.jpg)
ជនសង្ស័យពេលត្រូវបានសមត្ថកិច្ចចាប់ខ្លួន។ រូបថត ប៉ូលិស
កំពតៈ ជនសង្ស័យប្រុស-ស្រី ៥ នាក់ ត្រូវបាននគរបាលខេត្តកំពតបញ្ជូនទៅសាលាដំបូងខេត្តពីម្សិលមិញ ដើម្បីចាត់ការតាមនីតិវិធីពាក់ព័ន្ធនឹងការដើរបោក និងលួចលុយ នៅតាមទូវីងផ្ញើលុយ ទូទាំងប្រទេសអស់រយៈពេលជាច្រើនឆ្នាំមកហើយ ក្រោយពីចាប់ខ្លួនបានកាលពីថ្ងៃទី ១៤ សីហា។
ស្នងការរងទទួលផែននគរបាលព្រហ្មទណ្ឌនៃស្នងការដ្ឋាននគរបាលខេត្តកំពត លោក លក ញ៉ាវ ឱ្យដឹងពីម្សិលមិញថា មុនសមត្ថកិច្ចរបស់លោកចាប់ក្រុមជនសង្ស័យទាំង ៥ នេះលោកបានទទួលពាក្យបណ្តឹងមួយចំនួនពីជនរងគ្រោះដែលជាម្ចាស់ទូផ្ទេរលុយវីងនៅខេត្តកំពត។
បន្ទាប់ពីពិនិត្យលើពាក្យបណ្តឹងរបស់ជនរងគ្រោះ និងដោយទទួលបញ្ជាពីលោក ម៉ៅ ច័ន្ទមធុរិទ្ធ ស្នងការនគរបាលខេត្តកំពត កម្លាំងជំនាញរបស់លោកបានធ្វើការស្រាវជ្រាវតាមកាមេរ៉ាសុវត្ថិភាពនៅតាមទីតាំងទូវីងរបស់ជនរងគ្រោះ។
បើតាមលោកស្នងការរង ក្រោយពីបានពិនិត្យក្នុងកាមេរ៉ាសុវត្ថិភាពរួចក៏កំណត់បានអត្តសញ្ញាណរបស់ក្រុមជនសង្ស័យ។ បន្ទាប់មក សមត្ថកិច្ចរបស់លោកបានសហការជាមួយនាយកដ្ឋានព្រហ្មទណ្ឌ ក្រសួងមហាផ្ទៃ ស្នងការដ្ឋានគរបាលរាជធានីភ្នំពេញតាមចាប់ក្រុមជនសង្ស័យតែម្តង។
លោកថ្លែងថា៖ «ករណីក្រុមជនសង្ស័យសារភាពហើយ។ ក្រុមជនល្មើសនឹងត្រូវប្រឈមចំពោះមុខច្បាប់»។
លោក លក ញ៉ាវ ប្រាប់ភ្នំពេញ-ប៉ុស្តិ៍ ថាក្រុមជនសង្ស័យរួមមាន ទី១- ឈ្មោះ ផាន់ រ័ត្ន ភេទប្រុស អាយុ ៤៥ ឆ្នាំរស់នៅភូមិកណ្ដោល ឃុំព្រះធាតុ ស្រុកអូររាំងឪ ខេត្តត្បូងឃ្មុំ ទី២- ឈ្មោះ តុង សំណាង ភេទប្រុសអាយុ ៣០ ឆ្នាំ រស់នៅ ភូមិរស្មីរំដោះ ឃុំសូយោង ស្រុកបារាយណ៍ ខេត្តកំពង់ធំ។ ទី៣- ឈ្មោះ សេង សំអាត ភេទប្រុស អាយុ ៤២ ឆ្នាំនៅភូមិបាយ៉ាប ខណ្ឌសែនសុខ រាជធានីភ្នំពេញ ទី៤- ឈ្មោះ ឈុំ ស្រី ភេទស្រី អាយុ ៦០ ឆ្នាំ រស់នៅ ភូមិថ្មីលើ ឃុំព្រះធាតុ ស្រុកអូររាំងឪ ខេត្តត្បូងឃ្មុំ និងទី៥- ឈ្មោះ ជេត ឃុន ភេទប្រុស អាយុ ៣៨ ឆ្នាំ រស់នៅភូមិថ្មីលើ ឃុំព្រះធាតុ ស្រុកអូររាំងឪ ខេត្តត្បូងឃ្មុំ។
លោកបន្តថា ជាក់ស្តែងកាលពីថ្ងៃទី ១៤ សីហា កម្លាំងរបស់លោកបានស្ទាក់ចាប់ក្រុមជនសង្ស័យបាននៅភូមិត្រពាំងពោធិ៍ សង្កាត់គោករកា ខណ្ឌព្រែកព្នៅ រាជធានីភ្នំពេញ ខណៈកំពុងធ្វើដំណើរ។
លោកថា ក្រុមជនសង្ស័យបានសារភាពថា ពួកគេមានបក្ខពួក ១១ នាក់ ហើយដើរបោក និងលួចលុយតាមទូវីងជាច្រើនឆ្នាំមកហើយ។ នៅខេត្តកំពតពួកគេធ្វើសកម្មភាពបានចំនួន ៥ លើកនៅខេត្តព្រៃវែងបាន ១ លើក នៅខេត្តកំពង់ចាមបាន ២ លើក។ ប៉ុន្តែពួកគេមិនចាំចំនួនទឹកលុយដែលលួចបាននោះទេ។ ជាទូទៅ ពួកគេដើរលួចតាមទូវីងនៅ ២៥ ខេត្ត-រាជធានីតែម្តង។
លោក លក ញ៉ាវ ប្រាប់តាមសម្តីក្រុមជនសង្ស័យថា ពេលធ្វើសកម្មភាពម្តងៗពួកគេជិះរថយន្តដើរមើលកន្លែងទូវីងណាមានម្ចាស់ម្នាក់ឯង។ ពេលនោះពួកគេឱ្យបក្ខពួកម្នាក់ទិញកាតទូរស័ព្ទ និងបញ្ឆោតឱ្យម្ចាស់វីងដើរយកកាតទៅឱ្យពួកគេនៅខាងក្រៅទូវីង។ ពេលម្ចាស់វីងដើរចេញពីទូ គឺគ្នាគេចូលទៅលួចលុយក្នុងទូវីង និងរត់ឡើងរថយន្តតែម្តង។
លោកបន្ថែមថា ចំពោះវត្ថុតាងដកហូតពីក្រុមជនសង្ស័យមានរថយន្តកាមរីឆ្លាមចំនួន ២ គ្រឿង ដែលជាមធ្យោបាយរបស់ជនសង្ស័យ។ ពាក់ព័ន្ធនឹងតុលាការចោទប្រកាន់លើក្រុមជនសង្ស័យយ៉ាងណានោះ ភ្នំពេញប៉ុស្តិ៍បានទូរស័ព្ទជាច្រើនលើកទាក់ទងលោក ខា ដែនណា អ្នកនាំពាក្យតុលាការខេត្តកំពត ប៉ុន្តែលោកមិនលើកទូរស័ព្ទឡើយ៕
វីដេអូ៖
