សៀមរាបៈ រដ្ឋបាលខេត្តសៀមរាបចាត់មន្ត្រីចុះស្រាវជ្រាវករណីវិវាទដីធ្លីរបស់ពលរដ្ឋរស់នៅក្នុងស្រុកវ៉ារិនខេត្តសៀមរាបជាង ២០០ គ្រួសារ ដែលមានទំនាស់ជាមួយភាគីម្ខាងទៀត ដែលមានគ្នា ៨ នាក់ លើផ្ទៃដីប្រមាណជាង ៤ ០០០ ហិកតា ខណៈមន្ត្រីបានណែនាំឱ្យភាគីជម្លោះទាំង ២ ចូលរួមនីតិវិធីតាមការកំណត់របស់តុលាការ។
ការចាត់វិធានការស្រាវជ្រាវលើវិវាទនេះបានធ្វើឡើង បន្ទាប់ពីមានពលរដ្ឋជាង ៦០ នាក់តំណាងឱ្យពលករដ្ឋជាង ២០០ គ្រួសារបានលើកគ្នាមកសាលាខេត្តសៀមរាបពីថ្ងៃទី ១២ ខែសីហា ដើម្បីស្នើឱ្យអាជ្ញាធរជួយអន្តរាគមន៍ករណីមនុស្ស ៨ នាក់ ប្តឹងយកដី និងផ្ទះពួកគាត់ ហើយត្រូវតុលាការចេញដីកាកោះពលរដ្ឋចំនួន ១១ នាក់ក្នុងនោះមានមេភូមិ មេឃុំផងឱ្យចូលខ្លួននៅថ្ងៃទី ១៧ សីហា ឆ្នាំនេះ។
លោក លី សំរិទ្ធិ អភិបាលរង និងជាអ្នកនាំពាក្យសាលាខេត្តសៀមរាបបានប្រាប់ ភ្នំពេញ ប៉ុស្តិ៍ កាលពីថ្ងៃទី ១៦ សីហាថា ករណីនេះអាជ្ញាធរបានទទួលពាក្យបណ្តឹងពីពលរដ្ឋរួចហើយក្នុងនោះរដ្ឋបាលខេត្តក៏កំពុងស្រាវជ្រាវ និងប្រមូលឯកសារពីអ្នកពាក់ព័ន្ធជុំវិញការកាន់កាប់ដីនេះផងដែរ។
លោកបានបញ្ជាក់ថា៖ «ករណីនេះយើងកំពុងរៀបចំពិនិត្យមើល។
គ្រាន់តែពេលនេះវិវាទវាកំពុងស្ថិតក្នុងដៃតុលាការ ដូច្នេះខាងខេត្តមានករណីយកិច្ចមួយទៀតក្នុងការពិនិត្យមើលដំណើររឿងរបស់គាត់ ព្រោះកន្លងមកពួកគាត់មិនដែលបានប្តឹងមកយើងទេ ហើយរឿងនេះបានប្តឹងប្ដល់ចូលទៅតុលាការរួចហើយ»។
បើតាមលោក លី សំរិទ្ធិ ភាគីទាំង ២ គឺសុទ្ធតែមានឯកសារសំអាង ប៉ុន្តែជាក់ស្តែងយ៉ាងណាគឺត្រូវស្រាវជ្រាវឱ្យបានស៊ីជម្រៅសិន ខណៈក្នុងដំណាក់កាលនេះភាគីទាំង ២ គឺត្រូវចូលរួមតាមនីតិវិធីរបស់តុលាការ។
លោក ធិននី វិធូរ អភិបាលស្រុកវ៉ារិនបានប្រាប់ភ្នំពេញប៉ុស្តិ៍យ៉ាងខ្លីថា ករណីវិវាទរបស់ពលរដ្ឋទាំង ២ នេះ គឺរដ្ឋបាលស្រុកបានរៀបចំរបាយការណ៍បញ្ជូនទៅថ្នាក់ខេត្តហើយ។
លោកថា៖ «ខ្ញុំមិនអាចបកស្រាយនៅពេលនេះបានទេ ពីព្រោះកំពុងរៀបចំឯកសារ និងរបាយការណ៍ជូនឯកឧត្តមអភិបាលខេត្ត ចាំគាត់មានចំណាត់ការយ៉ាងម៉េចៗបានខ្ញុំអាចបកស្រាយបានតាមក្រោយ»។
អ្នកស្រី កែវ ម៉ាឡៃ ជាពលរដ្ឋរស់នៅលើដីនេះតាំងពីឆ្នាំ ២០០៤ បានប្រាប់ ភ្នំពេញ ប៉ុស្តិ៍ ពីថ្ងៃទី ១៦ សីហាថា គ្រួសារអ្នកស្រី និងពលរដ្ឋជាង ២០០ គ្រួសារទៀតបានរស់នៅ និងអាស្រ័យផលលើផ្ទៃដី ២ ០០០ ហិកតា ក្នុងភូមិដៃអាវ ឃុំស្រែណូយ ស្រុកវ៉ាវិន យូរឆ្នាំហើយ។
អ្នកស្រីបានបន្តថា ស្រាប់តែនៅឆ្នាំ ២០២០ ក៏មានជំទាវម្នាក់ដែលស្គាល់ឈ្មោះថា កុល សុខុម ជាប្រធានអង្គការសមាគមសង្គ្រោះ យុទ្ធជនពិការ ស្ត្រីមេម៉ាយ កុមារកំព្រា និងរាស្ត្រទាល់ក្រ រួមទាំងមនុស្ស ៧ នាក់ទៀតបានប្តឹងមេភូមិ និងពលរដ្ឋ ១០ នាក់ ពីបទក្លែងបន្លំឯកសារ និងលួចលក់អចលនវត្ថុអ្នកដទៃ។
អ្នកស្រីថ្លែងថា៖ «គេប្តឹងផ្ដល់មេភូមិខ្ញុំថា រំលោភយកដីសមាគមដែលបានកាន់កាប់ក្នុងឆ្នាំ ២០១៩ ដែលមានផ្ទៃដីជាង ៤ ពាន់ហិកតា តែដីភូមិរបស់ពួកខ្ញុំសព្វថ្ងៃមានតែប្រមាណ ២ ពាន់ហិកតាប៉ុណ្ណោះ។ ខ្ញុំមិនដឹងគេមកពីណាដែរហើយយើងក៏មិនធ្លាប់ឮឈ្មោះសមាគមនេះ ពីមុនមកដែរនៅក្នុងភូមិ»។
ភ្នំពេញប៉ុស្តិ៍មិនអាចស្វែងរកប្រភព ដើម្បីទាក់ទងឈ្មោះ កុល សុខុម រួមទាំងមនុស្ស ៧ នាក់ទៀត ដែលត្រូវជាដើមបណ្តឹងប្តឹងទៅតុលាការក្នុងវិវាទដីធ្លីនេះទេ កាលពីថ្ងៃទី ១៦ សីហា។
លោក គ្រួច សុវណ្ណារ៉ា មេភូមិដៃអាវដែលរងបណ្តឹងនៅតុលាការ ហើយត្រូវចូលបំភ្លឺនៅថ្ងៃទី ១៧ សីហា បានថ្លែងថា នេះគឺជារឿងអយុត្តិធម៌បំផុត ខណៈភាគី ៨ នាក់បានប្តឹងលោកពីបទក្លែងបន្លំឯកសារ និងលួចលក់អចលនវត្ថុរបស់អ្នកដទៃ។
លោកបន្តថា ការឈានដល់ការប្តឹងផ្ដល់នេះ បន្ទាប់ពីភាគីឈ្មោះ កុល សុខុម បានមកស្នើសុំលោកឱ្យផ្ទេរសិទ្ធិកាន់កាប់ដីធ្លីទាំងនេះ តាមរយៈលិខិតកាន់កាប់របស់មេឃុំ និងមេភូមិមុន។
បើតាមលោក សុវណ្ណារិទ្ធ កាលដែលលោកបានបដិសេធ ដោយសារតែដីទាំងនេះគឺជាដីដែលមានប្រជាពលរដ្ឋរស់នៅអាស្រ័យផលតាំងពីឆ្នាំ ២០០៣ និងឆ្នាំ ២០០៤ មក ហើយប្រវត្តិដីនេះគឺជាដីរបស់រដ្ឋ ខណៈលិខិតដែលភាគីឈ្មោះ កុល សុខុម បានសំអាងនោះ គឺបានចេញដោយមេឃុំ មេភូមិ ក្នុងអំឡុងឆ្នាំ ២០០៥ និង ២០០៦។
លោកថា៖ «ដល់ឆ្នាំ ២០២០ មានអ្នកដែលប្តឹងខ្ញុំហ្នឹងបានមកឱ្យខ្ញុំចុះសាលាកបត្រដីហ្នឹងទៅ។ ខ្ញុំក៏សួរថាដីកន្លែងណា? គាត់ក៏ឆ្លើយថាដីគាត់ទាំងអស់។
ខ្ញុំក៏និយាយថា ដីទាំងនេះបានចុះឱ្យអ្នកស្រុក ហើយបានកើតកូនកើតចៅអស់ហើយ ខ្ញុំចុះសាលាកបត្រឱ្យគាត់ម៉េចទៀត។ ខ្ញុំឆ្ងល់ថា បើគាត់មានលិខិតកាន់កាប់ដីទាំងនេះចុះពីយូរពីណាពីណីមកគាត់មិនមកទាមទារ?»៕
វីដេអូ៖