The Phnom Penh Post Search

Search form

Logo of Phnom Penh Post newspaper Phnom Penh Post - បញ្ជូន​មេខ្យ​ល់ ៧ នា​ក់ទៅតុលា​ការ ករណីប្រ​មូល​ផ្ដុំមនុស្សជិត ​៤០០​ នាក់ ហើយ​បាន​រកឃើញ​ឆ្លងជំងឺ​កូវីដ ​១៩​




បញ្ជូន​មេខ្យ​ល់ ៧ នា​ក់ទៅតុលា​ការ ករណីប្រ​មូល​ផ្ដុំមនុស្សជិត ​៤០០​ នាក់ ហើយ​បាន​រកឃើញ​ឆ្លងជំងឺ​កូវីដ ​១៩​

Content image - Phnom Penh Post
សកម្មភាពប្រមូលផ្ដុំជួបជុំគ្នារៀនវគ្គសិក្សាអាហារបំប៉ននៅតាកែវ កាលពីថ្ងៃទី ១៦ សីហា ។ រូបថត ប៉ូលិស

បញ្ជូន​មេខ្យ​ល់ ៧ នា​ក់ទៅតុលា​ការ ករណីប្រ​មូល​ផ្ដុំមនុស្សជិត ​៤០០​ នាក់ ហើយ​បាន​រកឃើញ​ឆ្លងជំងឺ​កូវីដ ​១៩​

តាកែវៈ​មេខ្យល់ចំនួន ​៧ នាក់ ​ដែល​ពាក់ព័ន្ធ​នឹងការ​ប្រមូលផ្តុំ​មនុស្សជិត ៤០០ នាក់​​ ឱ្យជួប​ជុំគ្នា​ចូលរៀន​វគ្គ​សិក្សា​អាហារ​បំប៉ន​នៅ​ក្នុង​បុរី​រស្មី​នៅភូ​មិ​ខ្សឹ​ងសង្កាត់​រកា ​ក្នុង​ក្រុង​ដូន​កែវ​ ខេត្ត​តាកែវ​ ត្រូវបាន​សមត្ថកិច្ច​​កសាង​សំណុំរឿង​បញ្ជូន​ទៅ​តុលា​ការ បន្ទាប់​ពី​អាជ្ញាធ​រខេត្ត​រកឃើ​ញ​វិជ្ជមាន​កូ​វីដ ១៩​ ចំនួន​ ២ ​នាក់​ ក្នុង​ចំណោម​នោះ ហើ​យបាន​ដាក់​ឱ្យ​សម្រាក​ព្យា​បាល​នៅ​ពេទ្យ​បង្អែក​ខេត្ត ​។

លោក ខាន់ សុខា អភិ​បាលរង​ខេត្ត​តាកែវ​ថ្លែង​នៅថ្ងៃទី​ ១៧​ សីហា​​ថា អាជ្ញា​ធរ​ខេត្ត​តាកែវ​បាន​រកឃើញ​មនុស្ស ៧​ នាក់ ​ដែលជា​មេខ្យល់​ក្នុងការ​ប្រមូល​ផ្តុំ​មនុស្ស​បើក​វគ្គ​សិក្សា​អាហារ​បំប៉ន​ល្មើស​វិធានការ​រដ្ឋបាល ​នៅក្នុង​បុរី​រស្មី ស្ថិតនៅ​ភូមិ​ខ្សឹ​ង សង្កាត់​រកា ​ក្នុង ក្រុង​ដូន​កែវ កាលពី​ថ្ងៃទី ១៦​ ខែសីហា។ អ្នក​ទាំង​នោះ​ត្រូវបាន​បញ្ជូន​ឱ្យសមត្ថ​កិច្ច​នគ​របាលដើម្បី​​កសាង​សំណុំ​រឿង​បញ្ជូន​ទៅ​តុលា​ការ​នៅ​ថ្ងៃទី ១៧ ​ខែ​សីហា​ ។

លោក ខាន់ សុខា ​បញ្ជាក់​ថា ដោយឡែក​អ្នក​​ផ្សេង​ទៀត​ដែល​ត្រូវ​មេខ្យល់​ប្រមូល​ផ្តុំ​ឱ្យជិះ​រថយន្ត​មកពី​ខេត្ត​ផ្សេងៗដើ​ម្បី​ជួបជុំ​ក្នុង​វគ្គ​សិក្សា​នោះត្រូ​វបាន​​អាជ្ញាធរខេត្ត​ចាត់​ទុកថា​ ជា​ជនរងគ្រោះ ​ហើយ​បានបញ្ជូន​ទៅធ្វើ​ច​ត្តា​ឡី​ស័ក​នៅតាម​ខេត្តរៀងៗខ្លួន​វិញ​ក្រោយ​ធ្វើ​តេស្ត​យក​សំណាក​ឃើញ​លទ្ធ​ផល​បឋម​អវិជ្ជ​មាន​កូ​វីដ​ ១៩​។

លោក​ថ្លែងថា​៖ «មនុស្ស​ទាំងអស់​មាន​ចំនួន​ ៣៨៥​ នាក់ យើង​បានធ្វើ​តេស្ត​បឋម​ត្រួត​ពិនិត្យ​មើល​មេរោគ​កូ​វីដ​បាន​រកឃើញ​ថា ​មាន ២​ នាក់​វិជ្ជមាន​កូ​វីដ ១៩ ​ហើយ​ ២ នាក់​នោះ​យើង​បាន​យកទៅ​កន្លែង​ព្យាបាល​ហើយ។ ដោយ​ឡែក​អ្នក​ផ្សេង​ទៀត​ដែល​មិនមាន​កូ​វីដ ១៩ យើង​បាន​បញ្ជូន​ទៅតាម​ខេត្ត​រៀងៗខ្លួន ​ដើម្បី​ធ្វើ​ច​ត្តា​ឡី​ស័ក»​ ។

លោក ​មាស អ៊ុយ នាយក​រដ្ឋបាល​ខេត្ត​តាកែវ​ ថ្លែង​នៅ​ថ្ងៃទី ១៦​ ខែសីហា​ថា អភិ​បាល​ខេត្ត​បាន​ចុះទៅ​ត្រួត​ពិនិត្យ​ផ្ទាល់​នៅ​ទីតាំង​ល្មើស​ ក្រោយ​ពីពួកគេ​បាន​លួច​ជួបជុំគ្នា​បំពាន​នឹង​វិធានការ​រដ្ឋបាល​របស់​រដ្ឋបាល​ខេត្តតាកែវ កាលពី​រសៀល​ថ្ងៃទី ១៥ ខែសីហា ។

លោក​ថ្លែង​ថា៖​ «ឯកឧត្តម​អភិបាល​បាន​ណែនាំ​ឱ្យ​អាជ្ញាធរ​ពាក់ព័ន្ធ​ទាំង​អស់ត្រូ​វផ្អាក​ជា​បណ្ដោះ​អាសន្ន​នូវ​ទីតាំង​ល្មើស​នោះ»។

លោក​វេជ្ជ​បណ្ឌិត នុត ស៊ី​ណាត ប្រធាន​មន្ទីរ​សុខាភិ​បាល​ខេត្ត​តាកែវ​ថ្លែង​ថា ក្រោយ​សមត្ថកិច្ច​បាន​ឡោមព័ទ្ធ​នៅ​យប់​ថ្ងៃទី ១៥​ មន្ត្រី​សុខាភិ​បាល​បាន​ចុះ​ធ្វើតេស្ត​យក​សំណាក​ភ្លាមៗ​បាន៥០​នាក់​ទាំងយប់​តែ​​លទ្ធផល​អវិជ្ជមាន។លុះដល់​ព្រឹក​ថ្ងៃទី ១៦ ​ខែសីហា បន្ត​យក​សំណាក​បាន​គ្រប់​មនុស្ស​ទាំង​អស់ ៣៨៥ នាក់ ក៏​រកឃើញ​មាន​វិជ្ជមាន​កូ​វីដ ១៩ ​ចំនួន ​២ នា​ក់។

លោក​ថ្លែងថា​៖ «ក្រោយ​ធ្វើតេស្ត​យក​សំណាក​គ្រប់គ្នា​ហើយ ​យើង​រកឃើញ​វិជ្ជមាន​កូ​វីដ ១៩ ចំនួន ២ នាក់ ដែល​អ្នក​ទាំង ២ នោះ​មិនមែនជា​អ្នក​នៅក្នុង​ខេត្តតាកែវ​ទេ គឺ​មកពី​ខេត្តកំពត ​និង​ខេត្ត​សីហនុ ឥឡូវ​យើង​ដាក់​ឱ្យ​សម្រាក​ព្យាបាល​ហើយ» ។

លោក សុខ សំណាង ស្នងការ​នគរបាល​ខេត្ត​តាកែវ​មិនអាច​សុំការ​​បញ្ជាក់បន្ថែម​ជុំវិញ​ករណី​មេខ្យល់​ទាំង​៧នាក់​នោះទេ​នៅថ្ងៃទី​១៧​សីហា ​​ដោយ​សារ​លោក​ជាប់រវល់។ ក៏​ប៉ុ​ន្តែ​បើតាម​ហ្វេ​ស​ប៊ុ​ក​ស្នងការដ្ឋាន​​នគរបាល​ខេត្តតាកែវ​កាលពី​ថ្ងៃទី ១៦ ខែសីហា ​បាន​ឱ្យ​ដឹងថា សមត្ថកិច្ច​នគរបាល​ខេត្តតាកែវ​ បាន​ចុះ​ត្រួតពិនិត្យ​ឆែកឆេរ រកឃើញ​ពលរដ្ឋ​ចំនួន ៣៨៥ នាក់ មកពី​ខេត្តតាកែវ កំពត កែប កណ្តា​ល និង​ខេត្ត​ផ្សេងៗទៀត​កាលពី​យប់​ថ្ងៃទី ១៥ ខែសីហា។

ក្នុង​ហ្វេ​ស​ប៊ុ​ក​ដដែល​បាន​​សរសេរថា៖ «បន្ទាប់ពី​បាន​សាកសួរ​រួច កម្លាំង​ជំនាញ​បាន​ឃាត់ខ្លួន​មេខ្យល់​បាន​ចំនួន ៧ នាក់ ស្រី ២ នាក់ ដែល​ពួកគេ​បាន​អះអាងថា​ពួកគេ​ជា​តំណាង​ចែកចាយ​ផលិតផ​ល​ឯករាជ្យជា​ផលិតផល​បំប៉ន​សុខភាព​របស់​ក្រុមហ៊ុន
(UNICITY)»។

តាម​ការណែនាំ​របស់​រា​ជ​រដ្ឋាភិបាល​ រដ្ឋបាល​ខេត្តតាកែវ​ត្រូវ​​បន្ត​ការអនុវត្ត​វិធាន​ការ​រដ្ឋបាល​ក្នុងភូមិ​សាស្ត្រ​ខេ​ត្ត​របស់​ខ្លួន រយៈពេល ៧ ថ្ងៃ​ទៀត​ ចាប់ពី​ម៉ោង ២៣ និង ៥៩ ​នាទី ថ្ងៃទី ១២ ដល់​ថ្ងៃទី ១៩​ ខែសីហា ដោយ​ហាម​ឃាត់ការជួបជុំ ការលក់ដូរ​គ្រឿង​ស្រវឹង ព្រមទាំង​ដាក់​បំរាម​គោចរ​ចាប់ពី​ម៉ោង ៩ យប់ ដល់​ម៉ោង ៣​ ទៀបភ្លឺ​ផង​ដែរ៕

អត្ថបទគួរចាប់អារម្មណ៍