.jpg)
មន្ត្រី (ក.ប.ប.) ក្នុងកិច្ចប្រជុំកាលពីថ្ងៃទី ១៦ សីហា។ រូបថត ក.ប.ប.
ភ្នំពេញៈ អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៃក្រសួងពាណិជ្ជកម្មបានប្រាប់ឱ្យពលរដ្ឋដែលចាញ់បោកការធ្វើពាណិជ្ជកម្មតាមប្រព័ន្ធអេឡិចត្រូនិកដាក់ពាក្យបណ្តឹង ឬរាយការណ៍មកអគ្គនាយកដ្ឋាន ដើម្បីមានវិធានការតាមផ្លូវច្បាប់។
លោក ឌឹម ថេង អគ្គនាយករង ក.ប.ប. ប្រាប់ ភ្នំពេញ ប៉ុស្តិ៍ នៅថ្ងៃទី ១៦ ខែសីហាថា ការធ្វើពាណិជ្ជកម្មតាមប្រព័ន្ធអេឡិចត្រូនិក [អ៊ីនធឺណិត] នៅកម្ពុជានាពេលបច្ចុប្បន្ននេះមានការរីកចម្រើនគួរឱ្យកត់សម្គាល់ តែក៏កើតមានករណីឆបោកផងដែរ។
លោកបានបន្តថា ពលរដ្ឋបានបញ្ជាទិញទំនិញតាមប្រព័ន្ធអ៊ីនធឺណិតទាំងក្នុង និងក្រៅប្រទេស បានធ្វើឱ្យការឆបោកនៅតែបន្តកើតមានក្នុងរូបភាព តាមទូរស័ព្ទ តាមអ៊ីមែល និងតាមរយៈការផ្សព្វផ្សាយបោកប្រាស់ពីផលិតផលជាដើម។
លោកបានបញ្ជាក់ទៀតថា ទោះជាបញ្ហានេះបានកើតឡើងក៏ដោយ ក៏កម្ពុជាមិនទាន់បង្កើតឱ្យមានយន្តការណាមួយសមស្របក្នុងការទទួលខុសត្រូវឱ្យបានជាក់លាក់នៅឡើយទេ ព្រោះអ្នកដែលត្រូវបានគេឆបោក ទទួលរងនូវការខាតបង់ច្រើន ហើយមិនដឹងថា ត្រូវទៅប្តឹងនៅទីកន្លែងណា។
លោក ឌឹម ថេង បានថ្លែងថា៖ «កន្លងមកនេះ អត់ទាន់មានសេចក្តីណែនាំ ឬសេចក្តីជូនដំណឹងឱ្យបងប្អូនដែលមានបញ្ហា អាចទៅពិគ្រោះយោបល់ ឬជួបខាងណា ដើម្បីដោះស្រាយទេ។ យើងមិនទាន់មានការបង្កើតយន្តការបែបនេះ នៅឡើយទេ ប៉ុន្តែមានខាង នាយកដ្ឋានប្រឆាំងបទល្មើសព័ត៌មានបច្ចេកវិទ្យារបស់ក្រសួងមហាផ្ទៃ ក៏មានការដោះស្រាយលើបញ្ហានេះរួចហើយដែរ»។
ទោះជាយ៉ាងណា លោក ឌឹម ថេង បានប្រាប់ឱ្យពលរដ្ឋ ចាប់ពីពេលនេះតទៅអាចមកដាក់ពាក្យបណ្តឹង ឬរាយការណ៍តាមបណ្តាញសង្គមហ្វេសប៊ុក ឬវេបសាយ ឬមួយក៏អាចមកប្តឹងផ្ទាល់នៅអគ្គនាយកដ្ឋាន ក.ប.ប. ដែលស្ថិតនៅក្រោមក្រសួងពាណិជ្ជកម្ម ដើម្បីឱ្យជួយដោះស្រាយតាមច្បាប់ស្តីពីកិច្ចការពារអ្នកប្រើប្រាស់ និងច្បាប់ពាណិជ្ជកម្មអេឡិចត្រូនិក ប្រសិនបើមានករណីឆបោក តាមការធ្វើពាណិជ្ជកម្មតាមប្រព័ន្ធអេឡិចត្រូនិកកើតឡើង។
លោក កែវ វលក្ខ អ្នកជំនាញព័ត៌មានបច្ចេកវិទ្យាបានបង្ហាញការយល់ឃើញថា ការឆបោកតាមរយៈការធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជាមិនទាន់ជាមានករណីកើតឡើងច្រើននោះទេ ប៉ុន្តែវាកំពុងតែប្រឈមហានិភ័យមួយចំនួនដោយអ្នកបញ្ជាទិញខ្លះឃើញមានការផ្សព្វផ្សាយនូវផលិតផលស្អាត និងល្អក៏បានបញ្ជាទិញ ប៉ុន្តែពេលទទួលទំនិញនោះ បែរជាមិនមានគុណភាពល្អទៅវិញ។
លោកបន្តទៀថា៖ «មួយវិញទៀតទំនិញមួយចំនួនដែលបានផ្សព្វផ្សាយនៅបណ្តាញសង្គម ដូចជា ប្រភេទឡេ ថ្នាំសម្រាប់ថែរក្សាសុខភាព និងអាហារបំប៉នជាដើម គឺមិនមានប្រភពច្បាស់លាស់ដែលអ្នកទិញយកមកប្រើប្រាស់វាបានធ្វើឱ្យប៉ះពាល់សុខភាពថែមទៀត។ បន្ថែមពីនេះក៏មានរូបភាពឆបោកតាមរយៈអ្នកលក់ខ្លះបានឱ្យគេទម្លាក់លេខ និងទីតាំង និងបាញ់លុយឱ្យ ប៉ុន្តែមិនដឹកទំនិញឱ្យក៏មានដែរ»។
ពាក់ព័ន្ធនឹងបញ្ហានេះលោក កែវ វលក្ខ បានថ្លែងថា អ្នកបញ្ជាទិញខ្លះក៏មិនបានតវ៉ា ឬប្តឹងទេ ដោយសារគេគិតថា ការចំណាយលុយបន្តិចបន្តួច និងរករឿងតាមឆាត ហើយគាត់ក៏មិនដឹងថា ត្រូវទៅដាក់ពាក្យបណ្តឹង ឬពិគ្រោះយោបល់ជាមួយស្ថាប័នណាដែរ។ ប៉ុន្តែបើខាង (កបប) ប្រកាសទទួលពាក្យបណ្តឹង និងពិគ្រោះយោបល់លើបញ្ហានេះគឺជាការល្អក្នុងការចូលរួមដោះស្រាយករណីឆបោកតាមរយៈការធ្វើពាណិជ្ជកម្មតាមប្រព័ន្ធអេឡិចត្រូនិក។
ទោះជាយ៉ាងណា លោកស្នើឱ្យស្ថាប័ននេះផ្សព្វផ្សាយឱ្យបានទូលាយ ដើម្បីបញ្ជ្រាបព័ត៌មាននេះដល់ពលរដ្ឋគ្រប់រូប ជាពិសេសត្រូវផ្សព្វផ្សាយពីទោសទណ្ឌចំពោះការឆបោក និងអប់រំឱ្យពលរដ្ឋចេះការពារខ្លួនកុំឱ្យចាញ់បោកតាមរយៈការធ្វើពាណិជ្ជកម្មតាមប្រព័ន្ធអេឡិចត្រូនិក៕
វីដេអូ៖
