឱ្យដឹងនៅថ្ងៃទី ១៥ សីហាថា ក្នុងរយៈពេល ២ ថ្ងៃ អបព បានឃាត់ខ្លួនជនសង្ស័យ ២ នាក់ក្នុងករណី ២ ខុសគ្នា ដែលក្លែងខ្លួនជាមន្ត្រី អបព ទៅទារលុយពីជនរងគ្រោះ។
អ្នកនាំពាក្យ អបព បានបញ្ជាក់ថា៖ «កន្លងមកនេះ មានលេចឮព័ត៌មានជាបន្តបន្ទាប់នៅកន្លែងនេះនៅកន្លែងនោះថា មានមន្ត្រី អបព ទូរស័ព្ទទៅដើម្បីសុំលុយ ឬក៏ទារប្រាក់ជាថ្នូរនឹងការបិទបាំងនូវអំពើពុករលួយ។ ព័ត៌មានចុងក្រោយគឺមានអំពើទារលុយនេះរហូតដល់ប៉ះមកលើអ្នកគ្រូនាយិកាសាលា និងមុខសញ្ញាមួយចំនួនទៀត»។
ដូច្នេះ អបព បានប្រមូលកម្លាំងធ្វើប្រតិបត្តិការយ៉ាងរហ័សរហូតប្រមូលបានភ័ស្តុតាងរឹងមាំជាក់លាក់លើករណី ២ ខុសគ្នា ដែលករណី១ ក្លែងជាអនុប្រធាន អបព អ្នកនោះគឺជាអតីតសមាជិកក្រុមប្រឹក្សាសង្កាត់ចោមចៅទី១ ឯករណីទី២ យើងមានការហួសចិត្តដែលជានាយកសាលា ១ រូប តាំងពីឆ្នាំ ២០១៥ មក បែរជាប្រព្រឹត្តអំពើមកលើនាយកសាលាដូចគ្នា មកលើគ្រូបង្រៀន ជាពិសេសមកលើនាយករងរបស់ខ្លួន និងមកលើគ្រូរបស់ខ្លួន ៣-៤ នាក់។
មុននឹងបញ្ជូនទៅតុលាការ អបព បានរកគ្រប់វិធីដើម្បីឱ្យជនល្មើសទាំង ២ ករណីនេះសងលុយមកដល់អ្នករងគ្រោះបានយ៉ាងមានប្រសិទ្ធភាព។
សូមជម្រាបថា យោងតាមសេចក្តីប្រកាសព័ត៌មានរបស់ អបព ចំនួន ២ ច្បាប់ ដោយឡែកពីគ្នាបានឱ្យដឹងថា បុគ្គលឈ្មោះ ហ៊ឹម ភាព ជំរិតទារប្រាក់បានសម្រេចចំនួន ៤ ដង ដែលមានទឹកប្រាក់សរុបចំនួន ៥០០ ដុល្លារ និង ៧០ ម៉ឺនរៀល ចាប់តាំងពីថ្ងៃទី ៦ ដល់ថ្ងៃទី ១០ ខែ សីហា ឆ្នាំ ២០២១។ បន្ទាប់ពីប្រព្រឹត្តសកម្មភាពទាំង ៤ លើកនេះជាបន្តបន្ទាប់ ក៏ត្រូវបាន អបព នាំខ្លួនឈ្មោះនេះពីបញ្ជរបើកប្រាក់វីងមួយកន្លែងនៅក្នុងខណ្ឌពោធិ៍សែនជ័យ កាលពីថ្ងៃទី ១០ សីហា ដើម្បីស្តាប់ចម្លើយ និងកសាងសំណុំរឿងបញ្ជូនទៅតុលាការ។
ចំណែកឈ្មោះ អ៊ុ សេដ្ឋី បានបង្ខំឱ្យជនរងគ្រោះផ្ទេរប្រាក់តាមប្រព័ន្ធ Wing ចាប់ពី ៥០០ ដុល្លារ ទៅ ១០០០ ដុល្លារ ដោយក្នុងនោះឈ្មោះ អ៊ុ សេដ្ឋី ជំរិតទារប្រាក់បានសម្រេចចំនួន ៤ ដង សរុបចំនួន ១ ៩០០ ដុល្លារ និង ២ លានរៀល ចាប់តាំងពីថ្ងៃទី ២២ ខែកក្កដា ឆ្នាំ ២០២១ រហូតដល់ថ្ងៃទី ១១ ខែសីហា ឆ្នាំ ២០២១ ហើយក៏ត្រូវបានមន្ត្រីនគរបាលយុត្តិធម៌ អបព នាំខ្លួនពីបញ្ជរបើកប្រាក់វីងមួយកនែ្លងមកកាលពីថ្ងៃទី ១២ សីហា ដើម្បីស្តាប់ចម្លើយ និងកសាងសំណុំរឿងបញ្ជូនទៅតុលាការ៕
