កំពង់ឆ្នាំងៈ ក្មេងប្រុស-ស្រី ២ នាក់បងប្អូន បានឆេះស្លាប់ស្ទើរក្លាយជាដុំធ្យូង ក្នុងគ្រោះអគ្គិភ័យភ្លើងឆេះផ្ទះ កាលពីព្រឹកថ្ងៃទី ១៦ ខែ សីហា ឆ្នាំ ២០២១ នៅចំណុចភូមិសាស្ត្រ ឃុំស្វាយ ស្រុកសាមគ្គីមានជ័យ។ សមត្ថកិច្ចសន្និដ្ឋានជំហានដំបូងថា គ្រោះអគ្គិភ័យនេះកើតឡើងដោយសារផ្ទុះសេខ្សែភ្លើង។
លោក វន ស៊ីផា អភិបាលស្រុក សាមគ្គីមានជ័យ បានប្រាប់ ភ្នំពេញ ប៉ុស្តិ៍ថា កុមារាឈ្មោះ នឿន ចិត្រា អាយុ ១០ ឆ្នាំ និងប្អូនស្រីរបស់គាត់ ឈ្មោះ នឿន ចន្ថា អាយុ ៧ ឆ្នាំ បានឆេះស្លាប់ក្រោមគំនរភ្នក់ភ្លើង ស្ទើរក្លាយជាដុំធ្យូង បន្ទាប់ពីមានករណីភ្លើងឆេះផ្ទះ នៅព្រឹកថ្ងៃទី ១៦ ខែសីហា។
លោកថ្លែងថា៖ «តាមការបញ្ជាក់ពីអ្នកភូមិ កុមារា-កុមារី ទាំង ២ នាក់បងប្អូននោះ នៅផ្ទះជាមួយយាយតារបស់ពួកគេ ព្រោះម្ដាយឪពុករបស់ពួកគេ ទៅធ្វើការនៅរោងចក្រ។ លុះដល់វេលាម៉ោង ៩ ព្រឹក យាយតារបស់ពួកគេ បានចេញទៅផ្សារ ដើម្បីទិញម្ហូបអាហារ ដោយបានចាក់សោរផ្ទះ ដោយពួកគេនៅក្នុងផ្ទះនោះតែ ២ នាក់។ មួយសន្ទុះក្រោយមកក៏មានករណីភ្លើងឆេះផ្ទះកើតឡើង បណ្ដាលឲ្យពួកគេស្លាប់តែម្ដង»។
ជុំវិញករណីនេះ លោក ខូវ លី ស្នងការនគរបាលខេត្តកំពង់ឆ្នាំង បានប្រាប់ ភ្នំពេញ ប៉ុស្តិ៍ថា តាមរយៈការពិនិត្យអង្កេតនៅកន្លែងកើតហេតុ សមត្ថកិច្ចនគរបាលជំនាញ មិនបានរកឃើញវត្ថុតាងអ្វី ដែលគួរឲ្យសង្ស័យថា ជាអំពើឃាតកម្មនោះទេ។
តែតាមរយៈអ្នកភូមិដែលរស់នៅក្បែរកន្លែងកើតហេតុបាននិយាយថា មុនពេលមានករណីភ្លើងឆេះផ្ទះ គេបានឮសំឡេងផ្ទុះសេខ្សែភ្លើង និងអណ្ដាតភ្លើង ចេញពីផ្ទះកើតហេតុ។
លោកបានបញ្ជាក់ថា៖ «តាមការពិនិត្យអង្កេត និង ការបំភ្លឺរបស់សាក្សីនៅកន្លែងកើតហេតុ ករណីគ្រោះអគ្គិភ័យនេះ បង្កឡើងដោយការផ្ទុះឆ្លងចរន្តអគ្គិសនី»។
លោកបានបន្ថែមថា៖ «កុមាររងគ្រោះទាំង២នាក់បងប្អូន ត្រូវបានសមត្ថកិច្ចនគរបាលជំនាញយើងរកឃើញនៅក្រោមគំនរ ភួយ មុង ក្នុងបន្ទប់ដេករបស់ពួកគេ។ យ៉ាងណាក៏ដោយករណីនេះ សមត្ថកិច្ចយើងនឹងបន្តស្រាវជ្រាវបន្ថែមទៀត»។
លោកបានប្រាប់ឲ្យដឹងផងដែរថា នៅក្នុងគ្រោះអគ្គិភ័យនោះ អ្នកភូមិបាននាំគ្នាជួយអន្តរាគមន៍ យកទឹកមកពន្លត់ផងដែរ មុនពេលក្រុមមន្ត្រីនគរបាលជំនាញពន្លត់អគ្គិភ័យទៅដល់។ ក្នុងការពន្លត់អគ្គិភ័យនោះ ក្រុមសមត្ថកិច្ចនគរបាលមូលដ្ឋានស្រុកសាមគ្គីមានជ័យ បានប្រើប្រាស់រថយន្តពន្លត់អគ្គិភ័យ ២ គ្រឿង និងប្រើប្រាស់ទឹកអស់ ១០ ម៉ែត្រគូប៕
វីដេអូ៖