.jpg)
អ្នកកាសែតអនឡាញឈ្មោះម៉ន តេវ ដែលនគរបាលចាប់ខ្លួនកាលពីយប់ថ្ងៃទី១៦ សីហា ពាក់ព័ន្ធការប្រើអាវុធខុសច្បាប នៅខណ្ឌឫស្សីកែវ។ រូបថត ប៉ូលិស
ភ្នំពេញ៖ អ្នកយកព័ត៌មាននៃអង្គភាព BCP TV ម្នាក់ ត្រូវបាននគរបាលខណ្ឌឫស្សីកែវ ចាប់ខ្លួនកាលពីយប់ថ្ងៃទី ១៦ សីហា ក្នុងបទល្មើសកាន់កាប់អាវុធខុសច្បាប់ ហើយសមត្ថកិច្ចកំពុងដំណើការនីតិវិធីកសាងសំណុំរឿងបញ្ជូនទៅតុលាការរាជធានីភ្នំពេញ ដើម្បីចាត់វិធានការបន្តតាមនីតិវីធីច្បាប់។
លោក ហ៊ាង ថេរ៉េត អធិការនគរបាលខណ្ឌឫស្សីកែវ បានប្រាប់ ភ្នំពេញ ប៉ុស្តិ៍ នាថ្ងៃនេះថា បុរសជាប់សង្ស័យក្នុងករណីប្រើប្រាស់អាវុធខុសច្បាប់ខាងលើនេះ ឈ្មោះម៉ន តេវ អាយុ ៤២ឆ្នាំ ជាបុគ្គលិកផ្នែកយកព័ត៌មានឱ្យអង្គភាពសារព័ត៌មាន BCP TV មានទីលំនៅភូមិ ៤ សង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ។
ជននេះត្រូវបាននគរបាលព្រហ្មទណ្ឌខណ្ឌឫស្សីកែវ ឃាត់ខ្លួនពេលកំពុងធ្វើដំណើរតាមបណ្ដោយផ្លូវជាតិលេខ ៥ ក្នុងភូមិសាស្ត្រ ក្រុមទី៣ ភូមិ៣ សង្កាត់ច្រាំងចំរេះ១ ដោយល្មើសទៅនឹងបម្រាមគោចរ របស់រដ្ឋបាលរាជធានីភ្នំពេញ ដែលបានហាមឃាត់ការធ្វើដំណើរ ចាប់ពីចន្លោះម៉ោង១០យប់ ដល់ម៉ោង ៥ ទៀបភ្លឺ។
លោកបញ្ជាក់ថា៖«មុនដំបូងកម្លាំងរបស់យើង ដែលបានដាក់ប៉ុស្តិ៍ត្រួតពិនិត្យនៅចំណុចទីតាំងខាងលើបានស្នើឱ្យគាត់ឈប់ម៉ូតូដើម្បីត្រួតពិនិត្យ។ បន្ទាប់មកកម្លាំងរបស់យើងក៏បានឆែកឆេររកឃើញអាវុធខ្លី១ដើម ម៉ាក Lock 17 គ្មានលេខ និងអាយកូម ១ គ្រឿង ហើយក៏បានសម្រេចឃាត់ខ្លួន បន្ទាប់ពីគាត់គ្មានឯកសារបញ្ជាក់ពីអត្តសញ្ញាណអាវុធ និងលិខិតអនុញ្ញាតឱ្យប្រើប្រាស់ពីក្រសួងនិងស្ថាប័នជំនាញ»។
បើតាមលោកអធិការ នៅពេលឃាត់ខ្លួន ជនសង្ស័យ ត្រូវបានកម្លាំងនគរបាលជំនាញធ្វើតេស្តរកឃើញមានសារធាតុញៀននៅក្នុងទឹកនោមផងដែរ។ នៅពេលនេះ ក្រុមមន្ត្រីជំនាញកំពុងសួរចម្លើយ ដើម្បីកសាងសំណុំរឿង បញ្ជូនទៅសាលាដំបូងរាជធានីភ្នំពេញចាត់វិធានការបន្តតាមនីតិវិធី។
ករណីនេះ អគ្គនាយក BCP TV លោក ជា អេងឡុង បានប្រាប់ភ្នំពេញប៉ុស្តិ៍ នៅរសៀលថ្ងៃទី ១៧ ខែសីហា ថា លោក ម៉ន តេវ ពិតជាបុគ្គលិកផ្នែកយកព័ត៌មាន សន្តិសុខសង្គម ដែលភាគច្រើនផ្ដោតទៅលើបញ្ហាគ្រោះថ្នាក់ចរាចរណ៍ និង អំពើចោរកម្ម របស់អង្គភាព BCP TV ពិតប្រាកដមែន។ ទោះយ៉ាងណា អំពើល្មើសរបស់បុគ្គល មិនមែនជាការទទួលខុសត្រូវរបស់ម្ចាស់ស្ថាប័ន ឬអង្គភាពនោះឡើយ។
លោក អេងឡុង បញ្ជាក់ថា៖ «ខ្ញុំមិនដឹងថា ពីមុនគាត់ធ្វើការងារអ្វី ហើយគាត់បានអាវុធនោះមកពីណានោះទេ។ អំពើល្មើសរបស់គាត់ គឺគាត់ត្រូវតែទទួលខុសត្រូវទៅតាមផ្លូវច្បាប់។ ព្រោះអង្គភាពយើងមានការណែនាំបុគ្គលិករួចហើយ ទាំងនៅក្នុងកិច្ចសន្យាការងារ និង ក្នុងបទបញ្ជាផ្ទៃក្នុងរបស់អង្គភាព។ ដូច្នេះករណីរបស់លោក ម៉ន តេវ មិនមានអ្វីពាក់ព័ន្ធនឹងអង្គភាពរបស់យើងខ្ញុំឡើយ»៕
