បន្ទាយមានជ័យៈ សាច់ និងគ្រឿងក្នុងជ្រូកសរុប ១ ៥០០ គីឡូក្រាម ត្រូវបានកម្លាំងការិយាល័យផលិតកម្មសត្វ និងបសុព្យាបាលនៃមន្ទីរកសិកម្មខេត្តបន្ទាយមានជ័យ ដុតបំផ្លាញចោលកាលពីព្រឹកថ្ងៃទី ១៥ ខែសីហា ១ ថ្ងៃក្រោយពីបង្ក្រាបចាប់ និងរកឃើញថា ខូចគុណភាពដែលអាចបង្កផលប៉ះពាល់ដល់បរិស្ថាន និងសុខភាពអ្នកបរិភោគ។
លោក ហ៊ុយ ទូច ប្រធានការិយាល័យផលិតកម្មសត្វ និង បសុព្យាបាលនៃមន្ទីរកសិកម្ម រុក្ខាប្រមាញ់ និង នេសាទខេត្តបន្ទាយមានជ័យបានប្រាប់ ភ្នំពេញ ប៉ុស្តិ៍ថា សាច់ និងគ្រឿងក្នុងជ្រូកខូចគុណភាពទាំងនោះត្រូវបានគេនាំចូលពីប្រទេសថៃតាមច្រករបៀងមួយ ដែលស្ថិតនៅក្នុងភូមិសាស្ត្រ ឃុំទួលពង្រ ស្រុកម៉ាឡៃ ខេត្តបន្ទាយមានជ័យតាមមធ្យោបាយដឹកជញ្ជូនរថយន្តដឹកទំនិញ ១ គ្រឿងក្នុងគោលដៅនាំយកទៅកាន់ខេត្តបាត់ដំបង ដើម្បីលក់ចែកចាយបន្ត ។
លោកបានថ្លែងថា វត្ថុតាងសាច់ និងគ្រឿងក្នុងជ្រូកទាំងនោះមានសភាពជាំស្អុយ ដោយសារតែការវេចខ្ចប់មិនបានត្រឹមត្រូវតាមបទដ្ឋានបច្ចេកទេស និងគ្មានវិញ្ញាបនបត្រ បញ្ជាក់ពីគុណភាពពីអាជ្ញាធរជំនាញនៃប្រទេសដែលបាននាំចេញហើយក៏គ្មានលិខិតអនុញ្ញាតឱ្យនាំចូលនូវផលិតផលសាច់សត្វពីក្រសួង ឬស្ថាបនជំនាញនៃប្រទេសកម្ពុជាឡើយ។
លោកបានបញ្ជាក់ទៀតថា៖ «ដើម្បីសុវត្ថិភាព និងកុំឱ្យមានផលប៉ះពាល់បរិស្ថាន ក្រុមការងារយើងក៏បានស្នើសុំគោលការណ៍ពីព្រះរាជអាជ្ញាអមសាលាដំបូងខេត្តបន្ទាយមានជ័យ ធ្វើការដុតបំផ្លាញចោលនៅព្រឹកថ្ងៃទី ១៥ ខែសីហានេះ»។
បើតាម លោក ហ៊ុយ ទូច នៅពេលបង្ក្រាបចាប់សាច់ និងគ្រឿងក្នុងជ្រូកខូចគុណភាពទាំងនោះកាលពីព្រឹកថ្ងៃទី ១៤ ខែសីហា កម្លាំងសមត្ថកិច្ចក៏បានឃាត់ខ្លួនអ្នកបើកបរម្នាក់ ឈ្មោះ យ៉ុង ចំរើន និងអ្នករួមដំណើរម្នាក់ទៀតទៅសាកសួរ ដើម្បីកសាងសំណុំរឿងបញ្ជូនទៅតុលាការ ចាត់វិធានការបន្តតាមនីតិវិធីច្បាប់។
លោក ទូច បានបញ្ជាក់ថា៖ «ពួកគាត់ទាំង ២ នាក់ [អ្នកបើកបរ និងអ្នករួមដំណើរ] បានដោះសាថា ពួកគាត់គឺជាអ្នកស៊ីឈ្នួលដឹកជញ្ជូនទំនិញឱ្យគេប៉ុណ្ណោះ»។ ប៉ុន្តែលោកថា ពួកគាត់លាក់បាំងអត្តសញ្ញាណម្ចាស់ទំនិញ ដូច្នេះហើយទើបក្រុមសមត្ថកិច្ចបានសម្រេច កសាងសំណុំរឿងចោទប្រកាន់ពួកគាត់ពីបទនាំចូលផលិតផលសាច់សត្វពីក្រៅប្រទេសដោយគ្មានការអនុញ្ញាតតាមមាត្រា ១១៣ នៃច្បាប់ស្ដីពីសុខភាពសត្វ និងផលិតកម្មសត្វ ដើម្បីបញ្ជូនពួកគាត់ទៅឱ្យតុលាការចាត់វិធានការបន្តតាមនីតិវិធីច្បាប់។
យោងតាមមាត្រា ១១៣ នៃច្បាប់ស្ដីពីសុខភាពសត្វ និង ផលិតកម្មសត្វ ជនសង្ស័យទាំង ២ នាក់ខាងលើនឹងត្រូវទទួលរងការផាកពិន័យជាប្រាក់ពី ១០ លានរៀល ទៅ ១៥ លានរៀល៕
វីដេអូ៖