.jpg)
ជនសង្ស័យ ២ នាក់ ត្រូវសមត្ថកិច្ចឃាត់ខ្លួន ករណីក្លែងបន្លំជាមន្ត្រីដើរជំរិតប្រាក់អ្នករកស៊ី កាលពីថ្ងៃទី ១៣ សីហា។ រូបថត ប៉ូលិស
ឧត្តរមានជ័យៈ នគរបាលបានបញ្ជូនបុរសជនសង្ស័យ ២ នាក់ ទៅកាន់តុលាការកាលពីថ្ងៃទី ១៥ ខែសីហា រឿងក្លែងបន្លំជាមន្ត្រីនៅសាលាដំបូងខេត្តបន្ទាយមានជ័យ ជំរិតប្រាក់ពីក្រុមគោលដៅអ្នករកស៊ីមួយចំនួននៅក្នុងស្រុកអន្លង់វែង និងត្រពាំងប្រាសាទ។
លោក ហួត សុធី ស្នងការនគរបាលខេត្តឧត្តរមានជ័យបានប្រាប់ ភ្នំពេញ ប៉ុស្តិ៍ កាលពីម្សិលមិញថា ជនសង្ស័យ ឈ្មោះ លុន តុនឡេង ភេទប្រុស អាយុ ៤៣ ឆ្នាំ រស់នៅភូមិថ្នល់កែង ឃុំ-ស្រុកអន្លង់វែង មុខរបរកសិករ និងឈ្មោះ អៀម ប៊ុនធឿន ភេទប្រុស អាយុ ៣៧ ឆ្នាំ រស់នៅភូមិថ្នល់បំបែក ឃុំ-ស្រុកអន្លង់វែង មុខរបរកសិករ ត្រូវបានសមត្ថកិច្ចជំនាញចាប់ខ្លួនកាលពីថ្ងៃទី ១៣ ខែសីហា និងបានកសាងសំណុំរឿងបញ្ជូនទៅអយ្យការសាលាដំបូងខេត្តនៅថ្ងៃទី ១៥ ខែ សីហា ឆ្នាំ ២០២១។
លោកបញ្ជាក់ថា ជនសង្ស័យទាំង ២ នាក់ ត្រូវបានចាប់ខ្លួន ក្រោយពីមានការស៊ើបអង្កេតពីក្រុមនគរបាលជំនាញ បន្ទាប់ពីមានពាក្យបណ្ដឹងពីមន្ត្រីតុលាការខេត្ត។
លោក សុធី ថ្លែងថា៖ «ជនសង្ស័យទាំង ២ រូបនេះ បានសារភាពរួចហើយថា ពួកគេបានក្លែងជាមន្ត្រីតុលាការខេត្តដើរទារលុយបងប្អូនប្រជាពលរដ្ឋ ប៉ុន្តែបើទោះជាមន្ត្រីតុលាការក៏មិនអាចដើរទាលុយគេបែបនេះដែរ»។
លោកថ្លែងថា៖ «សម្រាប់ទោសទណ្ឌ ឬចោទប្រកាន់បែបណានោះ ខ្ញុំមិនទាន់ហ៊ានសន្និដ្ឋានបែបណានោះទេ ព្រោះវាជាសិទ្ធិរបស់តុលាការក្នុងការសម្រេចចោទប្រកាន់ទៅតាមនីតិវិធី»។
លោក ហ៊ែល ឆេងហុង អ្នកនាំពាក្យសាលាដំបូងខេត្តឧត្តរមានជ័យបានប្រាប់ ភ្នំពេញ ប៉ុស្តិ៍ នៅថ្ងៃទី ១៥ ខែ សីហា ឆ្នាំ ២០២១ ថា៖ «ជនសង្ស័យទាំង ២ រូបនេះ អាចនឹងមានទោសទណ្ឌផ្នែកព្រហ្មទណ្ឌទៅតាមមាត្រានៃក្រមព្រហ្មទណ្ឌណាមួយ ព្រោះពួកគេបានក្លែងបន្លំ និងជំរិតប្រាក់ពីប្រជាពលរដ្ឋ»។
តាមរបាយការណ៍របស់អគ្គស្នងការនគរបាលជាតិឱ្យដឹងថា ក្នុងប្រតិបត្តិការចុះទៅឃាត់ខ្លួនជនសង្ស័យទាំង ២ រូបនេះ សមត្ថកិច្ចបានដកហូតវត្ថុតាងមួយចំនួនរួមមាន រថយន្ត ១ គ្រឿង និងទូរស័ព្ទ ៣ គ្រឿង៕
