.jpg)
សត្វស្លាបក្នុងតំបន់វាលកំបោរពីខែកក្កដា។ រូប BirdLife International Cambodia
រតនគិរីៈ អង្គការអភិរក្សសត្វស្លាបបានឱ្យដឹងថា ចំនួនសត្វស្លាបនៅក្នុងតំបន់ការពារធម្មជាតិវាលកំបោរ ដែលស្ថិតនៅដែនជម្រកសត្វព្រៃលំផាត់ ខេត្តរតនគិរីបានថយចុះ បើធៀបនឹងឆ្នាំមុន ខណៈឆ្នាំនេះសហគមន៍តំបន់នេះបានកត់ត្រាចំនួនសត្វស្លាបមាន ៣៥ ប្រភេទ។
អង្គការជីវិតសត្វស្លាបអន្តរជាតិប្រចាំកម្ពុជាបញ្ជាក់ក្នុងហ្វេសប៊ុកពីថ្ងៃទី ១៦ ខែសីហាថា ទោះបីមានគម្រោងអាជីវកម្មរ៉ែថ្មក្នុងដីសហគមន៍ក៏ដោយ ក៏គណៈកម្មការសហគមន៍តំបន់ការពារធម្មជាតិវាលកំបោរនៃដែនជម្រកសត្វព្រៃលំផាត់បានបន្តសកម្មភាពចុះល្បាតក្នុងខែកក្កដាកន្លងទៅបានចំនួន ៣ លើក ដោយ ១ លើកៗចុះល្បាតចំនួន ១ យប់ និង ២ ថ្ងៃ។
អង្គការដដែលបញ្ជាក់ថា «ជាលទ្ធផល សហគមន៍បានកត់ត្រាទិន្នន័យសត្វបានចំនួន ៣៥ ប្រភេទ ព្រមទាំងត្រួតពិនិត្យទីតាំងត្រពាំងបានចំនួន ១០ ត្រពាំង។ ជាការកត់សម្គាល់ យើងឃើញថា ចំនួនសត្វមានការថយចុះនៅក្នុងសហគមន៍តំបន់ការពារធម្មជាតិនេះ [វាលកំបោរ] បើប្រៀបធៀបជាមួយទិន្នន័យនាឆ្នាំកន្លងទៅ»។
លោក ប៊ូ វរសក្ស នាយកកម្មវិធីប្រចាំកម្ពុជានៃអង្គការជីវិតសត្វស្លាបអន្តរជាតិប្រាប់ ភ្នំពេញ ប៉ុស្តិ៍ ពីថ្ងៃទី ១៦ ខែសីហាថា៖ «អ្វីដែលថយចុះនេះប្រៀបធៀបទៅចំនួនឃើញវាតិចជាងឆ្នាំមុន។ ឧបមាថា យើងធ្លាប់កត់ត្រាមានទីតាំងសម្បុកពងកូន [សត្វ] ត្រដក់អ៊ីចឹង [ឥឡូវ] លែងឃើញអ៊ីចឹង។ យើងគិតថាចំនួនវាធ្លាប់ឃើញច្រើនអ៊ីចឹងវាឃើញថយចុះ ក្នុងហ្វូងវា»។
លោកថ្លែងថា ប្រភេទសត្វស្លាបដែលថយចុះនេះ មានដូចជាសត្វដែលងាយរងគ្រោះ ដូចជាត្រដក់តូច និងសត្វត្រយងចង្កំកស និងប្រភេទសត្វមួយចំនួនទៀត។ ដោយឡែកនៅតំបន់វាលកំបោរនេះសហគមន៍ធ្លាប់កត់ត្រាប្រភេទសត្វទាំងនេះ។
លោក ប៊ូ វរសក្ស បានបន្តថា មូលហេតុនៃការថយចុះនេះ ប្រហែលមកពីការរំខានដោយសារមនុស្សជាច្រើនបានចូលទៅកាន់ទីតាំងតំបន់វាលកំបោរនេះ ហើយសហគមន៍តំបន់នេះនៅតែបន្តការពារដោយបន្តស្វែងរកសម្បុកសត្វទាំងនេះ និងបន្តផ្សព្វផ្សាយអប់រំដល់អ្នកពាក់ព័ន្ធនៅតំបន់នេះ ដើម្បីចូលរួមការពារប្រភេទសត្វទាំងនេះ។
លោកថ្លែងថា៖ «បងៗឧទ្យានុរក្សគាត់តែងតែធ្វើការតាមដាន និងបើមានសម្បុកពងកូនយើងល្បាតក្បែរៗហ្នឹងហើយត្រពាំងដែលជាទីជម្រកហ្នឹងយើងតែងតែល្បាតទៅខ្លាចមានការដាក់អន្ទាក់ ខ្លាចមានការបំពុលអីកើតឡើងអ៊ីចឹង»។
គួរបញ្ជាក់ដែរថា ក្រុមអភិរក្សសត្វស្លាបបានរកឃើញសម្បុកត្រយងយក្សនៅតំបន់ដែនជម្រកសត្វព្រៃលំផាត់ទាំងមូលចំនួន ១០ សម្បុក នៅឆ្នាំនេះគឺមានការកើនឡើងបើធៀបឆ្នាំមុន ដែលបានរកឃើញតែចំនួន ៨ សម្បុក។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានប្រាប់ ភ្នំពេញ ប៉ុស្តិ៍ កាលពីថ្ងៃទី ១៥ ខែសីហាថា ក្រសួងបរិស្ថានបានសហការជាមួយអង្គការជាច្រើន ដែលក្នុងនោះមានអង្គការជីវិតសត្វស្លាបអន្តរជាតិ សមាគមសង្គ្រោះសត្វព្រៃកម្ពុជា (WCS) ក្នុងកិច្ចការពារ និងអភិរក្សសត្វត្រយងយក្ស និងសត្វត្រយងចង្កំកសនេះឱ្យបានគង់វង្ស។
លោកថ្លែងថា៖ «តាមរយៈការអនុវត្តគម្រោងស្រូវសត្វត្រយង ដែលមិនត្រឹមតែធានាដល់ការផលិតស្រូវសម្រាប់ប្រើប្រាស់ផ្គត់ផ្គង់ក្នុងគ្រួសាររបស់ប្រជាពលរដ្ឋទេ ប៉ុន្តែធានាបាននិរន្តរភាពសម្រាប់ការប្រើប្រាស់ខ្សែចង្វាក់ផ្គត់ផ្គង់ ដើម្បីគាំទ្រការអភិរក្សការពារសត្វព្រៃ ព្រៃឈើ និងចូលរួមជាមួយរាជរដ្ឋាភិបាលកម្ពុជាក្នុងការកាត់បន្ថយភាពក្រីក្ររបស់ប្រជាពលរដ្ឋ»។
លោក ភក្ត្រា បានបន្តថា នេះគឺជាការគាំទ្រ និងផ្តល់ជម្រើសថ្មីដល់ប្រជាពលរដ្ឋដើម្បីធ្វើឱ្យប្រសើរឡើងនូវជីវភាពដូចដែលពួកគាត់ប្រាថ្នា និងជាមួយគ្នានេះការអភិរក្សធនធានធម្មជាតិ និងសត្វព្រៃអាចសម្រេចបានជោគជ័យ៕
វីដេអូ៖
